Harremanetarako plataformen bidezko iruzurretan eta hertsapenetan espezializatutako talde kriminal bat desegin du Ertzaintzak, Estatu osoan 300 biktima baino gehiago izan dira eta Gipuzkoako hiriburutik jarduten zuen. Talde kriminal horrek 55.000 eurotik gorako iruzurra egin zien kaltetuei, sexu-zerbitzuen iragarkiak faltsutuz harremanetarako plataformetan, biktimak erakartzeko eta presioen eta mehatxuen bidez ordainketak eskatzeko. Lau pertsona atxilotu dituzte, hiru gizon eta emakume bat, eta iruzurraren eta derrigortze jarraituen delituak eta talde kriminaleko kide izatea leporatu dizkiete. Biktima gehienak Kanarietako eta Galiziako autonomia-erkidegoetakoak dira, bertan argitaratu baitzituzten iruzurrezko iragarki gehienak.
Ertzaintzak talde kriminal bat desegin du, sexu-edukia duten lineako harremanetarako edo zitetako plataformetan iruzurrezko iragarkiak argitaratzearen bidez, lurralde nazional osoan 300 biktimari baino gehiagori estortsio egin diona. Operazioan lau pertsona atxilotu dituzte, hiru gizon eta emakume bat, Donostialdean bizi direnak eta ahaidetasun eta kidetasun loturak dituztenak.
Donostiako Ertzain-etxeko agenteek egin duten ikerketa joan den otsailean hasi zen, taldeko burua atxilotu zutenean Gipuzkoako hiriburuan adingabe bati sexu-erasoa egitea leporatuta. Gertaera hori ikertzen ari zirenean, ikertzaileek egiaztatu zuten pertsona horrek erabiltzen zuen sare sozial baten profilean eduki erotiko handiko emakumeen argazkiak agertzen zirela eta argazki horiek hainbat denboraz behin aldatzen zirela.
Agenteek egiaztatu zuten akusatuaren abonatu-zenbakiarekin harremanetarako iragarkien erreferentziak agertzen zirela, eta horietan “escort” zerbitzuak eskaintzen zirela.
Gipuzkoako hiriburuko 1 zenbakiko Instrukzio Epaitegiak ikuskatuta egindako ikerketari esker, delitu sarea osatzen zuten pertsonak identifikatzeko aukera eman du eta 2022ko irailetik jarduten zuen delitu-sare horretan. Sare horren bidez biktimei iruzur eta hertsapen jarraitua egiten zitzaien harremanetarako plataformetako engainuen bidez, eta ordainketa elektronikoko sistemen, banku-transferentzien eta kutxazainetako ordainketen bitartez berez existitzen ez ziren zerbitzuengatik ordaintzera behartzen zituzten. Iruzurrak gutxienez 300 pertsonari eragin die Estatu osoan.
Talde kriminalak berrogeita hamabost mila eurotik gorako irabazi ekonomikoa lortu du antza, eta Kanariar Uharteak eta Galizia dira eremurik kaltetuenak, sareak horietan argitaratu baitzituen iruzurrezko iragarki gehienak.
MODUS OPERANDIA
Delitugileek iragarki faltsuak argitaratzen zituzten harremanetarako edo zitetako plataformetan, horien bidez sexu-zerbitzuak edo -edukiak eskainiz, batez ere gizonentzat. Interesdunak eduki horietan sartzen zirenean eta harremanetarako zenbaki bat ematen zutenean, beldurtzeko mezuak jasotzen hasten ziren berehalako mezularitzaren bidez, inoiz egin ez ziren zerbitzuengatik aurrerapenak edo ordainketak eskatuz.
Mezuetan, biktimak hertsatzen zituzten edo xantaia egiten zieten, euren elkarrizketak edo kontratatutako zerbitzu-motak gertuko senideei zabalduko zizkietela esanez. Biktima askok ordaindu egiten zuten lotsagatik edo errepresalien beldurrez.
Ertzaintzaren ikerketan lotutako banku-mugimenduak, erabilitako telefono-lineak eta kontaktuak egiteko erabili ziren gailuak aztertu zituzten. Analisi teknikoaren bidez deiak aurreordainketako hamabi bat telefono-linearekin lotu ahal izan ziren, horiek guztiak mugikor ezberdinetan aktibatuak eta polizia-miaketa zailtzeko erabiliak. Gainera, egiaztatu zuten ordainketak jaso zituzten zenbakiak talde kriminaleko kideen kontuetakoak zirela eta antzeko beste salaketa batzuekin lotuta zeudela.
Kasu askotan, modu hierarkizatuan jarduten zuen delitu-egitura antolatua zuen taldeak zerbitzuaren zati bat aurretik ordaintzea eskatzen zuen, eta, gero, ordainketa osoa egitea eskatzen zuen hainbat aitzakia jarrita, etekin ekonomiko handiagoa lortzeko.
Lau atxilotuei, hiru gizon ,19 eta 21 urte bitartekoak, eta emakume bat, 21 urtekoa, erakunde kriminal bateko kide izatea leporatzen diete eta iruzurraren eta hertsapen jarraituen delituak leporatu dizkiete. Akusatuek polizia-egoitzan jarraitzen dute, eta beharrezko eginbideak amaitutakoan jarriko dituzte agintari judizialaren eskuetan.
