- Txertaketa Indartzeko Bilboko Zentroa bihar irekiko da, ostirala, 08:00etatik 20:00etara, 15 egunez, asteburuak barne, eta aurretiko hitzordurik gabe
- Zentro horretako immunizazio-aurreikuspenen arabera, 1.000 txerto inguru jarriko dira egunean
Osakidetzako ospitaleak eta larrialdi-zerbitzuak gripe-kasuen gorakada nabarmena erregistratzen ari dira azken asteetan, batez ere Bizkaian. Urriaren 13tik 19ra bitartean bildutako datu asistentzialen arabera (2025-2026 kanpainako 42. astea), 506 gripe-kasu identifikatu dira, iazko aldi bereko 166 kasuak eta duela bi urteko 105 kasuak baino askoz gehiago.
Guztira, kanpainaren lehen hiru asteetan 1.120 kasu zenbatu dira, aurreko kanpainetan baino bi aldiz gehiago. Igoera hori ikusita, gripea lehenago iritsi da aurten, eta kutsatzeen kurba aurreratzen egon daiteke.
Inpaktua ospitaleetan islatzen da. Aztertutako astean 45 ospitaleratze jakinarazi ziren gripeagatik, eta aurreko urteetan 5 eta 6 izan ziren, hurrenez hurren. Orain arte, guztira 131 sarrera izan dira, baina aurreko kanpainetan kopuru hori ez zen iritsi azaroaren amaierara arte. ZIUko ospitaleratzeetan ere igoera txiki bat ikusi da, 6 kasu metatu baitira, baina gaur egun pertsona bakarra dago zainketa intentsiboetan ospitaleratuta, Bizkaian.
Lurraldeka, Bizkaiak du intzidentziarik handiena (74,35 kasu 100.000 biztanleko), ondoren Gipuzkoak (32,10) eta Arabak (9,85). Osasun Sailak eta Osakidetzak epidemiologia- eta asistentzia-datuen eguneroko jarraipena egiten dute. Zaintza epidemiologikoak adierazten duenean bi lurralde horietan ere kutsatzeen kopuruak azkar egiten duela gora, Osakidetza lanean ari da txertaketa masibo bat egiteko lurralde bakoitzeko errefortzu-zentroetan.
Larrialdietan, gripeari egotz dakizkiokeen kasuak guztizkoaren % 0,80 dira, eta Santa Marina Ospitaleak izan du ehuneko handiena (% 3,71). Ospitaleetako batez besteko okupazioa % 78,20koa da, nahiz eta zentro batzuetan (Santa Marinan, adibidez) okupazioa % 90etik gorakoa izan.
Osasun-zerbitzuek gripearen bilakaeraren etengabeko arretari eta jarraipenari eusten diote, eta herritarrei gogorarazten zaie oso garrantzitsua dela txertoa jartzea eta osasun-zentroarekin kontsultatzea gaixotasunarekin bateragarriak diren sintomak badituzte.
Txertaketa Indartzeko Zentroa Bilbon
Hori dela eta, Eusko Jaurlaritzako Osasun Sailak eta Osakidetzak gune berri bat prestatuko dute bihartik aurrera, ostirala, Bilbon, zehazki La Casillan, Bizkaiko herritar guztiei gripearen aurkako txertoa jartzeko. Ez da beharrezkoa izango hitzordua eskatzea Txertaketa Indartzeko Zentro honetara bertaratzeko.
Helburua da biztanleriaren immunizazioa bizkortzea, arnas gaixotasun horren intzidentzia aurreko kanpainekin alderatuta aurreratuko dela aurreikusten baita, Saileko zaintza epidemiologikoko zerbitzuek antzeman duten bezala. Zentro horretan, COVID-19aren aurkako txertoa ere eskainiko zaie txertoa jaso nahi duten 75 urtetik gorako pertsonei eta arrisku-kolektiboei.
Gune berria txertaketarako ohiko baliabideei gehitu zaie, besteak beste, Lehen Mailako Arretako osasun zentroei. Bihartik aurrera (urriaren 24a, ostirala) egongo da erabilgarri, 08:00etatik 20:00etara, asteko egun guztietan, asteburuetan barne, eta datozen 15 egunetan. Txertoa hartu nahi duten pertsona guztiak zuzenean bertaratu ahal izango dira, aldez aurretik hitzordua hartu beharrik gabe.
Osakidetzako 27 profesionalek osatutako talde batek —15 erizain, 3 TCAE, 3 zeladore eta 6 administrari laguntzaile— bi txandatan lan egingo du, bertaratzen diren pertsona guztiak artatzeko. Zentro horretako immunizazio-aurreikuspenen arabera, 1.000 txerto inguru jarriko dira egunean.
Era berean, osasun-zentroetan eta anbulatorioetan txertaketak erritmo onean jarraitzen du. Orain arte, Lehen Mailako Arretako osasun-zentroetako hitzorduen erritmoa bizkorra izaten ari da. Gaur egun, urriaren 6an kanpaina hasi zenetik, Osakidetzak 320.607 hitzordu erregistratu ditu txertaketarako.
