- Araudi berriak segurtasun juridikoa indartzen du, kooperatiben esparrua egungo erronketara egokitzen du eta enpresa eredu berrien partehartzea eta garapena errazten ditu
Ekonomia, Lan eta Enplegu Sailak proposatuta, Gobernu Kontseiluak Euskadiko Kooperatiben Legearen Erregelamendu berria onartu du gaurko bileran, gizarte ekonomia sustatzeko. Hala, euskal kooperatibismoak tresna juridiko berritua du orain, kooperatiba sozietateen egungo beharrei erantzuten diena.
Araudi berriak kooperatiben lege esparrua eguneratzen eta garatzen du, eta enpresa eredu berriak sustatzen ditu, gizarte ekonomiaren motor gisa duen eginkizuna indartuz eta erregelamendua gero eta globalizatuagoa eta aldakorragoa den ingurune baten erronketara egokituz.
Berritasun nagusien artean, sozietate eta ekonomia araubidearen funtsezko alderdiak arautzen ditu; hala nola, jarduera kooperatibizatuan parte hartzea, sozietatean baja ematea, ekarpenen itzulketa, galeren egozpena eta administratzaileen ordainsaria. Gainera, figura juridiko berriak finkatu ditu garatze bidean diren sektoreetan kooperatibak sortzea errazteko; gobernu organoetan berdintasuna eta presentzia orekatua ere sustatzen ditu.
Testu berriak, halaber, hondamendi naturalen ondorioz sortutako egoerak arintzeko, hezkuntzarako eta sustapen kooperatiborako (COFIP) nahitaezko ekarpenaren aukera jasotzen du, besteak beste, orain gutxiko izandako DANAren moduan, eta batzarren eta kide anitzeko organoen funtzionamendua errealitate digitalera egokitzen du, telematikoki egitea ahalbidetuz.
Erregelamendu horrek, hain zuzen ere, abenduaren 20ko 11/2019 Legea eta haren ondorengo aldaketak garatzen ditu, sektoreko erakunde nagusien ekarpenak integratuz, Konfekoop Euskadiko Kooperatiben Konfederazioarenak eta Euskadiko Kooperatiben Kontseilu Gorenarenak.
Araudi berria indarrean sartzearekin batera, Ekonomia, Lan eta Enplegu Sailak beste urrats bat eman du kooperatiben eredua sendotzeko, garapen ekonomikorako eta gizarte kohesiorako tresna gisa, Euskadiko kooperatiben segurtasun juridikoa eta lehiakortasuna bermatuta.
