Ertzaintzak 25 urteko gizon bat atxilotu du Gipuzkoako hiriburuan osasun publikoaren aurkako delitu bat eta ausarkeriaz gidatzearen beste delitu bat leporatuta, gidatzen ari zen autoaren barruan 20 tabletatan banatuta bi kilo haxix aurkitu ondoren. Akusatuak ihes egin zuen bere autoan, eta atzetik segi ondoren, droga-paketeekin oinez ihes egin nahian ari zenean atzeman zuten.
Atzo, asteartea, arratsaldeko 16:45 aldera gertatu zen Gipuzkoako lurralde historikoan. Ordu horretan, Errenteriako mugapean bereizgarridun ibilgailu ofizialean zerbitzuan zegoen Ertzaintzaren baliabide batek ikusi zuen auto bateko gidaria telefono mugikorra erabiliz ari zela gidatzen.
Donostiako Jose Elosegui Alkatearen hiribideko biribilgunearen inguruan, patruila gidariarekin harremanetan jarri zen eta agindu zion ibilgailua leku seguru batean gelditzeko, trafikoaren dentsitatea zela eta, zegozkion frogaketak egiteko.
Une horretan, gidariak abiadura handian ihes egin zuen Ederrena kalerako noranzkoan. Agenteak autoa geldiarazten saiatu ziren megafonia eta argi birakariak erabiliz, baina gidariak ez zien jaramonik polizia-aginduei.
Azkenik, ihes egindako ibilgailua geldiaraztea lortu zuten, eta gidaria barruan zerbait manipulatzen ari zela ikusi zuten. Halako batean, autotik paper gardenean bilduta zeuden pakete marroi batzuk hartuta irten zen eta oinez ihes egin zuen. Agenteek oinez jarraitu zioten atzetik, eta susmagarria harrapatu zutenean, menderatu eta paketeak kendu zizkioten.
Paketeetan substantzia sorgorgarriak egon zitezkeela susmatuta, agenteek egiaztatu egin zuten, eta barruan prentsatutako 20 haxix-tableta aurkitu zituzten. Era berean, akusatuari gorputz miaketa egin ziotenean, eskudirutan hiru mila eta berrehun euro aurkitu zizkioten.
Konfiskatutako droga pisatu zutenean, agenteek egiaztatu zuten bi kilo haxix zeudela guztira. Konfiskatutako substantziak hamahiru mila euroko balioa izango zukeen merkatuan.
Horregatik guztiagatik, agenteek akusatua, 25 urteko gizona, atxilotu zuten osasun publikoaren aurkako delitu batengatik eta ausarkeriaz gidatzearen beste delitu batengatik.
Atxilotua gaur arratsaldean jarri dute agintari judizialaren eskuetan, polizia-eginbideak amaitutakoan.
