- Imanol Pradales Lehendakariak europar unearen garrantzia eta Arku Atlantikoa bultzatzeko aukera aprobetxatzeko beharra azpimarratu ditu
- Adierazi duenez, Espainiako eta Frantziako estatuak presionatzeko unea da, egiteko dauden konpromisoetan aurrera egin dezaten, batez ere abiadura handiko trenbide-konexioaren arloan
- Udaberrian goi-bilera bat egingo da Europako Garraio eta Turismoko komisario Apostolos Tsitsikostasekin, abiadura handiaren konexioan aurrera egiteko
Imanol Pradales Lehendakariak Bordelera egindako bidaia instituzionalaren balantzea egin du gaur, eta bereziki garrantzitsutzat jo du, Europa mailan bizi dugun uneagatik eta Arku Atlantikorako irekitzen diren aukerengatik.
Egin diren bileren garrantzia azpimarratu du Pradalesek, eta azpimarratu duenez, Frantziako eta Espainiako estatuak presionatzeko eta bultzatzeko unea da hau, abiadura handiko trenbidearen garapenari dagokionez “egin behar dutena egin dezaten”.
Lehendakariak bere hitzaldian berretsi duenez, Euskadik lanean jarraituko du Europako Batzordearen eskutik eta Akitania Berriko eskualdearekin lankidetza estuan, “unea aprobetxatu behar delako”. “Europak ezin du itxaron, ardatz atlantikoak ere ez, eta Euskadiren lehiakortasuna, neurri batean, estrategia horren mende dago”, esan du.
Era berean, Lehendakariak nabarmendu duenez, Europako Batzordeak lehentasunezkotzat jotzen du Arku Atlantikoa bultzatzea, eta Europarako azpiegitura estrategikotzat jotzen du abiadura handiko trenbide-konexioa. Azaldu duenez, datorren astean Europako koordinatzaileak Bordelen izandako bileraren ondorioak helaraziko dizkio Frantziako ministroari. Bestetik, udaberrian goi-bilera egingo da Iparraldearen eta Hegoaldearen arteko mugan, Apostolos Tsitsikostas Europako Garraio eta Turismo komisarioaren, Espainiako eta Frantziako ministroen, Alain Rousset Akitania Berriko presidentearen eta Lehendakariaren parte-hartzearekin, abiadura handiko konexioan aurrera egiteko.
Gainera, irailean lan-jardunaldi bat egingo da Euskadin, konexio- eta mugikortasun-proiektu europarrak indartzera bideratutako HSR funtsak abian jartzearekin lotuta. Pradalesek adierazi duenez, Europako Batzordearen konpromiso irmoa argia da, eta berretsi du Euskadik aukera-leiho bat duela, atzerapenik gabe aprobetxatu behar duena.
Lehendakariak Europarentzat erabakigarria den une baten testuinguruan kokatu du estrategia hori, datozen urteetako etorkizuna markatuko duten proiektu handiak eta finantzaketa-esparruak zehazten ari baitira. Azpimarratu duenez, ziurgabetasun globala, munduko ordenaren birkonfigurazioa eta mehatxu ekonomikoa eta segurtasunekoa nagusi diren testuinguru honetan, hau ez da edonolako unea, erabaki handien unea baizik. Azpimarratu duenez, “gure etorkizuna dugu jokoan, eta Euskadik presente egon behar du eztabaida eta erabaki horietan”.
Pradalesek defendatu duenez, autonomia estrategikoaren aldeko Europaren apustuak Arku Atlantikoko nodo industrial eta ekonomiko nagusiak lotzea eskatzen du, besteak beste, Euskadi, Bordele, Toulouse, Madril, Paris edo Lisboa. Adierazi du abiadura handiko trenbide-konexioa funtsezkoa dela pertsonen eta salgaien mugikortasunerako, lehiakortasunerako eta segurtasunerako, eta funtsezko azpiegitura dela Euskadiren eraldaketa industrialerako eta ekonomikorako, baita Europaren berrindustrializaziorako ere.
