Eusko Jaurlaritzako Hezkuntza sailak euskararen aldarria egin du gaur Araba Euskaraz jaian. Lucia Torrealday Hezkuntza Politiketarako sailburuordea izan da bertan eta azken hamarkadetan egindako lana ospatzeko deia egin du “elkarlana, konpromisoa eta gogoa” azpimarratu dituelarik. “Gure gaur egungo euskal hezkuntza sistema, ahalegin askoren eta lan askoren fruitua da” azaldu du. Etorkizunera begira ere, hezkuntza-sistema kalitatezkoa, inklusiboa, ekitatiboan aurrerapausuak emateko “denon artean, lankidetzan eta elkarlanean” aritzeko deia egin du.
Aurtengo Araba Euskaraz Armentia Ikastolan hasi du jai-eguna eta Mendizorrotza eta el Prado inguruak ere jendez bete dira, bertaratutakoen aurrean, orain arteko lankidetza-ildoari eustea beharrezkoa dela azaldu du Torrealday sailburuordeak eta elkarlanaren erronka bizirik mantentzea ikastetxeetan, komunitatean… “jakin badakigu, gizarte gero eta anitzagoa dugula eta errealitate soziolinguistikoari dagokionez, ahalegin berezia egin beharko dugu ikasleek euskaraz hezteko helburuan, euskara berrindartzeko asmotan” ondorioztatu du Torrealdayk, ikastetxeen esparrutik kanpo ere euskara bultzatzea dagokigula azpimarratuz.
