Ongizate, Gazteria eta Erronka Demografikoko Sailak antolatutako «Enpresen jardunbide egokiak lana eta familia bateragarri egiteko» jardunaldian, gaur Gasteizen, enpresen, kooperatiben eta administrazioen 80 ordezkari baino gehiago bertaratu dira. Topaketan, hainbat ikuspegitatik abiatuta, kontziliazioaren esparruan sakondu da, hala nola Unibertsitatetik, abokatutzatik edo inplikatutako enpresa edo kooperatiben berezko esperientziatik, bai eta kontziliazioan aitortzan sistemaren aurkezpenetik ere.
«Ahalegin berezia egiten ari gara bizitza pertsonala, lana eta familia bateragarri egiteko dekretu berria izapidetzeko. Dekretu hau Sailak identifikatutako egungo eta etorkizuneko erronkei erantzuteko sortu da, baina hainbat gizarte-eragileren ekarpenak ere biltzen ditu. Lanketa prozesua parte-hartzailea eta gardena da, eta kontsulta publikoak, araudiari, generoari eta enpresa-funtzionamenduari buruzko txostenak eta Emakunde eta Euskadiko Ekonomia eta Gizarte Arazoetarako Batzordea bezalako erakundeen lankidetza ditu. Helburua kontziliazio-laguntza guztiak testu bakar batean bateratzea da, familien eta egoeren aniztasunera egokituz, eta erantzun kidetasuna eta aukera berdintasuna indartuz » adierazi du Gorka Oraak, Haur, Nerabe eta Familia zuzendariak.
Kontziliazio erantzukidea sustatzeko eta kontziliazio-neurriak bultzatzeko konpromisoari dagokionez, Haur, Nerabe eta Familien Zuzendaritzak Deustuko Unibertsitateari Euskadiko enpresetan kontziliazioari buruzko azterlan bat egiteko eskatu dio. Azterlan horren bidez, Euskadin hartzen diren neurri nagusiak eta langileen ikuspegitik duten eragina nabarmendu nahi dira. Euskal enpresetan gaur egun dauden uztartze-neurriak identifikatzeaz gain, helburua uztartze-kultura aztertzea, pertsonen esperientzia eta gogobetetze-maila ezagutzea da. Kontziliazioaren inguruko errealitate desberdin horiek ezagutzeko, elkarrizketak egin zaizkie hiru lurraldeetako 1.129 langileri, sexu, adin eta jarduera-sektore desberdinetakoak.
Txostenak kontziliazioaren kulturari buruz egindako inkestan lortutako datuetan jasotzen duenez, batez besteko globalak (3,40k, 7tik) iradokitzen du kontziliazioa ez dagoela erabat normalizatuta edo txertatuta enpresa-kulturan. Gaur egun, oraindik ere kontziliazio-neurriak hartzeagatik kostu profesional bat jasotzen da eta inplikazio profesional txikiagoarekin lotzen da.
Bestalde, azpimarratu behar da inkestatutako pertsonek adierazten dutela beren enpresek, ahal den neurrian, kontziliazio-neurriak pertsona bakoitzaren beharretara egokitzen dituztela, eta gogobetetze-inkestaren emaitzak, batez beste, 4,46ko batezbestekoa erakusten du, 7tik.
Era berean, berretsi egiten da seme-alabak edo mendeko pertsonak zaintzeko ematen den denboran alde nabarmenak daudela, presentzialtasun fisikoaren eskakizunen igoeraren arabera. Hau da, txostenak berresten du espazioari begirako malgutasunak, etxetik lan egiteko aukerak edo eskema hibridoetan lan egiteak familiaren zaintzari dedikazio handiagoa ematen diotela.
Era berean, txostenak kontziliazio-neurrien eskuragarritasunari erreparatzen dio. Hauek askotan ez erabiltzearen arrazoai aztertzen du, aprobetxamendua zailtzen duten oztopoak nabarmenduz (errepresalien eta geldialdi profesionalaren beldurra, eragin ekonomikoa, komunikazio falta…). Enpresek kontziliaziorako dituzten erronkak ere nabarmentzen dira, besteak beste, neurriak eskuragarri egon behar direla, baina baita irisgarriak, ezagunak eta estigmarik gabeak ere.
Txostenaren ondorioek kontziliazio-neurriei buruzko gomendio batzuk nabarmentzen dituzte, besteak beste, lanaldi partzialeko neurriak kontuan hartzea, neurri erabilgarri baina gutxi baloratuen benetako erabilgarritasuna berrikustea edo barne-komunikazioa hobetzea, eta enpresetan kontziliazio-kultura hobetzeko gomendio batzuk, pixkanaka bizitza-lana oreka gehiago onartzera joateko, kontziliazioa talentua erakartzeko eta atxikitzeko tresna gisa baloratuz.
Kalitate zigilu/diploma berria
Gaurko jardunaldi honetan txostena aurkezteaz gain, Eusko Jaurlaritzako Haur, Nerabe eta Familien Zuzendaritzak, Euskalitekin batera, enpresetan kontziliazioaren kudeaketa aitortzeko sistema aitzindari baten garapena aurkeztu du, eta horren bidez, gaur lehen aldiz, euskal enpresa eta kooperatiba batzuen konpromisoa aitortu da.
Gidaritza baten emaitza izan da, Euskalitekin batera, plantillen bizitza pertsonala, familia eta lana uztartzearekin zerikusia duten enpresen lana aitortzeko lau mailako sistema bat sortu duena.
– CDE, Kolore Guztiak eta Careers & Jobs SL enpresek kontziliazioren 1. mailari dagokion zigilua/diploma lortu dute.
– Sedical SAk, Hutchinson-Industrias Técnicas de la Espuma SLk, CPES Fernandok eta Zikotz SAUk kontziliazioaren 2. mailari dagokion zigilua/diploma lortu dute.
– Murgibide SLk, Centro San Luisek eta Alday Fundazioak kontziliazioko 3. mailari dagokion zigilua/diploma lortu dute.
– Asociación Bizitegik eta Colegio Urkide Ikastetxea S. COOP .ek kontziliazioko 4. mailari (altuena) dagokion zigilua/diploma lortu dute.
«Oreka horrek enpresa-sare anitza islatzen du, heldutasun-maila desberdinekin, baina guztiek helburu bera dute: kontziliazioan aurrera egitea, estrategiaren eta kudeaketa ulertzeko moduaren zati gisa. Ongizate, Gazteria eta Erronka Demografiko Sailetik benetan eskertu nahi dizuegu konfiantza, eta aldaketarako eragile gisa egin duzuen lana aitortu. Politika publikoek enpresa-ehunean aliatu konprometituak aurkitzen badituzte bakarrik dute zentzua» adierazi du Xabier Legarretak, Gazteria eta Erronka Demografikoko sailburuordeak.
Kontziliazio plan eta/edo diagnostiko baterako dirulaguntza
Ongizate, Gazteria eta Erronka Demografikoko Sailak laguntza ekonomiko espezifikoak bultzatzen ditu erakundeek kontziliazio-diagnostikoak eta planak egin ditzaten, 420.000 euroko zuzkidurarekin 2025eko deialdian. Laguntza horiek proiektuaren kostuaren % 70era arte estaltzen dute, eta tamaina guztietako enpresei, kooperatibei eta autonomoei irekita daude. Aurtengo deialdian 18 enpresak eskatu dute dirulaguntza hori. Dirulaguntza hau hasi zenetik 110 euskal enpresak eskatu dute.
