- Lehendakariak amaiera eman dio Eusko Ikaskuntza – Laboral Kutxa 2025 Sarien ekitaldiari, eta Jon Esnaola tolosarra saritu du, baita Xabier Etxeberria arroiztarra ere
- Imanol Pradalesek pentsamendu kritikoa, etika eta konpromisoa defendatu ditu demokrazia indartzeko eta erronka sozialei aurre egiteko oinarri gisa, «ezin dugu pilotu automatikoa jarrita politika egin», nabarmendu du.
Imanol Pradales Lehendakariak amaiera eman dio gaur goizean Eusko Ikaskuntza – Laboral Kutxa 2025 sariak banatzeko ekitaldiari. Ibone Bengoetxea lehen lehendakariorde eta Kultura eta Hizkuntza Politikako sailburua, Juan Ignacio Pérez Iglesias Zientzia, Unibertsitateak eta Berrikuntzako sailburua, Ana Urkiza Eusko Ikaskuntzako presidentea eta Adolfo Plaza Laboral Kutxako presidentea ere ekitaldian izan dira.
Bere hitzaldian, Lehendakariak Jon Esnaola tolosarra saritua zoriondu du, haren ibilbideagatik eta bakearekin, bizikidetzarekin eta justizia sozialarekin duen konpromisoagatik. Bere hitzetan, Esnaola «giza eskubideen, pertsona guztien duintasunaren eta etikaren eragilea da, biktimen, sufritzen dutenen eta ikusezinak direnen aldeko eragilea». Halaber, Xabier Etxeberria, 81 urteko arroiztarra, goraipatu du, Humanitate, Kultura, Arte eta Gizarte Zientzien saria jaso duelako; “Pentsamendua eta ekintza —nabarmendu du—, konpromisoa eta ezagutza uztartu dituzu. Asmoz eta jakitez inplikatu zara. Beti defendatu duzun hausnarketa etiko horrek gidatu behar gaitu, demokrazia indartzeko eta aurrean ditugun erronka handiei aurre egiteko».
Pradalesek pentsamendu kritikoaren eta konpromiso sozialaren balioa azpimarratu du, eta nabarmendu du ezin dugula «pilotu automatikoa jarrita politika egin». Zentzu horretan, «alderdien zurrunbilotik atera eta guztion onerako diren dilemei zintzotasunez aurre egitearen» alde mintzatu da lehendakaria.
Amaitzeko, Lehendakariak Joxe Azurmendiren ondarearen garrantzia gogoratu du, eta aintzat hartu du gizarteari «zer garen eta zer egiten dugun» zalantzan jartzen laguntzen dioten Xabierren eta gisa horretako pentsalarien ekarpena. «Guztioi dagokigu eztabaida irekia bultzatzea, autokritikoak izatea eta gure ziurtasunak zalantzan jartzen dituzten ikuspuntuak onartzea», adierazi du.
Eusko Ikaskuntza – Laboral Kutxa Sariek urtero aitortzen dute arlo akademikoan, kulturalean edo sozialean euskal gizartearen aurrerapenari eta kohesioari modu esanguratsuan laguntzen dioten pertsonen lana.
