Hiriko auzo guztietan banatutako 37 eraikin eta 53 berdegunek osatzen dute
Donostiako Udaren hurrengo etorrerarekin eta heldu daitezkeen bero-boladei aurre egiteko, Donostiako Udalak hiriak duen aterpe klimatikoen sarea eguneratu eta ezagutarazi du. Espazio horiek konfort termikoko baldintza hobeak eskaintzen dituzte hiri-eremu orokorrekoekin alderatuta eta herritarrak haiengana hurbil daitezke berotik babesteko. Horrelako gertakarietan, bero handieneko orduetan etxetik ez irtetea eta itzalean ibiltzea gomendatzen da.
Donostiak mota honetako 90 gune ditu. Sarea hiriko 37 eraikinek eta 53 berdegunek osatzen dute. Aterpeak argi eta garbi seinaleztatuta daude. Informazio-liburuxken bidez kontsulta daitezke:
- Udalinfo bulegoak
- kiroldegiak
- kultur etxeak
- Tabakalera
- Kutxa Kubo
Era berean, erraz ikusi daitezke mapa digital baten bidez Udalaren webgunean.
Gainera, aterpeak hiriko auzo guztietan banatzen dira, eta, beraz, herritar guztientzat daude eskuragarri, beste eremu batzuetara joan beharrik gabe.
“Nahiz eta horrelako gertaeretan etxetik ez irtetea eta itzalean ibiltzea gomendatzen den, baliteke pertsona askoren etxebizitzek erosotasun termikoko baldintza egokiak ez betetzea, eta, beraz, auzoetako aterpe klimatikoak pertsona askorentzat aukera hurbil eta osasungarria dira”, aipatu du Iñigo García Ingurumen zinegotziak.
Aterpe klimatikoen tipologia
2023an, Donostiako Udalak aterpe klimatikoen sare bat diseinatu eta gaitu zuen, klima-aldaketara egokitzeko proiektu gisa.
“Barneko aterpeek tipologia desberdineko eraikinak hartzen dituzte, hala nola kultura-etxea, liburutegiak, museoak, elizak, merkataritza-zentroak, naturaren interpretazio-zentroak edo kiroldegiak. Horri esker, aisia-eskaintza handia dago, erosotasun termikoko baldintza onekin” gaineratu du Garciak. .
Kanpoko aterpeak hiriko parke eta lorategi sare batek osatzen ditu, gutxi gorabehera 300 hektareako azalera duena. Sarea osatzen dute:
- hiriko hiri-inguruko parke handiak (Miramongo basoa, Ametzagañako parkea, Ulia mendiko parkea)
- hiriko parke historikoak (Aiete, Cristina Enea, Miramar)
- lorategi-eremu batzuk (Oroimenaren lorategia)
- pasealekuak (Boulevard, Bizkaia edo Frantzia)
Aterpeetako betekizunak
Aterpe guztiek honako baldintza hauek betetzen dituzte:
- Tenperatura egokia: Eremu horietako tenperaturak, hezetasunak eta aire-fluxuak egokiak izan behar dute. Tenperaturari dagokionez, gomendagarria da 26 ºC-tik beherakoa izatea.
- Doakoa: eremu hauetara sartzea doakoa da, edonor joan ahal izateko.
- Baliabide egokiak: Aterpe klimatikoek atseden hartzeko eta erosotasuna eskaintzeko baliabide egokiak izan behar dituzte: eserlekuak, komunak, iturriak…
- Irisgarritasun egokia: Eremuek irisgarriak izan behar dute pertsona guztientzat, bereziki talde ahulenentzat: adinekoak, haurrak, arnasketa-arazoak dituzten pertsonak…
- Udako denboraldia: Aterpe klimatikoak herritarrentzat eskuragarri daude maiatzetik urrira bitartean.
- Seinaleztapena: Aterpe klimatikoak modu egokian adierazita daude.
Gainera, uda honetan osasun-gomendioak jasotzen dituzten informazio-kartelak jarriko dira hainbat udal-eraikinetan, eta aterpeen sareari buruzko informazioa biltzen duten liburuxkak banatuko dira, gero eta pertsona gehiagok ezagut dezaten eta hiriak dituen baliabideak erabil ditzaten.
Klima aldaketa
Klima-aldaketak eragindako tenperaturaren igoera errealitate bat da. Izan ere, Igeldoko estazio meteorologikoaren (AEMET) datuek erakusten dutenez, batez besteko tenperatura 2 ºC igo da azken 40 urteetan (1984-2024).
Tenperatura altuek edo bero-boladek urtearen arabera aldakortasun handiagoa erakusten badute ere, klima-aldaketaren proiekzioek adierazten dute bero-boladen maiztasuna, intentsitatea eta iraupena handitu egingo direla datozen urteetan ere.
Izan ere, hiriko Klima Aldaketara Egokitzeko Planerako egindako diagnostikoaren arabera, mende amaierarako urtean 2-4 bero-bolada gehiago izango dira, eta urtean 5-15 gau gehiago, 20ºC-tik gorako gutxieneko tenperaturekin.
Hainbat ikerketa zientifikoren arabera, eguneko tenperatura maximoen eta gaueko tenperatura minimoen igoerek eragin negatiboa dute osasunean, eta, beraz, ezinbestekoa da bai bero-aldietan osasun-gomendioak jarraitzea, bai hiria epe luzera egokitzea.
