-URTARRILAREN 26A, KAWASAKI-REN GAIXOTASUNAREN MUNDUKO EGUNA-
- Osakidetzak 18 kasu berri diagnostikatu zituen iaz, eta protokolo bateratu bat du gaixotasuna garaiz detektatzeko eta sintomak agertu eta lehen 10 egunetan tratamendua hasteko, konplikazio koronarioak izateko arriskua % 20tik % 5era murriztuz
- Batez ere haurtzaroan eragiten duen gaixotasuna da, eta garaiz diagnostikatu eta tratatzen ez bada, ondorio kardiakoak eragin ditzake
- Eusko Jaurlaritzako Osasun Sailak, Euskadiko Osasun Itunaren bidez, beste urrats bat ematen du arreta aurreratuagoa eta bidezkoagoa emateko ohikoak ez diren gaixotasunak dituzten pertsonei, eta ildo estrategiko espezifiko bat du
Osakidetzak gaur egun Euskadin Kawasaki gaixotasuna diagnostikatuta duten 260 pertsona tratatzen ditu. Gaixotasun hori ezohikoa izan arren, larria izan daiteke, eta 5 urtetik beherako haurrei eragiten die nagusiki. Gaur, urtarrilaren 26an, astelehenean, gaixotasun horren munduko eguna da, eta, horren ildoan, Eusko Jaurlaritzako Osasun Sailak eta Osakidetzak azpimarratu dute garrantzitsua dela garaiz detektatzea eta lehen 10 egunetan tratamendua hastea, horrela konplikazio koronarioak izateko arriskua % 20tik % 5era murrizten baita.
Kawasakiren gaixotasuna (Kawasakiren sindromea edo gongoil linfatiko mukokutaneoen sindromea ere esaten zaio) odol-hodi txiki eta ertainen baskulitis (inflamazio) orokortua da; gehien bat haurtzaroan agertzen da, eta arteria koronarioei eragin ohi die. Batez ere haurrei eragiten dien gaixotasuna da. Ez bada garaiz diagnostikatzen eta tratatzen, ondorioak izan ditzake bihotzean; izan ere, gaur egun haurtzaroko hartutako kardiopatiaren arrazoi nagusia da.
Euskadin, Osakidetzak 18 kasu berri detektatu zituen iaz (1 Araban, 11 Bizkaian eta 6 Gipuzkoan), 12 gizonezkoen artean eta 6 emakumezkoen artean, eta kasu gehienak adingabeen artean gertatu ziren. Guztira, 260 pertsonari diagnostikatu diete gaixotasun hori: % 55 gizonezkoak dira, eta gehienak adingabeak, gainera (213 guztira). Erika Rezola doktoreak, Osakidetzako haur-kardiologoak Donostiako Unibertsitate Ospitalean, honako hau azaldu du: «Batez ere 5 urtetik beherako haurrei eragiten die, apur bat nagusitzen da gizonezkoen artean, eta neguan eta udaberrian kasu gehiago detektatzen ditugu». Gainera, gogorarazi du garrantzitsua dela sintomak ahal bezain laster detektatzea, ondorio larriagoak saihesteko.
Diagnostikatzeko, sukar altu luzatua da irizpide nagusia (gutxienez, 5 egunez izatea) eta, horrekin batera, honako hauek gertatzea: larruaren mukosen erasana (hala nola begi gorriak), larruazaleko erupzioa, mugurdi-itxurako mihia eta fisurak ezpainetan, gongoil zerbikal handitua, esku/oin gorriak eta handituak izatea eta abar.
Euskadiko Osasun Ituna, gaixotasun ezohikoen arreta
Osakidetzak protokolo bateratu baten bidez heltzen dio gaixotasun horri. Protokolo horren bidez, gaixotasunaren arriskua ezar daiteke, susmoa dagoenean eskatzen diren proba osagarrien emaitzen arabera. Proba osagarri horiek, nagusiki, honako hauek dira: analitika orokorra eta bihotzaren erasana baztertzeko balorazio kardiologikoa (azken hori ekokardiogramaren eta ekokardiografiaren bidez egiten da). Ondoren, arrisku-taldearen arabera, tratamendu egokiena ezartzen da.
Eusko Jaurlaritzako Osasun Sailak, Euskadiko Osasun Itunaren bidez, beste urrats bat egin du arreta aurreratuagoa eta bidezkoagoa emateko horrelako gaixotasun ezohikoak dituzten pertsonei, eta berariazko ildo estrategiko bat du, ohikoak ez diren baina konplexutasun kliniko eta sozial handia duten patologia horiei hobeto heltzeko. Itunaren ildo horrek bide-orri bat ezartzen du, arreta doitasun-diagnostikorako sarbide zuzenean, tratamendu pertsonalizatuetan eta baliabideen koordinazioaren hobekuntzan jartzen duena.
