Amaia Barredo Eusko Jaurlaritzaren Elikadura, Landa Garapen, Nekazaritza eta Arrantzako sailburuak “ArabaK0 Kolektiboa”ren aurkezpenean parte hartu du gaur goizean. Talde berria Arabako ospe handiko hamalau jatetxetako sukaldarik abiatu dute, Mantala Basque Gastronomyren baitan. “Horiekin, euskal sukaldaritza guztia dagoeneko nazioarteko erreferenteen artean dago. Erakunde mota hauek urtetako lana eta sustapena islatzen dute” adierazi du Barredok.
Edorta Lamo (Arrea), Luis Angel Pérez (144), Aitor Etxenike (Kromatiko), Beatriz Pascual (Almazen), María Laskibar eta Iván Sancho (Kea), Jon Gil (Bideko), Belén Sandrin eta Jokin Loma (Palacio de Añana), Luis Hernani (Mano Lenta), Gorka Arrieta (Sua), Cristian Solana (El Puntido), Jabi Sarasua (Karmine), Koldobika Galán eta Asier Moreira (Bode), Aitor Ocio (Bodeguilla) eta Anna Montserratek (Mendialdeko Ogia) osatzen dute Arabako gastronomia elkarlanetik eta nortasuna sustatzeko erabakia hartu duen kolektiboa.
“Eusko Jaurlaritzaren Elikadura, Landa Garapen, Nekazaritza eta Arrantza Sailak, HAZI gure Fundazioak eta Mantala Basque Gastronomyk euskal gastronomia indartzea eta eboluzionatzea sustatzen dugu, eta horretarako, ezagutza, sorkuntza eta jasangarritasuna partekatzen ditugu” nabarmendu du Amaia Barredok Vitoria-Gasteizko Santa Barbara plazan egindako aurkezpen-ekitaldian.
Talde berriaren aurkezpenean egon dira: Amaia Barredo, Joxe Mari Aizega Basque Culinary Centerreko zuzendaria, Imanol Zubelzu Mantala Basque Gastronomyko koordinatzailea, eta kolektiboaren hainbat ordezkari, hala nola Edorta Lamo (Arrea), Aitor Etxenike (Kromatiko), Maria Laskibar (Kea) eta Belen Sandrin (Palacio de Añana).
Edorta Lamo sukaldariak azaldu duenez, “ArabaK0 sarea eta komunitatea ehuntzeko, elkarrekin ikasteko, errelato sendo bat sortzeko nahitik sortu zen, Arabako gastronomia jardunbide egokien edo produktu onen multzo gisa ez ezik, kultura-modu bizi gisa ere ikusarazteko. Hau hasiera besterik ez da. Baina bidea, sukaldaritza ona bezala, su motelean egiten da, denbora behar du, entzun egin behar da eta zentzuz egin”.
Joxe Mari Aizega Basque Culinary Centerreko zuzendariak azpimarratu duenez, «ArabaK0k ingurunearekin konprometitutako sukaldarien belaunaldi berri bat irudikatzen du, eta sukaldaritza teknikatik askoz harago doala ulertzen du: nortasuna da, lurraldea da eta kultura da. Basque Culinary Centerren halako ekimenak bultzatzen ditugu, kolektibotasunetik eta ikuspegi eraldatzailearekin sortzen direnak, ezinbestekoak baitira etorkizuna duen, errotuta dagoen eta, aldi berean, munduari irekita dagoen gastronomia sortzeko”.
Bertako produktua
Gainera, ArabaK0 osatzen dutenek oinarri bat adostu dute eta, horrek, landu nahi duten sukaldaritza-estiloa eta sektorearen barruan eraiki nahi dituzten lotura-motak zehazten ditu: kolaboratiboagoak, errespetuzkoagoak eta helburua dutenak.
Ekintza-lerroen artean, funtsezko zenbait konpromiso dira nabarmentzekoak. Alde batetik, jasangarritasuna eta zero zabor: ArabaK0k ingurumen-inpaktua minimizatzen duen, baliabideak optimizatzen dituen eta «Zero Waste» praktikatzen duen gastronomiaren alde egiten du, ingurunea errespetatuta.
Bertako produktua eta Arabako Errioxako ardoa defendatzea oso garrantzitsua da. Lurraldeko ekoizle eta artisauen lana ere aldarrikatzen du kolektiboak, garaiko eta gertuko produktuen aldeko apustua eginda; lurraldeko ardoak ikur identitario eta gastronomiko gisa kokatzen ditu.
Komunitate honetan, berrikuntza eta sustraiak uztartzen dira. Sukaldaritza eboluzionatu egiten dute, esentzia galdu gabe, teknika berriak txertatuta eta Arabako sukaldaritzaren memoriari uko egin gabe. Uste sendo bat dute gida: gastronomia elkarrekin eraikitzen da, profesionalen artean lan eginda, elkarrengandik ikasten eta sektore indartsuago eta anitzago baten alde batzeko asmoz.
Etengabeko prestakuntza eta autoexijentzia, bai sukaldean bai jantokian, funtsezko oinarriak dira, baita Arabako sukaldaritzak tokiko eta nazioarteko zirkuitu gastronomikoetan ikusgarritasun handiagoa lortzeko lan egitea ere. Sormena, urtarokotasuna eta hospitalitatea dira kolektiboaren beste lan-oinarriak, baita beste diziplina eta kulturetatik elikatzeko nahia ere, haien proposamena aberasten jarrai dezaten.
Mantala
Mantala Basque Gastronomy ekimenaren xedea da euskal gastronomia sustatzea eta garatzea eta, horretarako, ezagutza eta sorkuntza partekatzea. Basque Culinary Centerrek eta Eusko Jaurlaritzaren Elikadura, Landa Garapen, Nekazaritza eta Arrantza Sailak HAZIrekin batera bultzatu dute. Mantala ekimenean, gainera, beste hainbat eragilek laguntzen dute, honako hauek: Mahaia Kolektiboa, Gozoa, Jakitea, Gastronomiaren Euskal Akademiak, Fecoga, Euro-Toques eta Bisubi Fundazioa.
Mantala ezagutza- eta interakzio-gune bat da, eta gastronomia ikertu, hedatu eta kolaboratzeko edukiak eta proiektuak barne hartzen ditu. Euskal gastronomiaren nortasun-balio nagusiak garatu eta nabarmentzen ditu, etorkizunerako ikuspegiarekin, kalitatezko eduki digitalak hedatu eta ikusarazita: webgune bat (mantala.eus) eta sare sozialetako hainbat profil ditu, ekimenen edukia zabaltzeko eta euskal gastronomiari buruzko eduki esklusiboak eskaintzeko.
Dekalogoa
“Arabak0 Kolektiboa”ko kideek Arabako Sukaldaritzaren dekalogo bat partekatzen dute “gastronomia arabar indartsu, jasangarri, berritzaile eta ingurunearekin lotutakoa eraikitzeko: Bertako produktua, Zero Waste, Berrikuntza, Batasuna, Prestakuntza eta Ikusgarritasuna Sormena, Urtarokotasuna, Kultur Aberastasuna eta Hospitalitatea.
“Arabak0 Kolektiboa”k lurraldearekiko hainbat konpromiso ere oinarrizko balio ditu: jasangarritasuna, bertako produktua, berrikuntza eta hospitalitate gastronomikoa”, adierazi du Amaia Barredok. Aurkezpenean parte hartu dutenek Gasteizko Santa Barbara azoka ezaguneko postuak bisitatu dituzte. Bertan, sukaldariek eta lurraldeko ekoizleek hainbat proposamen partekatu dituzte.
Datorren ekainean jardunaldi bat egingo da, eta kolektibo osoak Arabako ekoizle adierazgarrienak bisitatuko ditu.
