Ertzaintzak Eibarko Epaitegian entregatu ditu zuhurtziagabekeria larriaren ondoriozko ustezko lesio-delituaren eginbideak. Bertan ikertu gisa agertzen da Mutrikuko ostalaritza-establezimenduko arduraduna, akats baten ondorioz, muztio baten ordez ontziak garbitzeko produktu bat zerbitzatu baitzuten bertan. Bezeroa ospitaleratuta egon zen egun batzuetan.
Ertzaintzak joan den ekainaren 25ean SOS Deiak zerbitzuaren 112ra egindako abisua jaso ondoren hasi zuen ikerketa. Arratsaldeko lehenengo orduan, bezero batek muztio bat eskatu zuen Mutrikuko ostalaritza-establezimendu batean, eta lehenengo tragoa eman zionean, edariak xaboi zaporea zuela konturatu zen.
Lokalaren arduradunak berehala eman zion abisua larrialdietako zerbitzuari, eta biktima Mendaroko ospitalera eraman zuten. Bertaratu ziren Ertzaintzako agenteek muztio botila konfiskatu zuten, antza denez, edari horren antzeko kolorea zuen garbiketako produktu batekin bete baitzuten aurretik. Horrek eta botila barra inguruan egoteak eragin zuten zerbitzariaren akatsa.
Ikerketaren arduradunek produktuaren analisia eskatu zioten, ofizio judizialaren bidez, Toxikologia eta Auzitegi Medikuntzako Zientzien Institutu Nazionalari. Biktima Donostia Ospitalean ospitaleratuta egon zen ekainaren 30era arte, produktu kaustikoak eragindako barruko lesioengatik.
Ertzaintzak beharrezko eginbideak entregatu ditu dagoeneko Eibarko Guardiako Epaitegian.
