Donostiako Udalak bazterketa egoeran dauden pertsonen arreta indartu du Villa Salia irekiz

Donostiako Udalak martxan jarri du Villa Salia eguneko arreta zentro berria. Baliabide hori uztailaren 1ean hasi zen lanean, eta gizarte-bazterkeriako egoeran dauden pertsonentzako zerbitzuak hobetzeko udal-estrategiaren barruan dago. Eraikina birgaitzeko esku-hartze integral baten ondoren ireki da.

Eguneko arreta-zerbitzuak (udal-aurrekontuko 941.002 euro bideratuko dira urtean zerbitzura) bazterketa-arriskuan dauden pertsonei arreta emateko eredu berri bat du, berrintegrazio-lan pertsonalizatua ahalbidetuko duen ikuspegi erabat integral batetik egiten dela bermatzeko.

Horregatik, hemendik aurrera zerbitzua erabili behar duten pertsonek hitzordua eskatu beharko dute GLUZaren bidez (Gizarte Larrialdietako Udal Zerbitzua), bertatik orientatuko baitira beren beharretara gehien egokitzen diren baliabideetara.

Hala, Villa Salia eguneko arreta-zentro bihurtzen da, bazterkeria-egoeran dauden pertsonek Gizarte Zerbitzuen Sistemaren prestazioak (informazioa, bitartekaritza, gizarte- eta hezkuntza-arloko esku-hartzea eta esku-hartze psikosoziala eta gizarte-laguntza) eta prestazio osagarriak (kontsigna, mantenua, arropa garbitzea eta norberaren garbitasuna) jasotzeko erabiliko duten gune fisiko bat.

Baina Villa Saliak eskaintzen duen arreta eraikinak hartzen duena baino haratago doa, beste eremu batzuetan ere egiten baita, kaleko hezkuntzan adibidez. Talde tekniko horrek espazio publikoan garatzen du bere lana, eta bazterketa-egoeran dauden pertsonengana hurbiltzen da beren egunerokotasuna garatzen duten lekuetan edo gaua igarotzen duten lekuetan, helburu bikoitzarekin:

• a) baliabideabk eskuratu ahal izatea eta oinarrizko premiak estaltzen dituzten eskubideak erabili ahal izatea.

b) zerbitzu pulikoetara hurbiltzea, gizarteratze-prozesu zailenei ekin ahal izateko.

Kaleko hezkuntza urteko egun guztietan egingo da, astelehenetik ostiralera eta neguko protokoloa aktibatzeko behar diren asteburu eta jaiegunetan.

Bestalde, lan garrantzitsua egiten da gune komunitarioetan ere, non prestakuntza-, kirol-, kultura- eta aisialdi-jarduerak antolatzen diren ingurune inklusiboetan, bazterkeria-egoeran dauden pertsonen eta komunitatearen arteko elkarrekintza sustatuz.

Eredu berria eta prestazioak Villa Salian

Villa Salia eraikineko eguneko arretaren planteamendu berrian, pertsonei arreta emango zaie GLUZaren preskripzio teknikoagatik eta hainbat taldetan, arreta pertsonalizatuagoa emateko.

Zentroa urteko egun guztietan egongo da irekita (astelehenetik larunbatera 09:30etik 17:00etara / igandean: 12:00etatik 14:30era), hiru ordu-tarte ezartzen dira, eta horietako bakoitzean 24 pertsona artatuko dira, gehi beste 6 prestazio espezifikoetarako.

• 1. Tartea: 09:30 – 12:00

• 2. Tartea: 12:00 – 14:30 (urteko egun guztietan)

3. Tartea: 14:30 – 17:00

Bigarren tartean, gainera, berrikuntza garrantzitsuenetako bat eskainiko da: gizarte-jantokiko zerbitzua, egoera ahulenean dauden 24 pertsonari janaria eskainiko diena, eta horiek eguneko arreta-zerbitzu horretatik banatzen ziren elikadura- eta higiene-produktuekin asteko 40 kitetara gehituko dira. Jangela berri horrek lehen mailako elikadura-beharrak asetzea baino garrantzi handiagoa du; aitzitik, kasu ahulenetan laguntza emateko eta lan egiteko espazio gisa balio du.

Higienera bideratutako baliabideak ere zabaltzen dira, garbitegi edo arropa-garbiketa zerbitzu batekin eta Villa Saliako dutxetan garbiketa pertsonala egiteko aukerarekin. Zerbitzuak dutxak, xaboia, toalla eta, ezartzen den kasuetan, barruko arropa ematen du. Zerbitzu horrek, gainera, hondartzetako kabinetako komunetan edo beste bainu publiko batzuetan astean bi dutxa hartzeko aukera ematen die berrogei pertsonari, orain arte egin den bezala.

Erabiltzaileek, era berean, kontsigna-zerbitzu bat izango dute beren objektu pertsonaletarako leihatilekin, interneterako sarbidearekin, prentsarekin, jokoekin eta aisialdiko jarduerekin, eta konpainiako animalientzako espazioekin.

Zerbitzu hori emateko, 3 langile gehitu dira, eta, horrela, arreta-taldea osatu da: koordinatzaile nagusi bat, profil teknikoko 3 pertsona eta profil osagarriko beste bat (2 teknikari eta laguntzaile bat igandeetan), kaleko hezkuntzarako 2 pertsona eta komunitate-espazioko beste bi.

Villa Salia eraikina

1944an eraikia, Villa Salia birgaitua izan da bere eraginkortasun energetikoa, jasangarritasuna, irisgarritasuna eta segurtasuna hobetzeko. Eraikinak erdisotoko, beheko eta lehenengo solairuak ditu, baita pabiloi bat ere. Iraganean irakaskuntza-erabilerak izan zituen, eta orain pertsona ahulenentzako arreta integraleko gune bihurtu da.

Eraikina 2.642.373 euroko inbertsioarekin birgaitu da, eta horietatik 1.394.922 € Next Generation funts europarrekin finantzatu dira. Horrez gain, 90.000 €-ko inbertsioa egin da bazterketa-arriskuan dauden pertsonentzako eguneko arreta-zerbitzuak eta familientzako programak hartzeko ekipamenduan.