Gobernuak Legebiltzarrari erantzuten dio, Mahaiak gaur jakin dezan Legea izapidetzearen aldeko irizpidea zein den, eta horrek, ziurrenik, kontuan hartzea ekarriko du datorren ekainaren 26ko ohiko osoko bilkuran
Eusko Jaurlaritzako Gobernu Kontseiluak gaur adierazi du EAJ-PNV eta PSE-EE talde parlamentarioek aurkeztutako Etxebizitza, Lurzoru eta Hirigintza arloko Premiazko Neurriei buruzko Lege Proposamena aintzat hartuko duela. Gobernuak Legebiltzarrari erantzuten dio, Mahaiak gaur jakin dezan Legea izapidetzearen aldeko irizpidea zein den, eta horrek, ziurrenik, kontuan hartzea ekarriko du datorren ekainaren 26ko ohiko osoko bilkuran. Legegintza-ekimen horren helburu nagusia da babestutako etxebizitzak eraikitzeko lurzorua premiaz aktibatzea, bai eta arauak hobetzea ere, bizitegi-merkatuaren egungo egoerari erantzuna arintzeko.
Eusko Jaurlaritzaren ustez, proposamenak babes publikoko etxebizitzen ekoizpena errazteko, hirigintza-prozedurak arintzeko eta etxebizitza baldintza duinetan eskuratzeko aukera bermatzeko beharrezkoak eta premiazkoak diren neurriak jasotzen ditu Euskadiko arau-esparruko hainbat legetan. Aldaketa adierazgarrienen artean, lurzoruaren erreserba estrategikoak sortzeko aukera, epeak laburtzeko hirigintza-figura berriak eta merkatu tentsionatu izendatutako eremuetan zehapen-esparru eraginkorra daude.
Etxebizitza eskubidearen aldeko arauak bultzatzea
Lege-proposamenak aldaketak sartu ditu autonomia-erkidegoko hainbat arauditan, besteak beste, honako hauetan: Lurzoruaren eta Hirigintzaren Legea, Etxebizitzaren Legea, Ingurumen Administrazioaren Legea eta Turismoaren Legea. Helburua da EAEko esparrua Estatuko oinarrizko legeriarekin lerrokatzea eta etxebizitza eskuratzeko erronkei aurre egitea.
Ildo horretatik, eta udalerri bakoitzeko etxebizitzaren egoera, jarduketen bideragarritasun ekonomikoa eta berehala egikaritzeko baldintzak kontuan hartuta, 2/2006 Legeak ezarritako babes publikoko etxebizitzetarako erreserba % 75etik % 60ra, gehienez, murriztu ahal izango dute udalek, betiere lurzoru urbanizagarrietako Gizarte Babeseko Etxebizitzen % 55 errespetatuta.
Era berean, landa-eremuan —3.000 biztanletik beherako udalerriak barne— etxebizitza babestuak sustatzea erraztuko da, despopulatzea geldiarazteko eta lurralde-kohesioa indartzeko. Halaber, etxebizitza-merkatu tentsionatuko eremuetan etxebizitza berriak eta erabilera turistikoko gelak automatikoki etetea gaitzen da, iraupen luzeko alokairuko etxebizitzarako sarbidea babesteko neurri gisa.
Erantzun koordinatua eta premiazkoa lurraldearen beharrei
Ekimenak ingurumen arloan hobekuntza- eta arintze-neurriak ere jasotzen ditu. Hirigintza-, ingurumen- eta lurzoru-prozedurak sinkronizatzeko asmoz, aldatu egiten da Euskadiko Ingurumen Administrazioaren abenduaren 9ko 10/2021 Legea, 7.000 biztanletik gorako udalei ahalmena emateko ingurumen-eskumenak beren gain har ditzaten planen eta proiektuen prozedura jakin batzuetan, Ingurumen Ebaluazioari buruzko 21/2013 Estatuko Legean xedatutakoarekin bat etorrita.
Gainera, lurzoru kutsatuak berroneratzeko prozedurak optimizatu dira, etxebizitza babestuen arloko kontratu publikoak premiazkotzat jo dira eta hobekuntzak sartu dira Diru-sarrerak Bermatzeko Euskal Sistemaren Legean, Euskal Autonomia Erkidegoko Auzitegi Nagusiaren jurisprudentzia berriaren arabera.
Eusko Jaurlaritzaren iritziz, proposatutako neurriek premiazko behar bati erantzuten diote, eta, hori dela eta, Eusko Legebiltzarrean premiazko prozeduraz izapidetzeko eskatu du. Ekimenaren helburua da euskal administrazio publikoei tresna eraginkorrak eskaintzea higiezinen merkatuaren tentsioei aurre egiteko, etxebizitza publikoen parkea handitzeko eta etxebizitzaren funtzio soziala lurralde osoan betetzen dela bermatzeko.
Akordio horren bidez, Jaurlaritzak berretsi egiten du etxebizitza duina eta egokia izateko eskubidearekin duen konpromisoa, eta aurrerapausoak ematen ditu hirigintza-plangintza, lurzoruaren erabilera eraginkorra eta hiri- eta landa-inguruneen ingurumen- eta gizarte-jasangarritasuna hobetzeko.
