NARE – Giza Eskubideen Defendatzaileak Babesteko Euskal Programaren euskal ordezkaritzak agiri batekin amaitu du. Bertan, Euskadik giza eskubideen defentsarekin eta Kolonbian gizarte-, ingurumen- eta genero-justizia duen bakea eraikitzearekin duen konpromisoa berrestu du. Misioaren helburua izan da programak hartzen dituen pertsonen egoera pertsonal eta komunitarioaren jarraipena egitea, haien babes-sareak indartzea eta Eusko Jaurlaritzaren, Eusko Legebiltzarraren eta euskal gizartearen babesa ikusaraztea.
Ainhoa Zugasti Giza Eskubideen eta Biktimen Arretarako zuzendariak, euskal ordezkaritzaren buru izan denak, adierazi duenez, “misio hau Euskal Herriaren nazioarteko elkartasun eta babes politikorako konpromiso bat da, ez bakarrik giza eskubideen defendatzaileei, baita Kolonbian giza eskubideen errespetuan oinarritutako eta bermedun bake bati ere. NARE programa 15 urteren ondoren, laguntza eta erantzunkidetasun apustu sendoa da: euskal erakundeen presentziak babesa indartzen du, arriskuak ikusarazten ditu eta giza eskubideak, bizitza, lurraldea eta justizia soziala defendatzen dituztenei laguntzen die ”.
Azken komunikatuan, euskal ordezkaritzak aitortu du egungo Kolonbiako Gobernuak borondatea duela bakearen eraikuntzan eta giza eskubideen defentsan aurrera egiteko, eta konpromisoa duela indarkeria eta ekitate falta historikoak gainditzeko. Gainera, elkartasuna adierazi die gizarte-mugimenduari eta bizitzaren eta lurraldearen alde lan egiten duten komunitateei.
Ordezkaritza eLankidetza – Lankidetzaren eta Elkartasunaren Euskal Agentziako, Eusko Legebiltzarreko, Euskadiko GGKEen Koordinakundeko, Alboan Fundazioko, Movimiento por la Paz (Kolonbia) eta Zehar Errefuxiatuekin elkarteko kideekin osatua egon da, eta gatazka armatuaren larritasunaz eta degradazioaz ohartarazi du, eta bereziki kezkatuta dagoela egungo hauteskunde-aldian indarkeriak areagotu daitezkeelako, giza eskubideen defendatzaileen aurkako erasoek jarraitzen dutelako eta Estatua ez delako behar bezala agertzen lurraldeetan.
Bestalde, bake integrala indartzeko deia egin du, bizitzaren babesean, komunitateen parte-hartze eraginkorrean, Bake Akordioa betetzean eta Estatuak lurralde osoan duen presentzian oinarrituta, giza eskubideak eta justizia soziala bermatzean oinarritutako ikuspegiarekin. Era berean, giza eskubideen defendatzaileak prebenitzeko eta babesteko politikak indartzeko beharra azpimarratu du, eta, horretarako, salaketa-bide seguruak bermatzea eskatu du, justizia eraginkor eta erreparatzailearen esparruan.
Halaber, bere kezka adierazi du haurrak eta nerabeak bortxaz errekrutatzeagatik, sexu indarkeriagatik eta pertsonen salerosketagatik, bai eta enpresa eragileek indarkeriak sortzeko duten inplikazioagatik ere, eta Smurfit Westrock enpresak Cajibion (Cauca) duen kasua nabarmendu du, gizartean eta ingurumenean dituen inpaktuengatik.
Gainera, euskal ordezkaritzak Kolonbiako gizarte-mugimenduarekiko, biktimen eta giza eskubideen aldeko erakundeekiko, nekazarien komunitateekiko, herri indigenekiko eta herri beltzarekiko errespetua, babesa eta elkartasuna berretsi ditu, bakean dagoen herrialde baten elkarrizketaren bidez eraikuntzarekiko erresistentzia eta konpromisoa aitortuz.
Era berean, NARE programa indartzearen aldeko apustu argia berretsi du, bai eta Kolonbian egia, justizia, erreparazioa eta berriro ez gertatzeko bermeen prozesuetan laguntzeko konpromisoa ere. Gainera, eskua luzatu du herrialdeko erakundeekin eta instituzioekin elkarrizketarako eta lankidetzarako espazioak izaten jarraitzeko.
Ordezkaritzaren jarraipena egiteko bisita urtarrilaren 22tik 31ra bitartean egin da, eta lan agenda handia izan da, besteak beste, Asociación Campesina de Desarrollo Rural (ACADER), Asociación de Desplazados y Mujeres de Antioquia (ADMA) eta Awá Herriko Emakume eta Familia Kontseilaritzarekin egindako topaketak barne. Haien eskaerak eta kezkak Kolonbiako erakunde publikoei helarazi zaizkie. Gainera, agendan bilerak egin dira herrialdean dauden nazioarteko erakundeekin eta kidego diplomatikoko ordezkariekin, hala nola Nazio Batuen Egiaztatze Misioarekin, Nazio Batuen Goi Komisarioarekin eta Espainiak Kolonbian duen enbaxadarekin.
