- 2025eko bigarren seihilekoan, Kataluniaren testigua jaso ondoren eta Danimarkaren presidentetzapean
- Òscar Ordeig consellerra eta Amaia Barredo sailburua izan dira funtzioen eskualdaketaren protagonistak
- Amaia Barredo Bruselan eta Luxenburgon datozen hilabeteetan egingo diren Nekazaritza eta Arrantza Kontseiluetan izango da
Euskadik Estatuko itsasertzeko autonomia-erkidegoak ordezkatuko ditu arrantzaren arloan Europar Batasunaren Ministroen Kontseiluan eta horren lan-taldeetan 2025eko bigarren seihilekoan, Kataluniaren testigua hartu ondoren eta Danimarkaren presidentetzapean. Òscar Ordeig Kataluniako Gobernuko Nekazaritza, Abeltzaintza, Arrantza eta Elikadurako consellerra eta Amaia Barredo Eusko Jaurlaritzako Elikadura, Landa Garapen, Nekazaritza eta Arrantzako sailburua izan dira protagonistak egikizunak eskualdatzeko gaur goizean Bartzelonan egin den ekitaldian.
Amaia Barredok adierazi duenez, “une zailak dira arrantzaren sektorearentzat eta itsasertzaren garapen osoarentzat, hemen eta Europar Batasun osoan. Orain hasiko dugun seihilekoko koordinazioaren kudeaketan, penintsulako itsasertz osoko, Mediterraneoko eta Atlantikoko, behar, kezka eta ideia bakoitza detektatzea espero dugu, gero Europar Batasuneko Ministroen Kontseiluari eta lantaldeei helarazi ahal izateko”.
Kataluniaren aldetik, ekitaldian Cristina Massot Departamentuko idazkari nagusia eta Antoni Espanya Itsas Politikako eta Arrantza Jasangarriko zuzendari nagusia ere izan dira. Euskal Autonomia Erkidegoaren aldetik, Leandro Azkue Arrantzako eta Itsasertzaren Garapeneko sailburuordeak parte hartu du Barredo sailburuarekin batera arrantza-politikak aztertzeko aurretik egin den bileran.
Flotei babesa
“Espero dut Jacob Jensen Danimarkako Elikadura, Nekazaritza eta Arrantzako ministroaren jarduera eraginkorra izango dela eta Luis Planas ministroak gure proposamenak babestuko dituela. Bai REPERek bai autonomia-erkidego bakoitzak badakite Eusko Jaurlaritzan ekarpen eta iradokizun bakoitza jasoko dugula, eta are gehiago ekarpen edo iradokizun hori guztien onerako bada; ez bakarrik estatukoen onerako, baizik eta baita Europar Batasun osoko eta gure itsasontzien arrantza-lekuetako arrantzaren jasangarritasunerako ere”, azpimarratu du Barredok Kataluniako Gobernuaren egoitzan.
Amaia Barredoren iritziz, “bai Mediterraneoan, sare berriekin, arrasteko uretako ateekin eta hondoak zaintzearekin sartu berri diren berrikuntzekin, bai Atlantikoan, funtsezkoa da ozeanoetako bizitzaren eta arrantzako lanaren etorkizuna bermatuko duen jasangarritasuna, elikadura osasungarria eta kalitatezkoa bermatuko duena”.
“Hain zuzen ere, Ipar Atlantikoan Europar Batasunak arreta berezia jarri behar du harrapaketa guztiak eta espezieen zaintza betetzeko. Era berean, xehetasunez jarraitu beharreko beste gai bat da Arrantza Politika Bateratua: 2026tik aurrera berrikustea eta ezartzea”, aipatu du Barredo sailburuak.
Sailburuak nabarmendu duenez, “Euskadin arreta berezia eskaintzen diogu lehen sektorean belaunaldien arteko erreleboa bermatzeari, bereziki arrantzan eta itsasertzaren garapenean, eta hor, zalantzarik gabe, denok bat etorriko gara. Ziur nago arrantza gertutik kudeatzen dugun herrialdeen eta eskualdeen batasunak eragin positiboa duela Europako, Mediterraneoko nahiz Atlantikoko, arrantza-politiketan”.
Ekonomia urdina
Barredok berriz ere eskerrak eman dizkio Kataluniari “egin duen lanagatik”, eta harreman zuzena eskaini du bigarren hiruhilekoan. “Nahiago nuke, Ordeig consellerra, abenduan egingo den Europar Batasuneko Arrantza Ministroen Kontseiluak 2026rako arrantzako agertoki guztiz gogobetegarria definituko balu: gure floten ekonomiarako, haiekin lotutako itsasertzeko industrietarako eta ekonomia urdina deitzen dena erabat garatzeko”.
Ordeig consellerrak adierazi duenez, Kataluniako ordezkaritzak, Nekazaritza Ministerioaren bidez, azaldu du “arrasteko flotak duen garrantzia gure kofradien bideragarritasun ekonomikoan, bai eta Europak eskatzen dizkigun jasangarritasun-eskakizunetara egokitzeko egin duten ahalegina ere”. Gainera, Ordeigek nabarmendu duenez, “Kataluniako arrasteko flotak % 100ean betetzen du sare-aldaketagatiko hautuzko arrantza, eta gero eta uretako ate gehiago ditu ezarrita itsas hondoak higatzea saihesteko”.
Bere hitzaldian Kataluniako kontseilariak nabarmendu duenez, Bruselan egoteko aukerari esker “sektorearentzat hausnarketarako eztabaida garrantzitsuak sartu ahal izan dira, hala nola, Arrantza Politika Bateratua (APB) 2025etik aurrera. Politika horiek kontuan izan beharko dute ez dagoela inolako oinarririk Kataluniako urei dagokien arrantza kudeatzeko eremuan larrialdiko neurri zuzentzaileak hartzeko, eta presaz aztertu behar direla arrantza-stockak ebaluatzeko metodologia ofizialak”.
2026rako aurreikuspenak
Bestalde, Ordeig consellerrak adierazi du seihileko honetan lortu dela “2025erako arrantza-aukerak kautelaz 2024ko mailetan mantentzea, baina igo egin beharko lirateke, 2026rako onartuko direnak bezala, dagozkien konpentsazio-mekanismoak barne. Era berean, ganba-harrapaketen mugak ere igo beharko lirateke”.
Amaia Barredo sailburua Bruselan eta Luxenburgon datozen hilabeteetan egingo diren Nekazaritza eta Arrantza Kontseiluetan izango da. Europar Batasunean hartzen diren erabaki askok eragiten diete autonomia-erkidegoen eskumenei.
EBrekin Lotutako Gaietarako Konferentziaren (CARUE) akordioek aukera ematen dute autonomia-erkidegoek zuzenean parte hartzeko autonomia-erkidegoen eskumeneko gaiak eztabaidatzen dituzten Kontseiluko erakundeetan eta lan-taldeetan: Enplegua, Gizarte Politika, Osasuna eta Kontsumoa (EPSCO); Nekazaritza eta Arrantza; Ingurumena; Hezkuntza, Gazteak, Kultura eta Kirola; eta Lehiakortasuna.
Arrantzaren arloa ordezkatuko duen autonomia-erkidegoa, orain Euskadi, sei hilabeterako izendatzen da, dagokion Konferentzia Sektorialak hautatutako txandakatze-irizpideen arabera; izan ere, CARUEren akordioak ez du txandakatze-irizpide bakarra ezartzen.
Lantaldeak
CARUEren akordioek aurreikusten dute autonomia-erkidegoek Kontseiluaren bilerak prestatzeko fasean ere, hau da, Kontseiluko erakundeei dagokien COREPERean eta lantaldetan ere, parte hartuko dutela.
Autonomia Erkidegoen Jarrera Bateratua lantzeko Kontseilurako gaiak proposatzea autonomia-erkidego koordinatzaileari dagokio. Autonomia-erkidegoen “jarrera bateratua” autonomia-erkidegoek adosten dute aurretik, eta behar bezala hartu behar da kontuan negoziazio-prozesu osoan zehar.
