Egoaizia eta Etiopiako 4yBIN erakundeek bertako GKE humanitarioak formatzeko zentro bat jarri dute martxan Mekelleko Unibertsitatearekin batera
Gaur goizean, Egoaizia euskal erakundearen eta 4YBIN Etiopiako elkarteko ordezkariak eLankidetza-Lankidetzarako eta Elkartasunerako Euskal Agentziaren egoitzan egon dira. eLankidetza bi erakunde humanitarioei laguntza ematen ari die Mekelleko Unibertsitatean, Tigray eskualdean, Ikasketa Humanitarioen Zentro bat sortzeko. Eskualde hau bereziki kaltebera da, gerra ziklikoek eta hondamendi naturalek krisi humanitario luzeak eta ahaztuak eragiten baitituzte.
2020an, Etiopiako iparraldean gerra piztu zenetik, Tigrayk XXI. mendeko gerrarik suntsitzaile eta isilenetako bat bizi izan du. 600.000 pertsona baino gehiago hil dituzte, eta gutxienez 120.000 emakumek eta neskatok sexu-indarkeria sistematikoa jasan dute. Gizateriaren aurkako krimenek, desplazamendu masiboek, goseteak eta komunikabideen isiltasunak markatutako krisi humanitarioa da.
Gerra piztu zenetik, nabarmen igo da nazioarteko eta tokiko erakundeen kopurua. Ikerketa Humanitarioen Zentroak GKE horiek prestatu nahi ditu, egungo krisian erantzun eraginkorragoa eta koordinatuagoa emateko. Horretarako, aipatutako bi erakndek ikasketa humanitarioei buruzko prestakuntza-programa bat jarri nahi dute abian. Gainera, ekimenak balioko du ikerketa sustatzeko komunitatearen parte-hartzearekin eta krisiaren kausekin lotutako eragin politiko eta sozialerako sareak sortzeko.
eLankidetzaren laguntzaz gain, zentroak Fernando Almansaren aholkularitza jasotzen du, programa humanitarioen kudeaketa estrategikoan esperientzia duen aholkularia, bai eta Deustuko Unibertsitateko NOHA ekintza humanitarioko master-programaren lantaldearena ere.
Erakusketa eta dokumentala
Egoaiziak aurkeztuko du “BUNA: Isiltasunaren osteko ahotsak” erakusketa Eibarren, ekainaren 2tik 27ra Arrate Kultur Elkartean.
Inaugurazio ofiziala ekainaren 5ean izango da, 18:00etan, eta Egoaiziaren 25. urteurreneko jarduera-programaren parte izango da. Ekitaldian erakusketaren bisita gidatua eta laburmetraiaren proiekzioa egingo dira. Ondoren, Kunom Hailu, eta Iñaki Luis, dokumentalaren zuzendaria, izango dira solasaldian parte hartzen. Ekitaldia ixteko, Etiopiako janari tradizionala eskainiko da, eta kafe-zeremonia autentiko bat egingo da zuzeneko prestaketarekin, emakume etiopiar baten eskutik.
