Gipuzkoako Foru Aldundiak, Eusko Jaurlaritzak, Ertzaintzak eta Irun eta Hondarribiko udalek lehen koordinazio-bilera egin dute, aurreko urteetan afekzioak nabarmen murriztu dituzten neurriak mantendu eta indartze aldera
Gipuzkoako Foru Aldundiak, Ertzaintzak, Eusko Jaurlaritzako Trafiko Zuzendaritzak eta Irun eta Hondarribiko udalek lehen koordinazio bilera egin dute gaur goizean, udako trafiko eta mugikortasun dispositiboa abian jartzeko Bidasoa eskualdean, nagusiki Biriatu inguruan sortzen diren afekzioak direla eta.
Erakunde arteko langune honek jarraipena ematen dio azken urteetako lankidetzari, eta, horri esker, operatibo eraginkor bat antolatu ahal izan da trafiko-intentsitate handieneko une zehatzetan afekzioak minimizatzeko. Koordinazio mahaiak ezarritako neurriei esker, azken udetan nabarmen murriztu dira auto-ilarak eta blokeo puntualak.
Bide Azpiegituretako eta Lurralde Estrategiako diputatu Félix Urkolak azpimarratu duenez, “elkarrekin egindako lanak eraginkortasuna erakutsi du, eta Aldundiaren nahia da lankidetza ildo horri eustea, beharrezkoa denean indartzea eta herritarren zerbitzura baliabideak jartzen jarraitzea, eskualdean, puntuala izan arren, eragozpen handiak sortzen dituzten gorabeherei aurre egiteko”. Ildo horretan, bai Aldundiak bai Bidegik indartuko dute langile taldea beharrezkoa den momentuetan, baliabide materialak eta garraio-zerbitzuak areagotuko dira, eta Irungo kobrantza-geltokiko bide guztiak gaituko dira, trafikoaren arintasuna bermatzeko beharrezkoa den guztietan.
Bestalde, Estibaliz Olabarri, Eusko Jaurlaritzako Trafikoko zuzendariak nabarmendu du oso garrantzitsua dela erakundeen eta eragileen arteko koordinazioa, udako Itzulera Operazioak Biriatuko ordainlekutik eta Bidasoaldeko eskualdetik igarotzean sortzen dituen arazoei irtenbide eraginkorrak bilatzeko eta aplikatzeko. Olabarrik adierazi duenez, “esperientziak erakusten digu koordinazioa eta lankidetza direla herritarren segurtasuna eta ongizatea hobetzeko biderik onena”.
Irungo Udalak, bere aldetik, hirian martxan jartzen den ezohiko operatiboaren funtzionamendu ona azpimarratu du, Europa iparraldera doazen ibilgailuak autobidetik edo saihesbidetik birbideratzea saihesteko balio baitu, hiriaren erdigunera sartu gabe. Cristina Laborda alkateak Udaltzaingoaren lana gogorarazi du. Udaltzainak hiriko sarreretako puntu estrategikoetan jartzen dira, Irunera doazen tokiko ibilgailuei lehentasuna emateko.
Bestalde, gaurko bileran horrelako protokoloak urteko beste une batzuetan aplikatu ahal izatea aztertu da, hala nola Pazko Asteko asteartean edo zubiak edo hainbat jaiegun daudenean, batez ere ibilgailu astunen trafikoarekin kolapsoak saihesteko. Labordak azpimarratu du egoera horiek gero eta maizago gertatzen direla, eta hiriko zirkulazioari kalte egiten diotela udako itzulera operaziotik haratago doazen egun garrantzitsuetan.
Igor Enparan Hondarribiko alkateak nabarmendu duenez, «administrazio guztien arteko elkarlana funtsezkoa da udako trafikoa modu egokian kudeatu ahal izateko, eta, horrela, herritarrei zerbitzu hobea eskaintzeko. Iazko udan eta aurrekoan ikusi ahal izan genuen, nahiz eta gure eskualdean udako hilabeteak igarotzen dituzten ibilgailuak milioika izan, hartu ziren erabakiek gure hiriaren barruko egoera arintzen lagundu zuten. Gure aldetik, ahal dugun guztia egingo dugu hasi berri dugun uda honetan horrela izan dadin».
Lana
Koordinazio-mahaia udan ere bilduko da aldizka, trafikoaren bilakaera ebaluatzeko eta une bakoitzean beharrezkoak diren neurriak indartzeko.
