- Arrantza-sektorearen gaitasun teknikoa indartzea eta jasangarritasuna tokiko komunitateari hurbiltzea du helburu ekimenak
Marine Stewardship Councilek (MSC), Bermeo Tuna World Capitalekin (Bermeo Tuna) eta Eusko Jaurlaritzarekin lankidetzan, «MSC ziurtapenerantz lanean» 2. mailako prestakuntza-ikastaroa egingo du gaur eta 2026ko otsailaren 5a bitartean. Hau arrantza jasangarriaren arloko gaitasunak indartzera bideratutako prestakuntza tekniko aurreratua da.
Ikastaro honen helburua MSCen arrantza-tokien estandarra interpretatzeko eta aplikatzeko gaitasunak handitzea da, eta erakundearen prestakuntza-estrategian sartzen da, gaitasun berriak sortzeko bai etorkizuneko arrantza-tokietako ebaluatzaileentzat, bai hobekuntza- eta ziurtapen-prozesuetan arrantza-tokiei arreta eman diezaieketen teknikarientzat.
Ikastaroa Bermeoko Portuen Bulegoan egingo da, Erroxape Kaian, eta Espainian emandako 2. mailako ikastaroaren hirugarren edizioa da, Alicanteko Unibertsitatean eta Bartzelonako Itsas Zientzien Institutuan (ICM-CSIC) 2017an eta 2019an egindakoen ondoren, hurrenez hurren.
Oraingo honetan, prestakuntzak 30 orduko iraupena izango duen online saioen aldez aurreko osagai bat eta hiru lanaldi presentzial intentsibo konbinatuko ditu. Horrela, parte-hartzaileak modulu teorikoak osatuta iritsiko dira aurrez aurreko saioetara, eta, horri esker, ikasgelako denbora ariketa praktikoei, kasu errealen analisiari eta zalantza teknikoen ebazpenari eskaini ahal izango zaie.
Programa, Arrantza-sektoreko profesionalei, administrazio publikoetako langileei, zientzialariei, aholkulariei eta arrantza hobetzeko proiektuen arduradunei zuzendurikoa da, eta MSC estandarraren aplikazioan sakontzen du.
Estandar horrek honako hiru printzipio hauek ditu:
- P1: Arrainen populazio iraunkorrak
- P2: Ingurumen-inpaktuak minimizatzea
- P3: Arrantzaren kudeaketa eraginkorra
Ikastaroak ebaluazio-baldintzak, puntuazio-irizpideak eta hobekuntza-planak garatzeko tresnak jorratuko ditu, arrantza-kudeaketako eredu jasangarriagoak eta gardenagoak lortzeko interesa gero eta handiagoa den testuinguru batean.
Ekimena sektorearen eta erakundeen artean partekatutako ahaleginen barruan kokatzen da, tunidoen balio-kate osoak ingurumen-, gizarte- eta ekonomia-jasangarritasunarekin duen konpromisoa indartzeko, bai eta Bermeo nazioarteko erreferentzia-gune gisa finkatzeko ere, ezagutzari, prestakuntza espezializatuari eta arrantza-kudeaketa iraunkorreko jardunbide egokiei dagokienez.
Ekitaldi paraleloak tokiko laguntzaileekin
Ikastaroaren esparruan, gainera, Bermeo Tunako bazkideekin batera antolatutako hainbat ekitaldi paralelo egingo dira. Horietan, parte-hartzaileek aukera izango dute MSC estandarra sektoreari lotutako enpresen eta erakundeen eguneroko jardueran nola aplikatzen den zuzenean eta formatu lasaian ezagutzeko.
Topaketa horiei esker, jasangarritasunari eta ziurtapenari buruzko esperientzia praktikoak trukatu ahal izango dira, eta, amaitzeko, MSC ziurtagiria duten produktuekin egindako platerak dastatuko dira, itsas baliabideen kudeaketa jasangarriaren eta merkatuaren arteko lotura indartzeko.
- Otsailak 3 – Esperientzia flotatik. Echebastarreko Alakrana jatetxean. Parte-hartzaileek indikoan tunatu tropikalak inguratuz arrantzatzeko lehen MSC ziurtapen-prozesuan parte hartu zutenen esperientzia ezagutuko dute.
- Otsailaren 4a – Sektore eraldatzailearen ikuspegia. Arroyabe Kontserben showroomean, parte-hartzaileek MSC ziurtagiriarekin lan egitearen balio estrategikoaz eta merkatuaren pertzepzioaz hitz egingo dute.
Hezkuntza eta komunitatea: arrantza iraunkorrari buruzko eskola tailerra
Tokiko komunitatearekiko konpromisoaren barruan, atzo dibulgazio-tailer bat egin zen Bermeoko Udalaren laguntzarekin, Bermeoko ikastetxeetako lehen hezkuntzako 5. eta 6. mailako ikasleei zuzenduta: Eleizalde Ikastola, Sagrado Corazón Ikastetxea eta Bermeo San Frantzisko Herri Ikastetxea.
Lehen hezkuntzarako MSCren hezkuntza-programan sartutako jarduera Julio Agujetas eta Isadora Moniz, MSCk Espainian eta Portugalen duen bulegoko arrantza-tokietako arduradunek eman zuten, eta arrantza jasangarriari buruzko funtsezko kontzeptuak hurbildu zizkien ikasleei, arreta berezia jarriz atunaren arrantzari, herriarentzat duen garrantzi ekonomiko, sozial eta kulturalagatik.
Aitorpenak
Alberto Martín, MSC Espainia eta Portugaleko zuzendariak, adierazi du: «Bermeo nazioarteko erreferentea da arrantzaren iraunkortasunari dagokionez, eta, beraz, prestakuntza hori hemen hartzeak balio estrategiko handia du. Gure helburua da gaitasun teknikoak indartzen jarraitzea eta MSC Estandarra hurbiltzea egunero Betiko Itsasoen alde lan egiten dutenei.”
«Iraunkortasuna ez da arauekin bakarrik eraikitzen, ezagutza partekatuarekin, konpromiso kolektiboarekin eta epe luzeko ikuspegiarekin baizik. Aste honek horixe adierazten du zehazki: prestakuntza, dibulgazioa eta benetako esperientzia Bermeotik mundura «, adierazi du Maitane Leizaola Bermeo Tuna World Capitaleko zuzendari nagusiak.
«Eusko Jaurlaritzak honelako ekimenak babesten ditu arrantza jasangarri, arduratsu eta lehiakor baterantz aurrera egiteko funtsezkoak direlako. Sektorearen, nazioarteko erakundeen eta tokiko komunitatearen arteko lankidetzak indartu egiten du ingurumenaren, gizartearen eta ekonomiaren iraunkortasunaren alde egiten dugun apustua, eta Euskadi eta Bermeo erreferenteak dira jardunbide egokietan eta arrantza-kudeaketako prestakuntzan «, azpimarratu du Ixone Soroa Eusko Jaurlaritzako Arrantza eta Akuikulturako zuzendariak.
Bermeo, atun-jasangarritasunaren erreferente globala
Gaur egun, Bermeo nazioarteko erreferentea da tunidoen arrantza jasangarrian, bai ontzidiaren ingurumen-, gizarte- eta ekonomia-jardunagatik, bai arrantzaren eta eraldaketaren inguruan ekosistema berritzaile bat egituratzeko duen gaitasunagatik. Udalerrian basea duen flota da, bai baxurakoa bai nazioarteko uretakoa, MSCrekin ziurtagiria lortu zuen lehenetarikoa izan zen, eta arte arduratsuak erabiltzeagatik eta jasangarritasunarekiko, berrikuntzarekiko eta tokiko garapenari egindako ekarpenarekiko konpromiso irmoagatik aintzatespen orokorra jaso zuen.
Bermeon operazio-basea duen flota, munduko tunido tropikalen harrapaketa globalen % 10aren erantzulea da. 2.000 miloi € inguruko inpaktu ekonomikoa eragiten du eta 30.000 lanpostu baino gehiago mantentzen ditu, horietatik 3.000 lanpostu Euskadin.
Bermeo Tuna World Capitali buruz
Bermeo Tuna atunaren balio-kateari lotutako 40 erakunde baino gehiago biltzen dituen elkartea da, eta eragile dinamizatzaile gisa jarduten du tokiko eta nazioarteko prestakuntza-, dibulgazio-, ikerketa- eta posizionamendu-proiektuak bultzatuz. Bermeoko eredua ekonomia urdinaren polo gisa proiektatzea, etorkizunerako aukerak sortzea eta talentua eta jasangarritasunarekin bat datozen ekimenak erakartzea du helburu.
Marine Stewardship Council-i buruz (MSC)
MSC nazioarteko erakunde independentea da, eta arrantza jasangarrirako estandar globalak ezartzen ditu. Bere ziurtapen- eta ekoetiketatze-sistema nazioarteko erreferentzia nagusietako bat da itsas baliabideen kudeaketa egokia bermatzeko eta merkatuei eta kontsumitzaileei konfiantza eskaintzeko.
