- 850 metro kolektore eraiki eta martxan jarri ondoren, Ziako errekastoaren arroko hiri- eta industria-isurketak Adunako araztegira bideratzen dira jada
- 9000 m²-ko industria-jarduerako azaleran sortutako isurketak ere bildu dira: Adunako araztegira bideratzeko
Andoaingo Ziako errekastoan, uholdeetatik babesteko eta saneamendua hobetzeko obrek lortu berri dute errekastoaren bidez Oria ibaira egiten zen isurketa nagusietako bat ezabatzea. Egindako jarduketari esker, orain arte tratamendu nahikorik gabe ibilgura iristen ziren 5200 pertsonako populazio baliokideko hondakin-urak Oria Erdiko hodi-biltzailera bideratzen dira, Gipuzkoako Urak partzuergoak kudeatzen duen Adunako araztegira.
Saneamendu-jarduketa: kolektore orokor berria eta bigarren mailako sarea
Egoera konpontzeko, Eusko Jaurlaritzako Industria, Trantsizio Energetiko eta Jasangarritasun sailera atxikitako URAk saneamenduko jarduketa integral bat egin du, Ziako errekastoak jasotako arroko hiri- eta industria-isurketa guztiak jaso eta Oria erdialdeko hodi-biltzailera bideratzeko.
Obren trazadura Gudarien Hiribidetik (Super Amara supermerkatuaren inguruan) Ama Kandida etorbidearen erdiraino egingo da, Orbelan enpresaren parean (bertan konektatu egiten da sarearekin).
Esku-hartzeari esker, kolektore nagusiko 1.960 metro eraiki dira, eta kolektore sekundarioetako 2.890 metro (ur beltzak eta euri-urak). 4.850 metro kolektore guztira.
Azpiegitura horri esker, gainera, behar bezala bildu dira isurketa guztiak: Erroitz, Plazaola eta Aranzibia goiko auzoetatik edo Aranaztegi eta Ziako industrialdeetatik datozenak barne. Hartara, Oriara egiten ziren zuzeneko isurketa nabarmen horiek behin betiko kenduz.
Oria hobetzeko eta kolektore bateratu gisa funtzionatzen zuen erreka bat berreskuratzeko inbertsioa
Saneamendu-jarduerak 8 milioi euroko inbertsioa izan du. Esku-hartze horrekin, urrats erabakigarria egin da Ziako errekaren egoera ekologikoa hobetzeko. Obra martxan jarri arte, Oria ibaiaren arroan presio kutsatzailearen puntu nagusietako bat zen. Orain, presio hori murriztu da, eta hondakin-urek ingurune naturalera itzuli aurretik tratamendu egokia jasotzen dutela ziurtatu da.
Nondik gatoz?
Ziako errekastoaren isurialde-arroaren saneamendu-sarea errekastoan bertan bermatzen zen historikoki. Ubidea ibilgu hidrauliko gisa eta hondakin-urak nahiz jariatze-urak husteko kolektore bateratu gisa funtzionatzen zuen aldi berean. Errekastoa, neurri handi batean, Orian isurtzen den bokaleraino kanalizatuta igarotzen zen; eta hondakin-urak (etxekoak eta industriakoak) behar besteko tratamendurik gabe jasotzen zituen. Ubideak zuzenean kolektore unitario gisa jarduten zuen tarte batzuetan.
Informazio gehiago:
- Jarduketaren azalpen-infografia:https://www.uragentzia.euskadi.eus/contenidos/documentacion/infografias/eu_def/adjuntos/Grafiko-estatikoa-Andoain.pdf
- Jarduketaren trazadura eta esparrua ezagutzeko hegaldia (obra gauzatu aurreko hegaldia):https://www.youtube.com/watch?v=G1T4UfJjoo8&t=253s
