Eskola jarduera normaltasunez hasiko da berriro asteazkenean, ikasleen segurtasuna bermatu ondoren.
Hezkuntza Sailak jakinarazi duenez, Amurrioko Mendiko Eskolako Lehen Hezkuntzako eraikineko klaseak bertan behera geratu dira astelehen eta asteartean, igande arratsaldean izandako ziklogenesiak eragindako kalteen ondorioz.
Haize bortitzak Lehen Hezkuntzako eraikinaren hormigoizko teilatua estaltzen duten panelen zati bat erauzi zuen, materialak erortzeko arriskua sortuz. Egoera horren aurrean, eta segurtasun protokoloei jarraituz, erabaki dute aldi baterako etetea eskola jarduera, ikasleen eta ikastetxeko langileen segurtasuna bermatzeko (280 pertsona).
Egun bi hauetan, talde teknikoek solte dauden plaka eta elementu guztiak kenduko dituzte, estalkia erabat segurtatzeko eta edozein arrisku desagerrarazteko.
Halaber, gaur koordinazio-bilera egin dute Eusko Jaurlaritzako Hezkuntza Sailak, Amurrioko Udalak eta ikastetxeko Zuzendaritzak, gertaeraren jarraipena egiteko, jarduerak koordinatzeko eta normaltasunera ahalik eta baldintzarik onenetan itzultzea ziurtatzeko.
Aurreikuspenen arabera, zentroa asteazkenean irekiko dute berriro, segurtasun baldintzak egiaztatu ondoren. Konponketa lanak gaur bertan hasiko dira, eta bi aste inguru iraungo dute.
Hezkuntza Sailak azpimarratu du erabateko lehentasuna ikasleen segurtasuna dela une oro, eta eskerrak eman dizkie familiei eta ikastetxeko langileei, salbuespenezko egoera honen aurrean ulertu eta laguntzeagatik.
