- Euskal enpresa sarearen ekintzailetza kolektiboaren eta berrikuntzaren aldeko babesa indartu du Lehendakariorde eta Ekonomia, Lan eta Enplegu sailburuak
- Eusko Jaurlaritzak Euskadiren garapen ekonomiko eta sozialarekin duen konpromisoa berretsi du, parte hartzen duten, iraunkorrak diren eta kalitatezko enplegua sortzen duten enpresa ereduen alde eginez
Mikel Torres Lehendakariorde eta Ekonomia, Lan eta Enplegu sailburuak gaur, ostirala, iragarri du 4 milioi euro baino gehiago onartuko dituztela hurrengo Gobernu Kontseiluan 2025ean Euskadin gizarte ekonomia sustatzeko. Deialdi berri horrek bateratu eta sinplifikatu egiten ditu dauden laguntza lerroak, eta helburu hauek ditu: ekintzailetza kolektiboa erraztea, enpresak sortzea eta indartzea kooperatiba eta lan formulen bidez, bai eta bazkide berriak sartzea ere, arreta berezia jarrita langabezian edo desgaitasunen bat duten pertsonei.
Otalora jauregian, Mondragon Corporationen egoitzan, egindako bilera estrategiko baten baitan egin du iragarpena. Salvador Illa Kataluniako Generalitateko presidenteak eta euskal kooperatibako ordezkariek hartu dute parte bilera horretan. Topaketan, sektorearen erronkak eta aukerak aztertu dituzte, bai eta lankidetza publiko-pribatuaren garrantzia ere, euskal enpresa sarearen berrikuntza, jasangarritasuna eta nazioartekotzea bultzatzeko.
Bileraren ondoren, Torresek eta Illak Mondragon Assemblyren instalazioak bisitatu dituzte. Bertan, zuzenean ezagutu ahal izan dituzte automatizazioan eta garapen teknologikoan egindako aurrerapenak. Aurrerapen horiek Euskadi ekonomia sozialean eta industria aurreratuan nazioarteko erreferente gisa kokatzen dute.
Ekonomia, Lan eta Enplegu Sailak onartutako laguntzak hiru multzo handitan egituratzen dira: gizarte ekonomiako enpresak sortzeko ekosistema egokia mantentzea, enpresa berriak eratzea eta sustatzea, eta konpainia horietan bazkideak sartzea.
Ekimen horren bidez, Eusko Jaurlaritzak berretsi egiten du Euskadiren garapen ekonomiko eta sozialarekin duen konpromisoa, eta empresa eredu partehartzaileen, jasangarrien eta kalitatezko enplegua sortzen dutenen aldeko apustua egiten du.
Nazioarteko lidergotza
Gainera, ostiral honetako lehen orduan, Torres Lehendakariordeak Izar Cutting Tools enpresaren instalazioak bisitatu ditu. Ehun urtetik gorako enpresa da, eta Amorebieta-Etxanon dago. Bisitan, Torresek balioan jarri ditu Izarren nazioarteko lidergoa eta Lan Sozietate Anonimo gisa duen antolaketa egitura partehartzailea, iraunkortasunarekin, berrikuntzarekin eta nazioartekotzearekin duen konpromisoa azpimarratuz. Enpresa hori eredu da Euskadiko gizarte ekonomian 90 herrialde baino gehiagotara esportatzen duelako eta azken ekitaldietan fakturazio markak hautsi dituelako.
