Imanol Pradales Lehendakaria Boisera iritsi da 2025eko Jaialdian parte hartzeko, Euskaditik kanpoko euskal diasporaren topaketarik handienean. Agendari hasiera emateko, harrera eta aurreskua egin ditu Jaialdiaren batzorde antolatzaileak, eta horrela eman dio hasiera ekitaldi kultural, instituzional eta komunitarioez betetako asteari.
Lehen lehendakariorde eta Kultura eta Hizkuntza Politikako sailburu Ibone Bengoetxeak, Kanpo Harremanetarako eta Euskadi Globalerako idazkari nagusi Ander Caballerok eta Kanpoko Euskal Komunitatearen zuzendari Ziortza Olanok laguntzen diote lehendakariari bidaia ofizial honetan. Hamar urte beteak dituen Jaialdiaren edizio honetan nabarmena da ordezkaritza instituzionala, Eusko Jaurlaritzarenaz gain.
Bisitak bi helburu ditu: batetik, Idaho estatuko eta Boise hiriko agintariekin harreman instituzionalak sendotzea; eta, bestetik, Eusko Jaurlaritzak Estatu Batuetako euskal komunitateari aitortza eta babesa adieraztea, belaunaldiz belaunaldi Euskadiko kulturaren eta balioen enbaxadore izan baita berez.
Politika, kultura eta komunitatea batzen dituen agenda
Uztailaren 30ean, asteazkena, lehendakariak Boiseko Basque Block, euskal kulturaren bihotza, bisitatuko du. Egun horretan bertan, Boise State Universityk antolatutako BSU Gala for Basque Institutions ekitaldian parte hartuko du, Euskadiko erakunde akademiko eta kulturalen eta diasporaren arteko lotura estua sinbolizatzen duena.
Uztailaren 31n, osteguna, topaketa instituzionalak egingo dira. Lehendakaria Brad Little Idahoko gobernadorearekin bilduko da Estatuko Kapitolioan, eta ondoren Lauren McLean Boiseko alkatearekin; biek parte hartuko dute ikurrina goratzeko ekitaldi sinbolikoan, bi herrien arteko aintzatespen eta adiskidetasunaren keinu gisa. ‘Zortziak Bat’ mintegian ere parte hartuko du, Boise State Universityn, Euskadiren eta Boiseren arteko hezkuntza-, kultura- eta gizarte-loturei buruzko hausnarketarako gune batean. Jardunaldia amaitzeko, euskal komunitatearen tradizio eta espirituaren adibide bizia diren Sports Night eta Street Dance herri-ekitaldietan parte hartuko du.
Abuztuaren 1ean, ostirala, Lehendakaria North American Basque Organization (NABO) erakundeko ordezkariekin bilduko da, Estatu Batuetako euskal elkarte-sare nagusiarekin harremanak sendotzeko. Era berean, sokadantza euskal identitate kolektiboaren adierazpen gisa aitortzeko ekitaldi batean parte hartuko du, eta komunitate anitza, dinamikoa eta konprometitua osatzen duen diaspora berriarentzat Eusko Jaurlaritzak antolatutako harrera instituzional batera bertaratuko da.
Euskadi Globalaren aldeko apustua
Lehendakariak 2025eko Jaialdian parte hartzeak indartu egiten du Eusko Jaurlaritzak atzerrian dauden euskal komunitateekin hartua duen konpromisoa, Euskadi Globalaren benetako antenak baitira. Bidaia hau aukera paregabea da gure mugetatik kanpo herrialdearen orainaren eta etorkizunaren parte aktibo izaten jarraitzen dutenekin harremanak estutzeko, konpromisoak berritzeko eta Euskadiren nazioarteko proiekzioa indartzeko.
