Arantza Atutxa, Ingurune Naturala eta Nekazaritza Sustatzeko foru-diputatua, Cecobi, BilbaoDendak eta BizkaiDendak entitateen ordezkariekin bildu da. Entitateok Bizkaia Repara-ren bigarren edizioa euren bazkideen artean hedatzen laguntzen dute. Bileran hauek parte hartu dute: Cecobi-tik, María López Negrete, lehendakaria, eta Marta Fernández, idazkari nagusia; Bilboko Merkataritza Ganberatik, Antonio Seco, Bilboko Merkataritza, Industria, Zerbitzu eta Nabigazio Ganberako Merkataritza eta Ekintzailetzako zuzendaria; BilbaoDendak-tik, Jon Zárate, gerentea, eta BizkaiDendak-tik, María Irigoyen, eta Sabin Arana, Eusko Jaurlaritzako Merkataritza Bulego Teknikokoa.
Bizkaia Repara Bizkaiko Foru Aldundiaren ekimen bat da, produktuen konponketa sustatzen eta hondakinen prebentzioan laguntzen duena. Lehen edizioaren emaitzen ondoren (14 tona artikulu inguru konpondu ziren eta eskuragarri zeuden bonuen % 93 trukatu ziren), bigarren edizio honek partaidetza-eskema berari eusten dio.
Kanpaina bi fasetan gauzatzen da. Lehenengoa irailaren 15etik urriaren 6ra irekita dago, eta bitarte horretan konponketa-establezimenduek bat egin dezakete ekimenarekin. Bigarren fasea azaroaren 5etik aurrera hasiko da, eta herritarrei zuzenduta dago; hala, 10 euroko bonuak trukatu ahal izango dituzte parte hartzen duten saltokietan, hainbat sektoretako produktuak konpontzeko.
Bizkaia Repara Bizkaiko Hondakinak Prebenitzeko eta Kudeatzeko 2030erako Planaren parte da. Plan horrek konponketa, berrerabilpena eta murrizketa sustatzen ditu hondakinen prebentzioan aurrera egiteko funtsezko ardatz gida.
