Ertzaintzak 22 urteko gizon bat atxilotu zuen atzo, Oiartzungo enpresa batetik kamioi bat lapurtu eta ihes egin ondoren. Gaztea AP-8an, Itziar parean, aurkitu zuten. Lapurrak autopistaren erdian gelditu zuen ibilgailua, eta pendizean behera ihes egiten saiatu zen. Suhiltzaileek eta Ertzaintzako Zaintza eta Erreskate Unitateak erreskatatu behar izan zuten.
Lapurreta atzo, asteartea, goizeko 9ak baino minutu batzuk lehenago gertatu zen Oiartzungo garraio-enpresa batean. Enpresako arduradunak Ertzaintzari jakitera eman zionez, ezezagun bat barrutira sartu zen eta kamioi baten trakzio-burua lapurtu zuen. Ihes egin zuen, eta AP-8an, Zarautz parean, Bilborako noranzkoan, zirkulatzen geolokalizatuta zegoen.
Ertzaintzak Herritarren Babeseko eta Trafiko Unitateko baliabideak mobilizatu zituen, eta lapurtutako ibilgailua geldiarazten saiatu ziren arren, gidariak ez zien jaramonik egin agenteen aginduei. Kamioia lapurtu zuen eta gidatzen ari zen pertsonak, Itziar parean zihoanean, autopista erdian gelditu zuen ibilgailua. Jarraian, kabinatik irten eta pendiz batean behera jauzi eginda ihes egiten saiatu zen. Pendizetik suhiltzaileek eta Ertzaintzako ZEUko agenteek erreskatatu behar izan zuten. Tokian bertan arreta medikoa jaso ondoren, Donostia Ospitalera eraman zuten.
Gaztea atxilotu egin zuten, bide segurtasunaren aurkako hiru ustezko delitu egotzita, eta ikertu egin zuten motordun ibilgailua ebastea egotzita.
Atxilotua, 22 urtekoa, polizia-eginbideak amaitu ondoren agintari judizialaren eskuetan utzi dute.
Pertsonak aparkatzeko balaztari eragin gabe utzitako kamioiak polizia-ibilgailu bat kolpatu zuen, eta barruan zihoan agente bat osasun-zentro batera eraman behar izan zuten artatzera.
