Besteak beste, sailaren estatistika-plana eta estatistika propioak egingo ditu, Euskal Estatistika Planean eta Urteko Estatistika Programetan sartuta ez daudenak
Gobernu Kontseiluak onartu egin du Elikadura, Landa Garapen, Nekazaritza eta Arrantza Sailaren Estatistika Organo Espezifikoa sortzea, haren antolaketa eta funtzionamendua ezarrita. Elikadura, Landa Garapen, Nekazaritza eta Arrantzako sailburu Amaia Barredok zehazten duenez, “iaz Elikadura, Landa Garapen, Nekazaritza eta Arrantza Sail berria sortu ondoren, sail honek Estatistika Organo Espezifiko bat (OEE) sortzea eta haren antolaketa eta funtzionamendua arautzea eskatzen zuen”.
Horretarako, egungo Elikadura, Landa Garapen, Nekazaritza eta Arrantza Sailaren eskumenekoak izatera igaro diren gaiei lotutako antolaketa eta funtzionamendua ezartzen ditu gaur onartu den dekretuak, egiten diren estatistika-lanen jarraipena bermatzeko.
Prozedurari dagokionez, Xedapen Orokorrak Egiteko Prozeduraren Legean xedatutakoa bete da, eta, gainera, Euskal Estatistika Batzordearen nahitaezko txostena eskatu da.
Elikadura, Landa Garapen, Nekazaritza eta Arrantza Saileko Estatistika Organo Berezia indibidualizazio organiko propio eta pertsona bakarrekoa da, eta zerbitzuen arloan eskumena duen zuzendaritzako titularraren mende dago zuzenean.
Bere eskumenen ondorioetarako, honako hauetaz arduratuko da: a) Sailaren Estatistika Plana egitea, Euskal Estatistika Planaren proiektuaren oinarri izango dena; b) Eustat-Euskal Estatistika Erakundearekin lankidetzan aritzea Euskal Estatistika Plana eta Urteko Estatistika Programak egiteko; c) Urteko Estatistika Programetan sartutako estatistikak egitea, programa horietan zehaztutako moduan; d) Estatistika propioak egitea, Euskal Estatistika Planean eta Urteko Estatistika Programetan sartu gabeak; e) Beste erakunde batzuekiko harremana; f) Bere eskumeneko estatistikak egiteko informazioa lortzea; g) Estatistiken emaitzak argitaratzea eta hedatzea; h) Bere arloko fitxategi estatistikoak egiten eta eguneratzen parte hartzea, eta i) Elikadura, Landa Garapen, Nekazaritza eta Arrantza Sailak interesgarritzat jotako proiektuak egitea, bereziki sektoreko eta azpisektoreko zerbitzuak, azterlanak eta analisiak.
Elikadura, Landa Garapen, Nekazaritza eta Arrantza Sailaren estatistika-organo espezifikoak bere eskumenak erabiliko ditu, bai sail horretako organoen estatistika-beharrei erantzuteko, bai, Eustat-Euskal Estatistika Erakundeaz aparte, atxikita dituen erakunde instituzionalei erantzuteko, estatistikak datu estatistikoetan edo datu administratiboetan oinarrituta egin behar badira ere.
