Estatu Batuen % 15eko muga-zergak eragina izango du Arabako Errioxako ardoetan eta txakolinean
Amaia Barredo Eusko Jaurlaritzako Elikadura, Landa Garapen, Nekazaritza eta Arrantzako sailburua “Trump presidenteak Arabako Errioxako ardoei eta txakolinei ezarriko dien muga-zergaren ehunekoaren” zain dago.
“AEBetako presidentearen adierazpenen gorabeherak nazioarteko ekonomia osoa kaltetzen ari dira. Europar Batasunak hasitako negoziazioa oraindik ez da agortu; ea nola geratzen den dena” esan du Barredok.
Estatu Batuak euskal ardoen bigarren merkatua da esportazioan, eta lehenengoa balioan.
Muga-zerga % 15 izan zitekeela iragarri zenean, Amaia Barredok egiaztatu zuen “kolpe serioa zela, baina ez berebizikoa Arabako Errioxarentzat, ezta txakolinentzat ere”.
Bere ustez, Trumpen aurreko agintaldian zehar euskal ardoek antzeko muga-zerga izan zuten, eta egoera jasan zuten.
Amaia Barredoren ustez, “horrek guztiak eskaera-jaitsiera ekarriko du, baita marjinetan tentsioa ere, baina Arabako Errioxako Ardoen eta Txakolinen kasuan, kalitate handiari eta kontsumitzaileen leialtasunari esker, ardo arruntek baino hobeto egin ahal dute aurre”.
Barredo Sailburuaren ustez, “prezio erakargarri”aren diskurtsotik “balio bereizgarri”aren diskurtsora igarotzeko lanean jarraitzea da gakoa, munduko ardorik onenekin gertatzen den bezala, merkatuak dibertsifikatzen eta berriak irekitzen diren bitartean.
Barredoren hitzetan, “2024ko amaieran inportatzaile eta ekoizleen izu justifikatuaren ondorioz, inportatzaile estatubatuarrek edariak pilatu zituzten, eta inbentarioetan errekorrak lortu ziren”.
Horrek pentsarazten zuen erosketak bat-batean zuzenduko zirela 2025eko hurrengo hilabeteetan, baita muga-zerga hori ezarri aurretik ere. % 15eko muga-zerga zaurgarritasun handieneko unean ezarriko da.
Arabako Errioxako ardoen eta txakolinaren ekoizleentzat, horrek, epe laburrean, eskaera gutxiago eta kobrantza-ziklo luzeagoak ekarriko ditu, prezio-tartea edozein dela ere.
Txakolinaren kasuan, ekoizpen-bolumen txikiagoa duenez, merkatu alternatiboak irekitzeko aukera du, eta Eusko Jaurlaritza gogor ari da horretan guztian lanean.
Estatu espainiarrak AEBra esportatzeko batez besteko prezioa 5,81 $/l-raino igo zuen —inportazioko batez bestekoa baino handixeagoa—, gamaz igotzeko berariazko estrategiari esker.
Arabako Errioxa erabat bat dator balio-kontzeptu horrekin —deitura historikoa, mahasti zaharra eta jasangarritasuna—, eta horrek marjina indartzen du, prezioagatik bakarrik ez lehiatzeko.
Amaia Barredoren saila egiten ari den ikerketen arabera, muga-zerga berri horiek marjina zigortuko lukete, baina ez lukete lehiakortasuna erabat suntsituko kalitatearen pertzepzioari eusten bazaio.
Amaia Barredok gomendio hau egin die upategi eta merkaturatzaileei: indartu dezatela jatetxe eta ostalaritzaren bidez, gainprezioa kartan desagertzen baita; helaraz dezatela jatorri-deitura eta jasangarritasuna, eta balio gastronomikoa, prezio berria justifikatzeko. Beste horrenbeste txakolinaren berezitasunari dagokionez.
Dibertsifikazio geografikoa ere beharrezkoa izango da: Kanadan, Japonian, Mexikon eta Europako merkatuan bizkor sartzea, AEBko aldi baterako jaitsiera konpentsatzeko eta balioa suntsituko luketen beherapenen aurrean marketin kolaboratiboko jarduerak bultzatzeko.
