BIMEk bere jarduerak kultura- eta sormen-industrien garapenean duen eragina erakusten duten datuak eta Bilbon eta Bizkaian duen eragin ekonomikoa aurkeztu ditu gaur. BIMEko zuzendari Isabel Villanueva, Bilbao Ekintzako zuzendari nagusi Javier Garcinuño, eta Bizkaiko Foru Aldundiko Lurralde Lehiakortasuneko eta Kanpo Sustapeneko zuzendari Cristina Múgica arduratu dira dagoeneko nazioarteko musika- eta kultura-industriaren laugarren topaketa garrantzitsuena den erreferentziazko ekitaldi hori dimentsionatzeaz, zeinaren hamahirugarren edizioa Bilbon egingo baita, urriaren 28tik 31ra.
Isabel Villanuevak, BIMEko zuzendariak, topaketak musikaren eta kulturaren industria globalera sartzeko giltza gisa betetzen duen rola azpimarratu du, Europa eta Latinoamerika lotzen dituen eta Bilbon eta Bogotan 7.000 profesional, artista eta ekintzaile baino gehiago biltzen dituen espazio bat den aldetik. Orain arte 12 edizio egin ditu BIMEk eta Bilbo eta Bizkaia kultur berrikuntzaren nazioarteko hub bihurtu ditu. Bertan, musikaren eta kulturaren industriaren norabidea marrazten da: «BIME musikaren eta kultura- eta sormen-industrien etxea da, musikaren eta kulturaren etorkizuna markatzen duten ideiak, talentuak eta aukerak gurutzatzen diren lekua».
Kultura eta Sormen Industriek (KSI) Europan duten garrantziari buruzko zifrak sendoak dira: Europako KSIek 1,2 milioi enpresa eta 8 milioi enplegu biltzen dituzte, hau da, EBren lan-indarraren % 3,8, eta 477.000 milioi euroko balio erantsia sortzen dute, telekomunikazio-, automobilgintza- edo farmazia-sektoreek baino gehiago (*Europako Batzordearen datuak, 2024). Testuinguru horretan, Cristina Múgicak, Bizkaiko Foru Aldundiko Lurralde Lehiakortasuneko eta Kanpo Sustapeneko zuzendariak, BIME bezalako ekitaldiek Bizkaiko kanpo-sustapenerako duten garrantzia nabarmendu du: «BIMEk dimentsio bikoitza uztartzen du, estrategikoa Bizkairentzat: jarduera ekonomikoa eta nazioarteko posizionamendua. Egun hauetan Bilbo eta Bizkaia Europa eta Iberoamerikaren arteko topagune bihurtzen ditu, eta horrek balio erantsia biderkatzen die gure industria kultural eta sortzaileei, ikusgarritasuna, esportaziorako aukerak eta nazioarteko kontaktuak aurkitzen dituztelako hemen. Bizkaiko Foru Aldundiarentzat, BIME kanpo-sustapenean, ospean eta ekonomian egindako inbertsioa da: esparru honetan sortzen den kontaktu profesional bakoitza bira batean, koprodukzio batean, zerbitzu-kontratu batean edo aliantza berri batean bihur daiteke».
Horretaz gain, BIMEk hirian izan duen eraginari buruzko datu garrantzitsuenetako batzuk ere eman ditu. 2024an, 40 herrialdetako 4.500 profesional baino gehiago bildu zituen, eta 3,7 milioi euroko eragin ekonomikoa sortu zuen, Bilbo musikaz eta kultur jardueraz bete zuen BIME Liveren kultur programazio irekira 20.000 parte-hartzaile baino gehiago erakartzeaz gain. Alde horretatik, Javier Garcinuño, Bilbao Ekintzako zuzendari nagusiak, azpimarratu du kulturak funtsezko eginkizuna duela Bilboren jarduera ekonomikoaren eta gizarte-eraldaketaren motor gisa: «Industria kultural eta sortzaileak aukera-sektorea dira, beren ahalmen handia dela eta, garapen ekonomikorako, enplegurako eta berrikuntzarako; baina baita gizarte-sormen eta kohesiorantz aurrera egiteko ere. BIMEk balioa ematen dio Bilboko herritarren egunerokoari, musikara eta kulturara sartzeko aukera zabaltzen duelako eta parte-hartzea zein hiri-espazio kulturalen indartzea sustatzen dituelako».
Musikaren eta kulturaren motorra
BIMEren bi ardatzek, alde batetik BIME Pro-k, ikerketarako, prestakuntzarako eta networkingerako espazio profesionalak, eta bestetik, BIME Live-k, zuzeneko musikaren programazioak, ekitaldiak motor ekonomiko eta konexio-ardatz gisa duen zeregina berresten dute. Ekitaldia Bilbon jaio zen, baina orain ondo finkatutako edizio bat du Bogotan ere, hala mundua musikaren bidez konektatuta. Bertako agertoki eta aretoetatik industriako ahots handienetako batzuk igaro dira, hala nola Raphael, Alexandra Lioutikoff (Universal Music Publishing), Arde Bogotá, Alfonso Pérez Soto (Warner Music), Nathy Peluso, Leila Cobo (Billboard), Enrique Bunbury, Rebeca León (Lionfish), eta Sherley Manson.
Bilboko hurrengo edizioa urriaren 28tik 31ra egingo da eta, berriz ere, industriako eta kulturaren munduko ahots handiak bilduko ditu, baita egun nazioartean proiekziorik handiena duten talentuak ere, musikaren industriaren ekosistema elkarrekin indartzen jarraitzeko apustu argian. BIME PROren esparruan, honako hauek parte hartuko dute: Rubén Blades, Latinoamerikako musikaren legenda, Mau y Ricky bikote venezuelarra, Mon Laferte artista txiletarra, Leire Martínez, bakarkako etapa berrian, Ignacio Meyer (TelevisisaUnivisión) eta Víctor González (Virgin Music Group). Bestalde, BIME LIVEk agertoki handi bihurtuko du hiria, eta honako artista hauen showcase-ak eta kontzertuak bilduko ditu: Delaporte, Orishas, Queralt Lahoz, Javiera Electra, Yami Safdie, Esteban Rojas, Lara91K, Jesse Baez eta Txopet.
Hurrengo edizioak lan-arlo berri bat izango du, Kultura eta Sormen Industrien Ikerketarako lehen Kongresua bilduko baitu BIME Pro ekimenaren esparruan. Haren antolatzailea Bartzelonako UIC Unibertsitatea izango da. Kongresuak hainbat aditu, akademiko eta profesional bilduko ditu sektorearen erronkak zorrotz aztertzeko eta KSIen profesionalizazioa eta hazkundea bultzatuko duen ezagutza aplikatua sortzeko. Hala, BIMEk musikaren eta kultura- eta sormen-industrien sektorea Euskaditik mundura indartzen jarraitzearen alde egiten du, kultura, berrikuntza eta aniztasuna indar eraldatzaile bihurtzen diren leku gisa sendotzeko.
Hori guztia tokiko, nazioko eta nazioarteko enpresa, elkarte, hedabide eta erakundeekin lankidetzan, hala nola Eusko Jaurlaritzako Kultura eta Hizkuntza Politika Saila eta Ekonomia, Lan eta Enplegu Saila, Lanbide, Bizkaiko Foru Aldundiko Ekonomia Sustapen Saila, Bilboko Udala (Bilbao Ekintzaren bitartez), Espainiako Gobernuko Kultura Ministerioa, Turismoaren Euskal Agentzia, BASQUETOUR, Kolonbiako Kultura, Arte eta Jakintza Ministerioa, Bogotako Alkatetza Nagusia eta Comfamako ELPAUER, besteak beste. Babes horrek indartu egiten du kultura eta musika sustatzeko plataforma estrategiko gisa duen zeregina.
BIME-ri buruz
Bilbon eta Bogotan urtero egiten diren edizioekin, BIME Europa eta Amerikaren arteko nazioartekotze-zubi handi gisa finkatu da, eta Iberoamerikako musika-plataforma garrantzitsuenetako bat da. Ekimenaren programazioa industriatik industriarako sortua da eta, hari esker, sektoreko laugarren ekitaldirik garrantzitsuenaren lekua irabazi du mundu-mailan, eta eszenak, lurraldeak, profesionalak eta komunitate sortzaileak lotzen dituen sare aktiboa da Atlantikoaren bi aldeetan. Baina BIME topaketa profesional bat baino askoz gehiago da: hausnarketa estrategikorako gune bat da, iparrorratz kolektibo bat eta etortzear dagoena detektatzeko radar bat. Musika zentro bakar baten inguruan biratu ordez errealitate ugaritan barrena hedatzen den mundu batean, BIME ezinbesteko lekua da dinamika berriak ulertzeko, erreferenteekin konektatzeko eta musika-ekosistema globalaren bilakaeraren parte izateko.
