- Horrela, Eusko Jaurlaritzak Zumaiako portuan Astilleros Balenciagaren jardueraren jarraipena eta modernizazioa bermatzeko apustua egiten du
- “Emakida honek jarduera industriala eta enplegua sustatzea uztartzen ditu, portu-jabari publikoaren ingurumen, segurtasun eta kudeaketa estandarrak betetzeko eskakizunarekin batera”, nabarmendu du Amaia Barredo sailburuak
Eusko Jaurlaritzako Elikadura, Landa Garapen, Nekazaritza eta Arrantza Sailak Zumaiako portuan jabari publikoaren okupaziorako Balenciaga Shipyard enpresari emango zaion emakidaren baldintzak ezarri ditu. Emakida hori ontzigintza eta ontzien konponketa jarduerak garatzeko erabiliko da. Enpresak onartu beharko duen emakida-proposamen horrek beharrezko baldintza teknikoak, ekonomikoak eta administratiboak jasotzen ditu.
Emakidaren hasierako epea 10 urtekoa izango da, eta gehienez 50 urtera arte luzatu ahal izango da. Halaber, 190.000 euroko ustiapen-bermea aurkezteko betebeharra eta dagokion kanonen urteko ordainketa dakar, 361.887,73 eurotan (BEZa barne) zenbatetsia, behin betiko neurketa topografikoaren mende.
Emakidadunak jabari publikoa soilik baimendutako erabileretara bideratu beharko du, eta instalazioen mantentzea, kontserbazioa eta segurtasuna bermatu, bai eta aplikagarri diren portu, ingurumen, udal eta zerga-arau guztiak bete ere.
“Zumaiako Astilleros Balenciaga gure historia industrialaren eta itsas proiekzioaren parte da. Emakida honekin haren jarraipena, modernizazioa eta lehiakortasuna bermatzen ditugu, aldi berean portu-ingurunearen errespetua eta ingurumen eta segurtasun-estandarrak betetzen direla ziurtatuz”, azpimarratu du Amaia Barredo sailburuak.
Enpresak 2025eko azaroaren 19an aurkeztu zuen eskaera, estrategikoki kokatutako portu-instalazioetan bere jarduera industrialarekin jarraitzeko helburuarekin; instalazio horiek kanalerako sarbide zuzena eta Kantauri itsasorako irteera dute. Aurreikusitako emakidak gutxi gorabehera 22.400 metro koadroko azalera hartzen du, eta bertan kokatzen dira 110 metroko luzera arteko ontzi metalikoak eraikitzeko beharrezko azpiegiturak.
Baldintzen jakinarazpena jaso ondoren, Astilleros Balenciagak 10 eguneko epea izango du emakida berariaz onartzeko edo alegazioak aurkezteko.
