Ertzaintzak europar jatorriko bi gizon atxilotu zituen atzo Donostian, beren jatorrizko herrialdeko dokumentuez gainera, Europako beste herrialde bateko dokumentazio faltsua eramateagatik.
Atzo, asteartea, eguerdiko hamabiak baino lehentxeago, Gipuzkoako erdialdeko kale batean, Ertzaintzaren patruila batek ikusi zuen ertzainak ikustean martxaren norabidea aldatu zutela hiru gizonek.
Agenteek identifikatu egin zituzten. Batek bere NAN espainiarra erakutsi zuen, beste batek Europako herrialde bateko pasaportea eta hirugarrenak esan zuen ez zeramala dokumentaziorik eta inguruan aparkatuta zuten autoan zuela.
Jarraian, azaleko miaketa egin zieten, eta pasaportea zeraman gizonari, jakaren poltsikoan, Europako beste herrialde bateko bigarren pasaporte bat aurkitu zioten, bere argazkiarekin baina lehenengo pasaportekoa ez zen beste izen batekin, bai eta izen bera zeraman beste nortasun-agiri bat ere.
Gero, agenteek pertsona horien ibilgailua miatu zuten, eta dokumentazioa ez zeraman gizonaren jatorrizko dokumentazioa aurkitu zuten bertan. Horren ondorioz, pertsona hori zorrotzago miatu zuten, eta bere lagunari bezala, Europako beste herrialde bateko pasaporte bat aurkitu zioten, bere izenarekin baina jatorrizko dokumentaziokoa ez zen beste izen batekin.
Europako bigarren herrialde horretako dokumentazioa eta pasaporteak faltsuak izan zitezkeelakoan, eta ezkutatzeko asmo argia zutela ikusita, bi gizonak, 27 eta 65 urtekoak, atxilotu zituzten, dokumentuak faltsutzea leporatuta.
Atxilotuak polizia-egoitzara eraman zituzten zegozkion eginbideak betetzeko, eta epailearen eskuetan noiz jarriko zain daude.
Konfiskatutako dokumentazioa Ertzaintzako Polizia Zientifikoak aztertuko du, faltsua den jakiteko.
