Miguel de los Toyosek nabarmendu duenez, “Sailak konpromisoa du, dagoeneko betetzen ari garena, Visesaren bidez gure sustapenetan industrializazioa sartzen joateko”, eta hau gogorarazi du: “etxebizitza babestu industrializatuaren ziurtagiri bat ere sortu nahi dugu 2026rako”
Eusko Jaurlaritzako Etxebizitzako sailburuorde Miguel de los Toyosek MEET:INN jardunaldia inauguratu du gaur Bilboko Portuko gurutzaontzien terminalean (Getxon). Jardunaldia Build:INN eraikuntzaren euskal klusterrak antolatu du. Bertan, azken urtean etxebizitza-politika indartzeko eta sektorearekiko lankidetza estutzeko egindako ahalegina azpimarratu du sailbuordeak.
“Duela urtebete jardunaldi honetan parte hartu genuen. Sailean lau hilabete ere ez generamatzanez, gure hitzaldia asmo-adierazpen bat izan zen, funtsezko helburu batekin abian jarri nahi genituen ekimenei buruzkoa: etxebizitza eskuragarriaren eskaintza handitzea, gizartean dugun eskaerari erantzuteko ”, gogorarazi du De los Toyosek.
Ildo horretatik, nabarmendu du hartutako lehen neurria hau izan zela: “etxebizitza babestuak eraikitzeko erritmoa % 50 handitzea, eta Visesak dagoeneko mandatua dauka ekitaldi bakoitzeko 750 etxebizitza eraikitzeko, orain arteko 500 etxebizitzen aldean; hala, legegintzaldiko helburutzat ezarri ditugun 7.000 etxebizitzetara iristeko oinarriak ezarri dira”.
Sailburuordeak balioetsi egin du elkarte eta profesionalekiko entzute aktiboaren prozesua, baita Etxebizitzaren Itun Sozialetik eratorritako Foroaren dinamizazioa ere. Itun horretatik hiru lantalde sortu dira. “Bide batez, eskertu egin nahi dut bai klusterraren, bai klusterreko kide askoren parte-hartze aktiboa eta propositiboa”, adierazi du.
Arauen esparruko erronkei dagokienez, De los Toyosek gogorarazi du premiazko neurrien lege bat tramitatzen ari dela sustapenen prozedurak arintzeko eta haien bideragarritasuna errazteko. “Aurreikusita dago bi araudiak urtea amaitu baino lehen onartuta egotea”, azaldu du.
Sailburuordeak finantzaketa-formula berriak bilatzeko ahalegina ere azpimarratu du. “Administraziotik —eta are gehiago 2015etik, ordutik gure sustapen guztiek alokairuan izan behar dutelako—, ez gara gai erronka handi honi bakarrik aurre egiteko”. Horregatik, gaineratu duenez, “funts sozial bat sortzea zehazten ari gara, ekarpen publikoak palanka-efektua izateko eta beharrezko inbertsio-ahaleginean lankidetza pribatuarekin eskalatu ahal izateko bidea emango duen funts soziala”.
Etxebizitzaren eraikuntzan industrializazioaren aldeko apustua izan da beste ardatz nabarmenetako bat. Ildo horretatik, De los Toyosek nabarmendu duenez, “Sailak konpromisoa du, dagoeneko betetzen ari garena, Visesaren bidez gure sustapenetan industrializazioa sartzen joateko. Etxebizitza babestu industrializatuaren ziurtagiri bat ere sortu nahi dugu 2026rako”.
Amaierako hitzaldian, sailburuordeak bere sailaren erabakitasuna azpimarratu nahi izan du. “Urte bizia izan da, eta hurrengo ekitaldietan fruituak ematen hastea espero dugun oinarriak ezartzen joan da. Ziur aski ez, seguru, ekimen horiek guztiak ez dira denen gustukoak izango, kritikatu egingo dituzte eta oposizioa izango dute, baina nahiago dut egiten ditugun gauzengatik kritikatuak izatea, ez egiteagatik kritikatuak izatea baino. Ezingo zaigu halakorik esan”, amaitu du.
Bestalde, Alberto Marín Build:INNeko presidenteak jardunaldiaren une nagusietako bat nabarmendu du: Euskadiko Eraikuntzaren Behatoki berriaren aurkezpena. Etengabe eraldatzen ari den ingurune batean argitasuna emateko diseinatutako tresna sektorial bat da, lehen aldiz datuak, joerak eta adierazle estrategikoak zentralizatzen dituena plataforma ireki, irisgarri eta erabilera praktikora bideratutako plataforma bakar batean. Ekimen honen bidez, Build:INNek baliabide egonkor bat eman nahi dio sektoreari, analisi zorrotza egitea eta erabaki informatuak hartzea erraztuko duena, bai enpresa-esparruan, bai esparru instituzionalean.
