- Susana García Chueca Mugikortasun Jasangarriaren sailburuak ETSren 20. urteurrena ospatzeko ekitaldian adierazi duenez, Lugaritz-Easo saihesbidearen obrak aurrera doaz, 2026ko bigarren seihilekoan martxan jartzeko helburuz
- Topoa protagonista izan den Tabakalerako jardunaldian, García Chuecak nabarmendu du, sortu zenetik, ETSk 2.288 milioi euro inbertitu dituela euskal trenbide sistemaren hobekuntzan eta sendotzean
Eusko Jaurlaritzako Mugikortasun Jasangarriaren Sailak, Euskal Trenbide Sarearen bidez, etorkizuneko Erdialdea-Kontxa geltokiaren hormigoiztatzearen estaldura amaitu du dagoeneko. Susana García Chueca sailburuak Donostialdeko Topoaren lurpeko igarobidearen martxa ona nabarmendu du, erakunde publikoaren 20. urteurrena ospatzeko ‘ETS 20 años tejiendo Euskadi-20 urte Euskadi saretzen’ lelopean Tabakalera kultur zentroak hartu duen ekitaldian.
Mugikortasun Jasangarriaren sailburuak nabarmendu du aurrera egiten ari direla Lugaritz-Easo saihesbidearen eraikuntzan, 2026ko bigarren seihilekoan zerbitzuan jartzeko: “Aurrerapena agerian dago gainazalean, eta obra egiteko beharrezkoa izan den okupazioa ahalik eta adierazpen txikienera murrizten ari gara, baina zorupean ere etengabeko jarduerak gure mugikortasun ohiturak irauliko dituen obraren amaieratik gertuago egotea eragiten du”, azaldu du Garcia Chuecak.
Topo historikoa protagonista nagusi izan duen jardunaldian, Susana García Chueca sailburu eta ETSko presidenteak gogorarazi du duela 20 urte sortu zenetik erakunde publikoak 2.288 milioi euro inbertitu dituela euskal trenbide sistemaren hobekuntzan eta sendotzean, 930 Gipuzkoan.
Diru kopuru handi horrek Bilbo-Donostia, Topoa, Txorierri eta Amorebieta-Bermeo lineak modernizatzeko balio izan du. 2026an, Lugaritz-Easo saihesbideaz gain, Altza eta Galtazaraborda arteko trazadura berria ere martxan jarriko da, eta horrek, azken batean, Topo historikoa metro bilakatzea ekarriko du.
Baina, gainera, azken 20 urteetan, Bilboko metroaren 1. eta 2. lineen eraikuntza eta 3. linea martxan jartzea ere amaitu da. Gaur egun, sarea bikoizteko lanak ari dira egiten Gipuzkoako mendebaldean, eta aurrera doa Euskotreneko bidaiariak eta Renferen aldirikoak puntu berean lotuko dituen Loiolako Erriberako etorkizuneko aldagunearen eraikuntza-proiektua. Era berean, Bizkaian 5. linea eraikitzen eta 4. linea gauzatzeko proiektuak idazten ari dira. Gainera, Bilboko eta Gasteizko tranbiak proiektatu, eraiki eta zerbitzuan jarri dira, eta Zorrotzaurrera eta Zabalganara, hurrenez hurren, luzatzeko eraikuntza-proiektuak idazten ari dira.
García Chuecak adierazi duenez, “Euskal Trenbide Sareak 20 urte bete ditu, Euskadi kalitatezko mugikortasun jasangarriko sare publikoa ehuntzeko gaitasuna duten eskualdeen buru jartzen duen ibilbidearekin”. Eusko Legebiltzarrak aho batez onartu zuen 2004an Euskal Trenbide Sarea-Red Ferroviaria Vascaren Legea. Urte horretan bertan, lehen fasean, Metro Bilbaorako ingeniaritza-enpresa (Imebisa) izandakoaren ekipoan, egituran eta funtzioetan oinarrituta eratu zen ETS. Bigarren fasean, 2005ean, ETSri eskualdatu zitzaion Euskotrenen proiektu- eta obra-unitatea. 2006an amaitu zen prozesua, gaur egun erakunde publikoaren ustiapen-eremuan dauden Euskotreneko langileak eta bitartekoak eskualdatuta.
García Chueca sailburuak nabarmendu duenez, inbertitutako diru guztia “ez da trenen eta tranbien sarea hobetzeko eta handitzeko soilik, horren atzean espazioak berritzeko lan handia ere ezkutatzen da, bere iragan industrialarengatik eta kokapen estrategikoarengatik trenbide sare asko eta zaharrak dituen autonomia erkidegoan”.
Sortu eta bi hamarkada geroago, Euskal Trenbide Sareak, 90 geltokirekin Euskadi ekialdetik mendebaldera zeharkatzen duen 180 kilometroko trenbide-sarea kudeatzen eta mantentzen du, bai eta 20 kilometroko tranbia-sarea ere, guztira 542 milioi bidaiaren lekuko izan diren 44 geralekurekin.
Abiadura handiaren erronka
Era berean, Gobernu zentralak Eusko Jaurlaritzari aginduta, erakunde publikoak Euskal Autonomia Erkidegoko trenbide-sare berriaren (Euskal Y) plataforma egikaritu du Gipuzkoako lurralde historikoan abiadura handiko trenarentzat. Bertan Atotxako geltokia amaitzeko atarian dago, abiadura handiko trena hartzeko prest egongo den lehena. Aldi berean, ETSk Bilborako sarbideen eta Arkautiko lotunearen proiektuak idazten dihardu, eta urtea amaitu baino lehen, Bizkaiko hegoaldeko trenbide-saihesbidearen obrei ekingo die. Guztira, agindu bidez egindako lan horiek 2.000 milioi euroko inbertsioa eskatu dute, eta, Estatuaren titulartasuneko azpiegiturak direnez, Eusko Jaurlaritzak Gobernu Zentralari ordaindu beharreko Kupotik deskontatzen du aldez aurretik aurreratzen duen zatia.
García Chuecak bere konpromisoa berretsi du “ahal den neurrian lanak arintzeko, abiadura handiko trena Euskadiko mugikortasunaren elementu berria izan dadin eta beste erkidego batzuetarako edo Europako gainerako herrialdeetarako joan-etorrietan mugikortasun jasangarriagoranzko aldaketa sakona nahiz lehiakortasun ekonomikoaren plusa ekar dezan”.
Tabakaleran egindako jardunaldian, sailburuak, ETSren parte gisa euren ahaleginari eta dedikazioari esker Euskadi Europako abangoardian jartzeko gai izan diren pertsonen, gaitasun teknikoa eta konpromiso pertsonala balioetsi ditu, mugikortasuna hobetzeaz gain, gure udalerriak eraldatzen lagundu duen garraio publikoaren sistemari dagokionez.
