127.000 euro baino gehiago bideratuko dira urtean langileen kostuetarako, baliabide materialetarako eta toki erakundeetan plan pilotuak egiteko
Gobernu Kontseiluak, Ekonomia, Lan eta Enplegu Sailak proposatuta, Enplegu Legeak sortutako Enplegu eta Landa Garapenerako Lankidetza Funtsaren banaketa irizpideei dagozkien hasierako kopuruak onartu ditu gaurko bileran. Neurri horren helburua da tokiko erakundeek enpleguko eta tokiko garapeneko planak egingo dituztela bermatzea, indarrean dagoen araudian ezarritako finantza nahikotasunaren printzipioen ildotik.
Lehen fase honetan, 127.095 euro esleituko dira urtean, hiru kontzeptu nagusitan banatuta: batetik, langile kostuetan (104.095 euro urtean), goi mailako teknikarien lanpostu bat eta administrarien beste bat betetzeko; bestetik, baliabide materialetan (3.000 euro urtean), beharrezko suntsikorretarako, azpiegituretarako eta ekipoetarako; eta, azkenik, gauzatze kostuetan (20.000 euro urtean), planen diseinuarekin eta ezarpenarekin lotutako jardueretarako.
Enpleguari buruzko Legearen memoria ekonomikoan jasotako zenbatespenetan oinarritzen da esleipena, erreferentzia gisa 10.000 eta 20.000 biztanle arteko udalerriak eta toki erakundeak hartuta. Ikuspegi horri esker, proiektu pilotu bat abiarazi ahal izango da hautatutako erakunde talde batekin, 2026tik aurrera inplementazio orokor baterako oinarriak ezarrita.
Akordioak baimena ematen dio Lehendakariorde eta Ekonomia, Lan eta Enplegu sailburuari hasierako fase honetan parte hartuko duten toki erakundeak izendatzeko eta onartutako baliabideak banatzeko. Jarduerak planak diagnostikatzean, diseinatzean eta ezartzean oinarrituko dira, enplegu duina sortzeko eta gizarteratzeko eta laneratzeko lehentasunezko ikuspegiarekin.
15/2023 Legeak ezartzen du 10.000 biztanletik gorako udalerriek plan horiek egin behar dituztela, tokiko eraldaketa ekonomikoa eta gizarte kohesioa sustatuz. Orain esleitutako funtsak hura garatzeko behar diren baliabideak bermatzen ditu, foro aldundiekin eta beste toki erakunde batzuekin koordinatuta.
Finantzaketa eta lege esparrua
Baliabideak banatzeko metodologiari buruzko 4/2021 Legearen babespean jarduten du funtsak, eta Euskadiko Toki Erakundeei buruzko 2/2016 Legeak aitortutako udal eskumenen baitan dago. Hori ezartzeak Eusko Jaurlaritzak duen konpromisoa islatzen du tokiko enplegu politika publikoak benetan deszentralizatzearekin eta indartzearekin.
