Emakume gazte bat hil da gaur, astelehena, arratsaldean, antza denez eta lehen zantzuen arabera, Albenizko geltokian (Araba) trenbideko katenaria batek eragindako kalte elektriko baten ondorioz. Hildakoarekin zegoen beste gazte bat ere zauritu da. Ertzaintzak dagokion ikerketa hasi du ezbeharra argitzeko.
Arratsaldeko ordu biak pasata, deia egin duen pertsona batek Sos Deiak 112 Larrialdi Zerbitzuari jakinarazi dio bi emakume gazte zaurituta zeudela tren-bagoi baten ondoan, Albenizko geltokian, San Roman de San Millan udalerrian. Berehala bertaratu dira larrialdietako langileak, besteak beste, Ertzaintzaren patruilak, suhiltzaileak eta osasun-langileak.
Gazteetako bat hil egin da azkenean, nahiz eta bertan bizkortzeko maniobrak egin dizkioten; bestea, hainbat lesiorekin ospitalera eraman dute.
Sare elektrikoko tentsioa eten egin dute bertan lanean ari diren Larrialdi Zerbitzuek biktimei lagundu ahal izateko, eta trenbideko trafikoari eragin dio.
Egindako lehen ikerketetan oinarrituta, ustez han aparkatuta zegoen tren-bagoi batera igo dira gazteak, eta katenaria bateko tentsio elektrikoak harrapatu ditu. Ertzaintzak ikerketa hasi du ezbeharraren arrazoiak argitzeko.
