Trenbide-hesi hori kentzeak udalerriaren erdigunea biziberritzea erraztuko du
Eusko Jaurlaritzako Mugikortasun Jasangarriaren Sailaren esku dagoen Euskal Trenbide Sarea erakunde publikoaren kontratazio-batzordeak 118.992 euroan esleitu dio Eptisa Cinsari Pasai Antxoko topoaren biaduktua eraisteko eraikuntza-proiektuaren idazketa. Ingeniaritza-enpresak 6 hilabeteko epea izango du lana egiteko.
Azken urteotan, Susana García Chuecak zuzentzen duen Sailak Donostia-Hendaia trenbidea bikoizteko proiektua bultzatu du. Plan hori ondoz ondoko tarteetan gauzatu da, linearen gaitasun operatiboa handitzeko eta, ondorioz, metropoli-eremuko trenbide-eskaintza hobetzeko.
Mugikortasun Jasangarriaren sailburuak azaldu duenez, Pasai Antxo banatzen duen biaduktua eraistea “lehentasuna izan da niretzat eta nire aurretik aritu zen Iñaki Arriolarentzat. Euskadin leku gutxitan du Antxon bezainbesteko presentzia trenbideak, eta horregatik pozten nau ETStik aurrerapausoak ematen aritzeak, Altza eta Galtzaraborda arteko lurpeko pasabidearen obra amaitzen dugunean eta martxan dagoenean, biaduktua eraisteko eta herritarren erabilerarako eta gozamenerako libre utziko ditugun espazioak urbanizatzeko bidean aurrera egin ahal izateko”.
2016aren amaieratik martxan dago Herrera eta Altza arteko tartea. 2021eko azaroan hasi ziren Altza-Galtzaraborda segmentuko obrak, eta horien artean dago Pasaiako erdigunean gaur egun egiten ari den lurpeko geltoki berriaren eraikuntza. Azpiegitura hori martxan jartzen denean, datorren urtean zehar, aurreikuspenen arabera, terminal zaharra eta zubibidea erabilerarik gabe geratuko dira eta ez dute zentzurik izango. Hori dela eta, Mugikortasun Jasangarriaren Sailak hura eraistea erabaki zuen.
Zubibidea 350 metro inguru da luze, eta bi tarte bereizi ditu: lehena etxebizitzen artean dago, eta bigarrena Molinao ibaiaren gainean, eta azken hori zubi gisa ere erabiltzen da. Lizitaziora atera den proiektuak alternatiben azterlan baten bidez zehaztu beharko du zein den Pasai Antxoko hirigunean eta paisaian oztopo fisiko hori kentzeko soluziorik onena, eta aztertu beharko du ea eraisteak ingurune urbanoenari bakarrik eragingo dion, etorkizunean ibaiaren gaineko azpiegitura beste erabilera batzuetarako mantenduz, ala eraisketak bigarren tarte hori ere hartuko duen.
Era berean, txosten horrek gaur egun zubibideak eta trenbidearen geltoki garaiak hartzen duten espazioaren ondorengo berroneratzea proposatu beharko du. Hau da, eremu horretarako urbanizazio mota egokiena definitu beharko du.
Testuinguru horretan bertan, orain dela gutxi ETSk 424.983 euroan esleitu dio Eptisa Cinsa ingeniaritza-enpresari Errenteriako Galtzaraborda eremuan trenbidea integratzeko eraikuntza-proiektuaren idazketa, 12 hilabeteko epean egin beharreko lana. Trenbideak estaltzeak murriztu egingo du trenak eremu horretan duen inpaktu bisuala eta akustikoa.
