Gobernu Kontseiluak Regions4 Sustainable Development Goals (SDGs) nazioarteko elkarteari 50.000 euroko zuzeneko dirulaguntza ematea onartu du, eskualdeetako gobernuek Garapen Jasangarriko Helburuak (GJH) tokikotzeko dituzten gaitasunak indartu daitezen.
Diruz lagundutako ekimenaren, Regions4SDGs, helburua da eskualdeen lidergoa aktibatzea eta, hala, 2030 Agenda bizkortzea, jardunbide egokiak trukatzearen bidez, aholkularitza teknikoa eskaintzearen bidez eta nazioarteko foroetan parte hartzearen bidez. Proiektuak nazioz azpiko esparrura egokitutako plangintza, jarraipen eta finantzaketako tresnak emango ditu, baita lehentasuna duten eskualde-gobernuei zuzeneko babesa ere.
Laguntza hori sartzen da gizarte-berrikuntzako eta 2030 Agendako proiektu bultzatzaileak sustatzeko aurrekontu-jardunaren barruan, eta Gobernu Programaren 124. konpromisoari erantzuten dio. Hain zuzen, konpromiso horren ardatza da Garapen Jasangarriko Helburuak tokikotzeko Euskal Autonomia Erkidegoko eredua partekatzea eta Nazio Batuen 2030 Tokiko Koalizioarekiko lankidetza indartzea.
Akordio horren bidez, Euskadik garapen jasangarriaren gobernantza globalean eragile aktibo gisa betetzen duen zeregina indartzen du, eta tokikoa ardatz duten aliantza eraldatzaileen aldeko apustua sendotzen du.
