- Basoa, industria eta ezagutza 2025eko Baskegur Egunean
- Euskadiko Egurraren Elkartearen eta balio-kate osoaren arteko urteko topaketa Arkauten
- Federico Saiz, Oscar Azkarate, Olatz Unamunzaga eta Raimundo Ruiz de Escudero izan dira, besteak beste
- Laura Vallejo motozerrista eta baso-dibulgatzaileak eta Iratxe Zorraquino baso-ingeniariak basoko lanak gazteei eskaintzen dien aukerari buruz eztabaidatu dute
Amaia Barredo Eusko Jaurlaritzako Elikadura, Landa Garapen, Nekazaritza eta Arrantzako sailburuak gaur arratsaldean aipatu duenez, “NEIKER eta HAZI fundazioen artean Basoko Unitate Mistoa sortzea aukera aparta da zuraren sektorean ikerketaren eta praktikaren arteko lankidetza hobetzeko”. Barredok Gasteizen, Arkauteko etxaldean, Baskegur Euskadiko Egurraren Elkarteak antolatu duen Baskegur Egunean parte hartu du.
“Bi entitateen gaitasunak eta ezagutzak integratzean, efizientzia hobea, eragin handiagoa eta ezagutzak sektorera azkarrago transferitzea lortuko da”, nabarmendu du Amaia Barredok. “Gainera, baso-sektoreak argi eskatu du, eta Eusko Jaurlaritzak dagoeneko adierazi du, ikerketak gehiago inplikatu behar duela sektoreak aurre egin beharreko erronka praktikoetan, HAZIko eta NEIKEReko basogintzaren arloko taldeen arteko lankidetza operatibo estuago hori azpimarratuz”.
“Basoko Unitate Misto berriak erreferentzialtasuna eta kaudimen teknikoa dakartza: Eusko Jaurlaritzaren euskarri tekniko eta laguntza bihurtuko da basoen eta zuraren balio-katea dinamizatzeko eta plangintza- eta ekintza-esparru koherente eta eguneratua garatzeko. Ezagutzak integratzea ere badakar. Horrek guztiak NEIKERen eta HAZIren esperientzia zientifikoa eta aplikatua bateratzen ditu, basogintzaren sektorearentzat soluzio berritzaileak garatuz”, zehaztu du Amaia Barredok.
Euskadiko Egurraren Elkarteak Baskegur Egunaren beste edizio bat egin du gaur arratsaldean Arkauteko Nekazaritzako Elikagaien Campusean. Bertan erakundeen ordezkariek, enpresek, zentro teknologikoek eta Baskegur elkarteko kideek parte hartu dute esperientziak partekatzeko eta baso-egur katearen erronka komunei aurre egiteko “Gure zura, gure lurra, gure etorkizuna” lelopean. Ekoizpen-sektore honek garapen ekonomikoa –19.000 enplegu, Euskadiko manufaktura-industriaren % 9,6– eta ingurumen-jasangarritasuna uztartzen ditu, egurra lehengai berriztagarria baita eta horren kudeaketak basoen osasunari laguntzen baitio.
Arkauteko topaketan, Oskar Azkarate Baskegurren zuzendari nagusiaren arabera, “sektorearen modernizazioa eta gizartean duen eragina jorratu dira. Orain dela mende bat zuhaitzek Euskadiko azaleraren % 20 estaltzen zuten, eta gaur, berriz, % 55; 396.000 hektarea”. Azkaratek belaunaldi-erreleboaren erronkaz eta emakumeek jarduera horretan duten parte-hartze handiagoari buruz, ez bakarrik baso-jabe gisa, ere hitz egin du.
Eztabaida
Hain zuzen ere, arratsaldeko eztabaida nagusian Laura Vallejo motozerrista eta baso-dibulgatzaileak eta Iratxe Zorraquino baso-ingeniari eta Forest Pioneer SL enpresako erosketa-arduradunak parte hartu dute. Lanbidea bizitzeko bi modu dira: bata, mendian presentzia duena eta praktikatik sare sozialetan dibulgazioan aritzen dena; bestea, berrikuntzan, mekanizazioan eta nazioartekotzean oinarritutako ikuspegi tekniko-enpresariala duena. Amaia Barredok zoriondu egin ditu egiten duten lanagatik.
Biek bokazio eraldatzailea eta inplikazio zuzena dute basoko lanbideekin, eta aztertu dute “nola erakarri belaunaldi berriak, nola indartu emakumeen rola eta nola ikusarazi egunero mendian ari direnak”.
Laura Vallejo galiziarra basoko makineriako langilea da, eta sektoreko enpresen irudi bihurtu da sare sozialetan duen eraginagatik: 140.000 jarraitzaile baino gehiago ditu Instagramen eta 166.000tik gora TikToken. Bere testigantza plataforma berrietatik eduki teknikoa kontsumitzen duen eta benetakotasuna eta prestakuntza praktikoa baloratzen dituen belaunaldi batekin konektatzen da. Freskotasunez eta zorroztasunez historikoki maskulinizatutako lanbide bat ikusarazten du.
Iratxe Zorraquino euskalduna mekanizazioan espezializatuta dago eta nazioarteko salmenten arduraduna da Forest Pioneer enpresan, eta ikuspegi tekniko eta enpresariala eskaini du berrikuntzatik. Basoko makineria nazioartekotzen eta ekoizpen-prozesuen hobekuntzan egin duen ibilbideak agerian jartzen du sektoreak gero ere eredu profesionalizatuago, lehiakorrago eta kanporantz irekietagoera egin duen bilakaera.
Euskadiko Egurraren Elkarteak 2024ko Memoria eta 2025erako ekintza-ildoak aurkeztu ditu, basogintzaren eta zuraren sektoreak eta euskal erakundeek baso kudeaketa eta PEFC zigilua zabaltzeko abian duten kanpainaren bigarren fasea barne. Unitate mugikor interaktibo batek hurbilduko die ikasleei eta jendeari, oro har, urrian eta azaroan, lurraldea egituratzeko funtsezkoa den sektorearen errealitatea, eta hiru lurraldeetako 18 herri eta hiritan izango da.
