- Argitalpenak hiru lurralde historikoetan 2026rako programatutako 400 azokak biltzen ditu, bisitarientzako informazio praktikoarekin
- Azoken gidak Euskadiko nekazaritzari, abeltzaintzari eta arrantzari eusten diotenen lana ezagutzera gonbidatzen gaitu, haiek baitira Euskadiko lehen sektorearen etorkizuna bermatzen dutenak
Eusko Jaurlaritzako Elikadura, Landa Garapen, Nekazaritza eta Arrantza Sailak, HAZI Fundazioarekin lankidetzan, Euskadiko Nekazaritza, Abeltzaintza eta Arrantza Azoken 2026 Gida argitaratu du. Gida horrek lehen sektoreak hiru lurralde historikoetan egiten duen azoka-jarduera biltzen eta antolatzen du, bisitarientzako eta parte-hartzaileentzako informazio praktikoarekin. Argitalpena ekoizleentzako, tokiko administrazioentzako eta herritarrentzako erreferentzia gisa finkatu da, 400 azoka baino gehiago programatuta dauden urte batean.
Argitalpenak Euskadiko nekazaritza, abeltzaintza eta arrantzari eusten diotenen lana azokaz azoka ezagutzera gonbidatzen gaitu, horiek baitira euskal lehen sektorearen etorkizuna bermatzen dutenak.
Amaia Barredo Elikadura, Landa Garapen, Nekazaritza eta Arrantzako sailburuak azpimarratu du gida honekin Euskadiko lehen sektoreko azoken balio kulturala, ekonomikoa eta soziala nabarmentzen direla. «Urtean zehar egiten diren nekazaritzako, abeltzaintzako eta arrantzako 400 azoka baino gehiago aukera paregabea dira gure lurraldeak eskaintzen digun guztia gertutik bizitzeko, belaunaldien arteko topagunea eta etorkizunaren aldeko apustu partekatua» – zehaztu du sailburuak.
Gida horren bidez, Eusko Jaurlaritzak berretsi egiten du tokiko produktua, jasangarritasuna eta landa-dinamismoa sustatzeko konpromisoa, eta herritarrek kontsumo arduratsuaren bidez jokatzen duten paperean jartzen du arreta. Amaia Barredo sailburuak azpimarratu duenez, «bertako produktu fresko eta hurbilekoa aukeratzen dugunean, produktu hori ekoizten dutenei laguntza zuzena ematen ari gara, ahalegin horrek jarraipena izan dezan. Erosketa bakoitzaren bidez, landa-inguruneari bizia ematen, ingurumena babesten eta kalitatezko elikagaiak ziurtatzen laguntzen dugu«.
Euskadiko 2026ko Nekazaritza, Abeltzaintza eta Arrantza Azoken Gida eskuragarri dago formatu digitalean www.euskadi.eus/azokak web orrian, eta eskualde-bulegoetan, elkarteetan, erakundeetan eta administrazioetan banatuko da datozen asteetan.
