Gaur, urriak 6, astelehena, Osakidetzak gripearen aurkako txertaketa-kanpaina hasiko du Euskadiko osasun-zentroetan arrisku-taldeentzat eta 60 urtetik gorako pertsonentzat. Joan den ostegunean hitzordua hartzeko kanalak ireki zirenetik, Osakidetzak 43.099 pertsona agendatu ditu guztira, horietatik 2.353 haurrak dira eta 20.381 80 urtetik gorakoak. Lurraldeka, 6.551 hitzordu izan dira Araban (743 haur eta 80 urtetik gorako 3.142), 23.379 Bizkaian (1.155 haur eta 80 urtetik gorako 11.775) eta 13.169 Gipuzkoan (455 haur eta 80 urtetik gorako 5.464).
Gontzal Tamayo Osasuneko sailburuordeak ziurtatu duenez, txertaketa da daukagun tresnarik eraginkorrena, bai intzidentzia gutxitzeko, bai, batez ere, gaixotasun horren larritasuna eta hilkortasuna murrizteko, gripearen txertaketa-kanpainaren hasieran, Gasteizko Olarizuko osasun-zentroan. «Norbera babesteko eta, batez ere, ahulenak direnak babesteko modurik onena da«, adierazi du. Ildo horretan, Osasuneko sailburuordeak azaldu du populazio-segmentu kalteberenak identifikatu direla, lehen aste hauetan txertaketa lehenesteko.
Txertaketa-kanpainaren helburua ahalik eta pertsona gehien babestea da, kalteberenetatik hasita, horiek baitira arnas gaixotasunen aurrean konplikaziorik handienak izan ditzaketenak. Horregatik, Eusko Jaurlaritzako Osasun Sailak eta Osakidetzak arreta jartzen dute haurren eta haurdun dauden emakumeen txertaketan, bai eta adinekoengan ere. Izan ere, kanpaina honetan 75 urtetik gorakoek gripearen aurkako txerto “indartua” jasoko dute. Aurten ere, gripearen txertoarekin batera, arriskua duten herritarrei covidaren aurkako txertoa aldi berean jasotzeko aukera eskaintzen zaie.
Immunizazioa joan den astean hasi zen adinekoen egoitzetan, orain arte 3.800 pertsona inguru txertatuta dira gripearen aurka eta 3.000 inguru covid-aren aurka, eta gaurtik aurrera, astelehena, gripearen aurkako txertoa jartzen hasi dira xede-populazioan, honela definituta:
- 60 urte edo gehiagoko pertsonak.
- 6 hilabete eta 5 urte bitarteko haurrak (59 hilabetera arte).
- Immunosupresioa duten pertsonak edo patologia kronikoren bat dutenak (biriketakoa, bihotzekoa, diabetesa…).
- Haurdun dauden emakumeak.
- Gizarte- eta osasun-zerbitzuetako langileak, eta pertsona kalteberen eta bizikideen zaintzaileak.
- Beste langile batzuk, hala nola haurtzaindegietako eta Haur Hezkuntzako zentroetako langileak, animaliekiko esposizio zuzena duten pertsonak (baserriak, albaitariak…) eta funtsezko zerbitzu publikoak (segurtasun indarrak, suhiltzaileak…).
AZAROAN GAINERAKO HERRITARREI GONBIDAPENA
Osasun Sailak eta Osakidetzak azpimarratu dutenez, txertoa da gripea prebenitzeko tresnarik onena, eta, horregatik, herritarrak beren burua babestera animatu dituzte, batez ere pertsona ahulenak. Hala, urtero txertatzearen garrantzia azpimarratzen dute, izan ere, gripearen aurkako txertoek sortzen duten immunitatea gutxituz doa denborarekin, eta ez du irauten denboraldi batetik bestera; gainera, gripearen birusek mutatzeko joera dute, eta horrek txertoen formulazioa aldatzea dakar, Osasunaren Mundu Erakundeak (OME) gomendatuta.
Gonbidapena gainerako herritarrei luzatuko zaie azaroaren hasieran, populazio kalteberena babestuta dagoenean, helburua ahalik eta pertsona gehien immunizatzea baita. Guztira, Osakidetzak 786.200 dosi ditu aurten, eta zerbitzu-erakunde bakoitzari emango zaizkio, dagokion biztanleriaren beharren arabera.
HAURRENTZAKO TXERTO INTRANASALA
Beste urte batez, Osakidetzak arreta jarri nahi du haurren txertaketan, ez bakarrik gripeak osasunean izan ditzaketen konplikazioengatik, baizik eta beste pertsona batzuei gaixotasuna transmititzeko gaitasuna duen biztanleria delako, bereziki adinekoei. Horregatik, duela hiru urtez geroztik, Osakidetzak sistematikoki txertatzen ditu 6 hilabete eta 5 urte bitarteko haurrak (59 hilabete), bai eta arrisku-egoeraren bat duten 5 urtetik gorakoak ere. Itsaspena errazteko eta ziztadaren eragozpenak saihesteko, aurten ere txerto intranasala erabiliko da 2 urtetik hasita 5 urtera arte.
Gainera, gripearen txertoari Arnas Birus Sinzitialaren aurkako immunizazioa gehitu behar zaio, hori baita bronkiolitis akutuaren eragile nagusia haurrengan, eta adin txikienekoei ematen zaie, zehazki jaioberriei (aurtengo uztailaren 1etik aurrera jaioei), goiztiarrei eta gaixotasun kronikoren bat duten 2 urtetik beherakoei, birus horren konplikazioetatik babesteko. Joan den irailaren 15ean txertaketa abiatu zenetik, 2.000 dosi inguru eman dira. Bronkiolitisa eragiten duen arnas birus sinzitialaren intzidentzia oraindik txikia dela ikusten da, urteko sasoi honetan ohikoa den bezala. 2024-2025 denboraldian bronkiolitisaren epidemia pixka bat beranduago gertatu zen, 51. astearen inguruan (abenduaren erdialdea), aurreko denboraldiarekin alderatuta, 47. astean izan zuena agerraldia (urriaren amaiera).
NOLA ESKATU HITZORDUA TXERTORAKO?
Hasiera batean, xede-biztanleriari emango zaio lehentasuna. Horregatik:
- Xede-populaziokoa bazara: gaurtik aurrera eska dezakezu hitzordua Osakidetzaren webgunearen bidez, edo zure osasun-zentrora deituta, urriaren 6tik aurrera txertoa jartzeko. 80 urte edo gehiago dituzten pertsonei telefonoz deitzen zaie hitzordu bat eskaintzeko.
- Xede-populaziokoa EZ bazara: itxaron azaroaren hasierara arte web-orriaren bidez edo zure osasun-zentrora deituta gripearen aurkako txertoa jartzeko hitzordua eskatzeko.
PREBENTZIO NEURRIAK
Osasun Saileko Arnas Infekzio Akutuari buruzko txostenen arabera, 2024-2025 denboraldian gripearen epidemiak goia jo zuen 2. astean, eta aurreko denboraldiko antzeko portaera izan zuen, nahiz eta epidemiak pixka bat gehiago iraun zuen. Bronkiolitisaren kasuan, epidemia zenbait astez atzeratu zen aurreko denboraldiekin alderatuta, eta, ondorioz, ohikoa baino denbora luzeagoan irauten zuen gripearekin batera. COVID-19ari dagokionez, bere zirkulazioa azken denboraldietako baxuena izan da; erregistroen arabera, apirilaren amaieran hasi eta azken asteetan behera egiten hasi dela dirudi.
Txertoa hartzeaz gain, Osasun Sailak eta Osakidetzak gogorarazi dute gripea eta Covida prebenitu daitezkeela hainbat neurri errespetatuz, besteak beste, eskuak garbituta, eztul eta doministiku egitean ahoa eta sudurra estalita, erabili eta botatzeko zapiak erabilita, espazioak maiz aireztatuta, eta maskarak erabilita sintomak izanez gero edo pertsona kalteberekin harremanetan egonez gero.
Informazio gehiago: https://www.osakidetza.euskadi.eus/2024ko-txertaketa-kanpaina/webosk00-oskenf/eu/https://www.osakidetza.euskadi.eus/vacunacion-antigripal/
