«Where Navarra meets Europe» NEXUS jardunaldiak Nafarroako I+G+b Sistemako (SINAI) eragileak, Foru Komunitateko entitate eta enpresak, Europako sare eta partenariatuetako ordezkariak eta Europako espazioaren ikuspegia partekatzen duten beste herrialde batzuetako gonbidatuak hartu ditu gaur goizean Baluarte Nafarroako Batzar Jauregia eta Auditoriuman, Iruñean. Nafarroako Gobernuko lehendakariorde eta Memoria eta Bizikidetzako, Kanpo Ekintzako eta Euskarako kontseilari Ana Ollok nabarmendu du, ekitaldiaren laugarren edizioaren hasieran, Nafarroak I+G+b arloan izan duen ibilbidea, Gobernuak Kanpo Ekintzako II. Planean hartutako konpromisoa eta Nafarroak Europako I+G+b proiektuetan parte hartzeko eta baita proiektu horien buru izateko duen ahalmena. Kanpo Ekintzako zuzendari nagusi Sergio Pérez Garcíak bere hitzekin emango dio amaiera ekitaldiari.
«Where Navarra meets Europe» NEXUS jardunaldiaren laugarren edizio hau, Kanpo Ekintzako Zuzendaritza Nagusiak finantzatua eta ADItech (Nafarroako I+G+b Sistemaren koordinatzailea) erakundeak antolatua, bereziki enpresen eta SINAI eragileen arteko harremana sustatzeko pentsatua dago, Europako proiektuetan gauzatzen diren partzuergoak sortzeko. Ideiak eta proiektuak ezagutarazteko aurkezpen labur eta bizkorrak egiteko formatuaren bidez, Europako lankidetza-sareen eta partenario-sareen esperientzia positiboak partekatu nahi izan dira.
Nafarroako Kanpo Ekintzako II. Planari erreferentzia
Ollo lehendakariordeak hiru alderdi izan ditu hizpide. NEXUS jardunaldiaren laugarren edizioa izatea goraipatu ondoren, lehendakariordeak azpimarratu du «Nafarroako I+G+b sektorearen eta Europaren arteko dinamizazio- eta lotura-eginkizuna, Nafarroako Gobernuak, oro har, eta Kanpo Ekintzako Zuzendaritza Nagusiak, bereziki, aspalditik bultzatzen duguna eta berriki onartu dugun Kanpo Ekintzako II. Planaren oinarrizko osagaia dena».
Ollok positiboki baloratu eta nabarmendu nahi izan du SINAI osatzen duten eragileek sarean eta lankidetzan egiten duten lana. «Europako esparruaren irakaskuntzetako bat da funtsezkoa dela energiak batzea eta elkarlanean aritzen ikastea, bakarka inoiz iritsiko ez ginatekeen lekura iristeko. Azken urteotan, Nafarroa sektore desberdinetako Europako 80 sare estrategiko ingurutan egon da, Gobernuak edo bere sozietate publikoek zuzenean parte hartzen dutelarik, ikerketa zentroez, unibertsitateez, zentro teknologikoez eta SINAIko beste eragile batzuez gain».
Hala, Ollo lehendakariordeak gogorarazi du Nafarroak ERRIN sareko Osasun taldea gidatu duela; aktiboki parte hartzen duela Eskualde Periferiko eta Martitimoen Konferentzian (CRPM), VANGUARD industria-eskualdeen sarean ere parte hartu duela, gaikako sareetan ez ezik, Nafarroarentzat interesgarriak diren sektoreetan ere, hala nola Climate Group (Ingurumena), Regions4 eta ACR+ (Ekonomia Zirkularra) edo Social Economy Europe (Gizarte Ekonomia). Halaber, Ollok adierazi duenez, bi espazioetan (gizarte-ekonomia eta ekonomia zirkularra) «erreferenteak gara Europako eremuko ekimenak gidatzen, hala nola, ECIV (European Circular Innovation Valley) europar proiektua, eta, horrez gain, Automobilgintzako Eskualdeen Aliantzaren duela gutxiko koordinazioa, 36 eremu desberdin biltzen dituena».
Nafarroako Gobernuak NEXUS jardunaldiarekin duen konpromisoak Nafarroako I+G+b ekosistemaren barruan lankidetza sustatzea eta Nafarroak Europan duen baterako presentzia indartzea du helburu, entitate berriak Europako proiektu eta laguntzetara sar daitezen erraztuz, dagoeneko esperientzia dutenei lagunduz. Konpromiso hori, Ollok azaldu duenez, «Foru Komunitatean berrikuntzaren arloan zume onak ditugu, eta horrek oso hazkuntza-salda interesgarria sortzen du. Eta agerian geratzen da, halaber, burua eta mugak zabalik ditugula Europan beste batzuek egiten dutenetik ikasteko «.
Era berean, Ollok ondorioztatu du “lankidetza eta sareko ikaskuntza horretan oinarritzen dela Foru Gobernuaren Kanpo Ekintzako estrategia, eta horretarako gaude gaur hemen, esperientziak partekatzeko eta indarrak batzeko. Izan ere, sektore publikoaren lidergo argi batetik, lankidetza publiko-pribatua ere XXI. mendeko Nafarroa honen nortasun-ikur bat da «.
Jardunaldiari hasiera emateko, EFFRA, ADRA, BIC, ECTP eta A. SPIRE Europar Batasuneko I+G+b lankidetza nagusietan aktiboki parte hartzen duten sareak izan dira protagonista. Ordezkariek beren lehentasunak eta lan-ildoak aurkeztu dituzte, bai eta 2026-2027ko hurrengo finantza-aukeretan sartutako gaiak aurreratu ere, Nafarroako entitateei erakunde horiekin eta balizko lankidetza-arloekin harreman zuzena izateko aukera emanez.
Bloke batek hurrengo FP10 Esparru Programaren gakoak aurkeztu ditu, Europako ERRIN sareko ordezkari baten eskutik. Ondoren, Nafarroako ZEO Technology enpresa txiki eta ertain batek bere ibilbidea partekatu du Europan, eskualdeko enpresek nazioarteko proiektuetara jauzi egiteko duten moduaren adibide gisa.
Sareak eta Nafarroako Gobernuaren apustu estrategikoa
Gogoratu behar da NEXUS ADItechek koordinatutako eta Nafarroako Gobernuko Kanpo Harremanetarako Zuzendaritza Nagusiak 2020tik finantzatutako Horizonte Redes ekimenaren barruan dagoela. Ekimen honen helburua da Nafarroako 2021-2027 (S4) espezializazio adimenduneko estrategiak ezarritako lehentasun tematikoetan maila eta eragin handieneko Europako sare eta partaidetzetan Foru Komunitatea modu aktiboan kokatzea.
Era berean, SINAIko eragileei eta Nafarroako enpresei jakinarazi nahi die garrantzitsua dela Europako urte anitzeko finantza-esparru berriaren aurrean prestatzea (MFP 2028-2034). Ekimen honen balioa SINAIko eragileen eta enpresen eskualde-interesak Bruselan Nafarroako «antenekin» lotzen dituen lan-metodologia sendotzean datza. Bertan, Memoria eta Bizikidetza, Kanpo Ekintza eta Euskara departamentuak Nafarroako Gobernuko ordezkaritza iraunkorra du.
