Dozenaka ikasle bildu dira gaur goizean Barakaldon ingurumenari eta jasangarritasunari buruz eztabaidatzeko. 2030erako Eskola Agendaren barruan dago topaketa, eta Eskolako Udal Foro gisa ezagutzen da. Bertan, urtero, Barakaldoko ikasleek Udalari helarazten dizkioten ondorioak eta konpromisoak adierazten dira, Barakaldo gero eta hiri iraunkorragoa izan dadin. Amaia del Campo Barakaldoko alkateak hasiera eman dio gaur goizean topaketari, ikasleen aurrean erakundeak azken urtean arlo horretan egindako lanaren berri emanez. «Asko eskertzen dizuegu foro honetan egiten duzuen lana, laguntza handia baita, elkarrekin Barakaldo egunetik egunera hobea lortzeko», esan die.
Foroan Alazne, Alkartu, Antonio Trueba, Beurko, Bituritxa, Cruces, El Regato, Gurutzeta, Ibaibe, La Inmaculada, Mukusuluba, Munoa, Minas, Nuestra Señora de Begoña, Nuestra Señora del Pilar, Nuestra Señora del Rosario, Salesianos, San Juan Bosco eta San Vicente de Paul ikastetxeek hartu dute parte. Kasu honetan, zehazki, Ekoizpen eta Kontsumo Arduratsuaren gaia landu dute, Garapen Jasangarriaren Helburuari (GJH 12) erreferentzia egiten diona. «Pozgarria da foro honetara etortzea eta zuen proposamenak entzun eta apuntatu ahal izatea. Urtero jartzen dizkiguzuen eginbehar horiek gure agenda markatzen dute. Gauza askotan bat gatoz: berdeguneak, bidegorriak, autobus zerbitzu hobea, mugikortasun iraunkorragoa… Eta beste batzuetan aurrera goaz Udaletik beste erakunde batzuen laguntzarekin, hala nola Eusko Jaurlaritzarekin, Gobernu zentralarekin… «, azaldu du Del Campok.
IKASLEEI KONTUAK EMATEA
Alkateak, gainera, foroan bertan iraganean proposatutako ekintzen errepasoa egin du, eta nola aurreratu den azaldu du, «guretzat oso garrantzitsua baita zuei entzutea eta zuen ahaleginari zuek erakusten duzuen gogo eta ilusio berarekin erantzutea».
Hala, Castaños ibaian hondakinak biltzeko lanak edo BECen inguruko zuhaitz-landaketak lekuz aldatu dira. «2025. urtean berriro egingo dira jarduerak, udalerriko plataforma ekologisten lankidetzarekin eta koordinazioarekin», iragarri du.
Ikasleek nabarmendu zuten beste ekintza bat bidegorriak handitzea izan zen. Barakaldok gora egin du azken urte honetan, eta 22,5 km bidegorri eta lagunkoi egin ditu. Gainera, Bizkaibiziko geltokiak 28ra arte luzatu dira, eta zerbitzu horretako bizikleta elektrikoen kopurua handitu da.
Berdeguneak sortzea zen Eskolako Udal Foroko ikasleekin hartutako beste konpromisoetako bat. «Zamalanda parkea ireki berri dugu, Itsasadarraren ondoan dagoen 90.000 metro koadroko bihotz berde eta urdin berria, naturaz, ur-kirolaz… gozatu ahal izango duguna. Eta ez oso urruti, Serraltako parke berria ere martxan jarri dugu, Lutxana eta Gurutzeta auzoen artean ia 57.000 metro karratuko azalera hartzen duena. Gainera, zuhaitz eta landaretza ugari ditu, pagoak, hainbat espezietako haritzak, arteak, gereziondoak, sekuoiak, sagarrondoak, arrosondoak… Eta kirola egiteko, jolasteko eta bizikletaz bidegorriarekin mugitzeko aukera ematen du «, azaldu du Del Campok.
Azkenik, ikasleek hiriko zakarrontzietan hautsontziak jartzea eta 12 urtetik beherakoentzako Kbusaren doakotasuna eskatu dute. «Egin dugu, eta dinamika hori ezinbestekotzat jo dugu: paperontzi berri guztiek hautsontziak izan behar dituzte», adierazi du alkateak.
ESKOLA-EREMUKO EKINTZAK
Eskola-eremuan, Udalak sentsibilizazio-kanpainak ere jarri ditu abian, hala nola olioa birziklatzekoa, Superrafinarekin, Lehen Hezkuntzako 800 ikaslerengana iristen den superheroinarekin, edo udalerriko elkarte ekologistekin eskola-inguruneetako airearen kalitatea ebaluatzeko eta hobetzeko egiten ari diren lanarekin.
Azkenik, Rexcatering proiektua nabarmendu da. Ekimen horrek zero janari alferrik galtzea sustatzen du. Eskola-jantokietan soberan dagoen janaria ahalik eta gehien aprobetxatzen dugu, eta doan jartzen dugu herritarren eskura, saltzeko makina batzuen bidez.
