Ertzaintzako agenteek gizon bat atxilotu dute gaur arratsaldean Bilboko Zorrotza auzoan, joan den astean 60 urteko gizon baten indarkeriazko heriotzan parte hartzeagatik. Biktima Lezamako udalerrian aurkitu zuten hilda, Alto de Vivero inguruan.
Gorpua joan den ostiraleko goiz erdian aurkitu zuten, eta baieztatu zutenez Barakaldoko 60 urteko espainiar nazionalitateko gizonezko bat zen, joan den asteazkenetik desagertuta zegoena.
Ertzaintzaren hainbat patruila bertaratu ziren, zegokion begizko ikuskapena egiteko, eta, batzorde judizialak gorpua altxatu ondoren, Ertzaintzak ikerketa bat abiarazi zuen, gorpuak ustezko indarkeria-zantzuak baitzituen.
Ondorengo orduetan egindako ikerketei esker, gaur, asteartea, arratsaldeko bostak eta laurden aldera, Bizkaiko Ikerketa Kriminaleko Lurralde Ataleko agenteak Bilboko Zorrotza auzora joan dira gizon bat atxilotzeko, homizidio-delitu baten ustezko egile gisa.
Atxilotuak 21 urte ditu eta nazionalitate espainiarra du. Ustezko homizidio-delitu bat leporatu diote, eta ertzain-etxera eraman dute, beharrezko izapideak egin eta epailearen esku utzi arte.
