Nerea Melgosa sailburuak, gaur Radio Vitorian eskainitako elkarrizketa batean, asiloa eskatzeko prozesuan pertsona batek eman behar dituen pauso guztiak eta Euskadin prozesu horretan dauden Maliko pertsonen egungo egoera azaldu ditu. Nerea Melgosak ziurtatu du azken hilabeteetan Maliko 350 pertsona inguru igaro direla Eusko Jaurlaritzaren baliabideetatik (Oñati eta Tolosa). «Maliarrak etengabe iristen ari dira, egunero ari gara haiei harrera egiten eta baliabidetara bideratzen. Gu gure baliabideak jartzen ari gara pertsona horiek kalean egon ez daitezen, baina iristen garenera iristen gara, ez dugu plaza gehiagorik, gure baliabideak gainezka daude. Espainiako gobernuari pertsona horiek SAPITek (Nazioarteko eta Aldi Baterako Babeseko Harrera Sistema) dituen plaza libreetara eraman ditzala eskatzen diogu», gaineratu du Ongizate, Gazteria eta Erronka Demografikoko sailburuak. Melgosaren hitzetan, Gasteizko polizia komisarietako batek hitzorduak azkartu eta gero maliarrak sarriago etortzen hasi dira izapideak arinago lortu baititzakete. «Ez dugu ulertzen beste komisario batzuetan, Valentziakoan adibidez, ez dela hitzordurik ematen, eta beste batzuetan, Madrilen adibidez, bi hitzorduak aldi berean ematen direla. Komisariak behar bezala irekiko balira, pertsona maliarren fluxu hori ez litzateke emango», azpimarratu du.
TBDE Legea
Zurrumurruen aurkako estrategia-sarea babesten jarraitzeaz gain, Ongizate, Gazteria eta Erronka Demografikoaren Saila TBDE (Tratu-Berdintasuna eta Diskriminaziorik Eza) Lege berria izapidetzen hasi da. «Orain arte egindakoarekin nahikoa ez dela ikusten genuen, eta horregatik jarri dugu Berean sarea mahai gainean. Gorrotoa sor dezaketen baieztapen batzuk daudenean, salatu egin behar dira. TBDE Legea izapidetzean, egoera jakin batzuei izena jartzeko lanean ari gara, ohartarazpenak eta salaketak barne «, azaldu du Nerea Melgosak.
Udalekuak eta kanpalekuak
Eusko Jaurlaritza, hiru foru aldundiak eta EUDEL kanpalekuen eta aterpetxeen arloko jakinarazpen-protokolo berri bat prestatzen ari dira hamabostean behingo bileren bidez. Gaur bertan bilera tekniko bat izan da eta Melgosa sailburuaren iritziz lankidetza bikaina izaten ari da. Egungo protokoloarekin, elkarteek kanpalekuak jakinarazpen baten bidez jakinarazi behar zieten erakundeei. «Hemendik aurrera, jakinarazpen batetik erantzukizunpeko adierazpen batera igaroko gara. Garrantzitsua da kanpalekuetan zer egingo den, nola egingo den eta horren arduradunak nortzuk diren esatea» azaldu du Nerea Melgosak.
Elkarrizketan beste gai batzuk ere jorratu dira, hala nola jaiotza-tasa sustatzea edo emakumeen aurkako indarkeria.
Elkarrizketan beste gai batzuk ere jorratu dira, hala nola jaiotza-tasa sustatzea edo emakumeen aurkako indarkeria.
