Zarauzko Ur Bare hotelean egin den aurkezpen honetan Euskal Kostaldeko mapa ilustratu berria eta Itourbask sareko turismo-bulegoetan jarriko diren informazio-erakustokiak ezagutzera eman dira
Turismo eta Merkataritzako sailburuorde Jakes Aguirrezabal Iribarrek Euskal Kostaldeko mapa ilustratua aurkeztu du gaur, uztailak 23, asteazkena, Zarautzen. Itsasertzaren erakargarritasun turistiko nagusiak balioan jartzeko diseinatutako tresna da, eta arreta berezia jartzen du paisaiaren eta gastronomiaren aberastasunean. Ekitaldia Ur Bare hotelean izan da, eta Xabier Txurruka Zarauzko alkateak eta Libe Otegui Gipuzkoako Foru Aldundiko Turismoko zuzendariak parte hartu dute.
Sailburuordeak mapa turistiko horren garrantzia azpimarratu du, eta adierazi duenez, “Sailak zikloturismoaren alde egiten duen apustua indartzeko balio du, turismo aktiboa eta jasangarritasun turistikoa sustatzeko funtsezko elementu gisa, turismoa lurralde osoan banatzeko, urtarokotasuna kentzeko eta tokiko garapena sustatzeko”.
Zarauzko alkatearen ustez, “benetako ohorea da Euskadi Basque Country Grand Tourraren parte izatea eta bere aurkezpena horrelako ingurune zoragarri batean hartzea. Zarautz hondartza baino askoz gehiago da. Zarautz gastronomia da, kalitatezko merkataritza eta urte osoan gozatzeko moduko ingurune natural pribilegiatua”.
Gainera, maparekin batera, Itourbask sareko turismo-bulegoetan eskuragarri dauden informazio-erakustoki berriak aurkeztu dira. Erakustoki horiek proiektuaren identitate bisuala indartzen dute eta bisitariek informazioa eskuratzea errazten dute.
Ekintza hau Basquetourren 2025eko Ekintza Planaren barruan kokatzen da. Plan horren arabera, Euskadi Basque Country Grand Tour funtsezko tresna da turismo fluxuak deszentralizatzeko, batez besteko egonaldia luzatzeko, eta Euskadik helmuga jasangarri eta kalitatezko gisa duen posizionamendua indartzeko.
Euskadi Basque Country Grand Tour
Euskadi Basque Country Grand Tour Basquetourrek proposatutako ibilbide turistikoa da; Euskadi bere osotasunean ezagutzeko eta bizitzeko modu paregabea, kultura, natura eta gastronomia uztartzen dituena. Aldi berean, turismo-eredu orekatu eta jasangarri baten aldeko apustua indartzen du, lurralde osoa balioan jarrita eta bisitariaren esperientzia aberastuta.
Zortzi etapatan egituratuta dago, 98 udalerri zeharkatzen ditu eta 1.000 kilometro baino gehiago egiten ditu; guztira 150 proposamen turistiko baino gehiago konektatzen dira.
Jarduera turistikoa deszentralizatzea, urtarokotasuna murriztea, eskaintza dibertsifikatzea, batez besteko egonaldia luzatzea eta helmugan gastua handitzea dira proiektuaren helburu nagusiak.
