Eusko Jaurlaritzako Mugikortasun Jasangarriaren Sailaren eta Donostiako Udalaren artean
Susana García Chueca Eusko Jaurlaritzako Mugikortasun Jasangarriaren sailburua eta Jon Insausti Donostiako alkate berria lehen aldiz bildu dira astelehen honetan, Eusko Jaurlaritza Gipuzkoako hiriburuan garatzen ari den proiektuak aztertze aldera. Topaketa horretan, bi administrazioek elkarlana sustatu dute, topoaren lurpeko pasabidearen eraginpean dauden hiriko zonen berrurbanizazio-lanetan aurrera egin dadin, 2026ko bigarren seihilekoan lurpeko saihesbidea martxan jarri aurretik.
Eusko Jaurlaritzaren Euskal Trenbide Sarea erakunde publikoa, Donostiako Udalarekin koordinatuta, ari da liberatutako espazioak berrurbanizatzeko lanak egiten, eta lanen ondoriozko eraginak pixkanaka arindu dira azken hilabeteotan. Lugaritz-Mirakontxa tartean okupatutako 12.332 metro karratuak dagoeneko libre daude. Bestalde, Mirakontxa eta Easo artean eraginpean dauden 19.952 metro karratuetatik 3.720 liberatu dira, gehienak hirigunean, eta oraindik okupatuta dauden gehienak Pio Baroja eta Morlanseko obra-etxolekin eta ahokatze-lanekin lotzen dira.
Obrak okupatutako espazioen azken liberazioa urriaren 29an izan zen, Xabier Zubiri plaza berriro irekitzearekin. Easo eta San Bartolome kaleetan eta San Martin kaleko bi zatitan, berriz, eraginaren arrasto guztiak ezabatu dira jada. Jarduketa horietan guztietan, lehentasuna izan da oinezkoen mugikortasuna erraztea, espazio garden eta espaloi zabalekin, eta garraio publikorako sarbidea erraztea.
Bestalde, une honetan San Roke, Osasuna eta Autonomia kaleak lotuko dituen igogailuaren obrak egiten ari dira, Aiete auzoa Amarako etorkizuneko lurpeko geltokiarekin zuzenean lotuko duena. Topaketan beste proiektu batzuk ere izan dira mintzagai, besteak beste: pasabidea eraikitzeari esker, Amarako trenbide-zabaltzaren 21.000 metro karratuak liberatzea —espazio hori bizitegi-erabileretarako eta Donostiako herritarrei zerbitzuak egiteko erabili ahal izango da—; eta Atotxako geltokiaren erabateko operatibotasuna —Espainiako Gobernuaren aginduz Euskal Trenbide Sarea ari da lan horiek egiten, eta datozen asteetan amaitzea aurreikusten da—.
Jon Insausti alkateak adierazi duenez, «urtebete baino gutxiagoan, Donostian, eraldaketa izugarria izango dugu Topoaren etorrerarekin, eta horrek lehentasunezko helburu bat erraztuko du: auzoak elkarren artean hobeto lotzea eta inguruko udalerriekiko lotura hobetzea. Gainera, datorren urtean, etorkizuneko hiri hori ikusteko aukera izango dugu, Easoko trenbidearen eremurako lehiaketarekin. Lehiaketa horri Saguesekoak, Loiolako kuartelekoak eta Illunbekoa gehituko zaizkio. Eusko Jaurlaritzaren laguntza dugu Donostia hiri erosoagoa eta atseginagoa izan dadin mugikortasunaren ikuspegitik, donostiarren bizi-kalitatea hobetzeko».
Bestalde, Susana García Chueca sailburuak topaketan aditzera eman duenez, “2026. urtea mugarria izango da Gipuzkoako hiriburuaren eta lurraldearen gainerakoaren mugikortasunean, Topo berria eta hiru geltoki berriak abian jartzearekin eta lur gaineko espazio berrien sorrerarekin, hirian bizi garen pertsonen bizi-kalitatea hobetuko baitute”.
