- Eusko Jaurlaritzak kostaldeko eraikinaren egoerari buruz argitaratutako informazioen testuingurua argitu du
- Elikadura, Landa Garapen, Nekazaritza eta Arrantza Sailak bere jarrera proiektuaren babes teknikoan, juridikoan eta ondarean oinarrituta finkatu du
Eusko Jaurlaritzak bere jarrera zehaztu du Plentziako Itsas Estazioa (PIE-EHU) hartzen duen eraikinaren egoeraren inguruan. Azpiegitura hori itsas ikerketari lotutako erreferentziazko ekipamendu zientifikoa da.
Azken asteetan, hainbat komunikabidek eraikinaren etorkizunari buruzko informazioak argitaratu dituzte, eta horietan aipatzen zen arriskua egon zitekeela haren jarraitutasunerako, kostaldeko jabari publikoan kokatuta egoteagatik eta martxan dagoen administrazio-prozedurarekin lotuta.
Informazio horietan, besteak beste, eraikinaren paisaia-inpaktuari buruzko txostenak eta hura okupatzeko beharrezkoa den emakidaren izapidetzea aipatzen ziren.
Testuinguru horren aurrean, Eusko Jaurlaritzak espedienteak babes tekniko, juridiko eta ondare zabal eta sendoa duela argitu du. Babes horren barruan sartzen dira eraikinaren aurrekari historikoak, eskuragarri dauden txosten espezializatuak eta haren jarraitutasuna bermatzeko baldintzen ebaluazioa.
Eusko Jaurlaritzako Elikadura, Landa Garapen, Nekazaritza eta Arrantza Sailaren ustez, justifikatuta dago Itsas Estazioak gaur egungo kokalekuan jarraitzea. Eraikina 1923an eraiki zen sendategi gisa, eta mende bat baino gehiago darama Plentzia eta Gorliz udalerrietako hiri eta kultura-paisaian integratuta. Gaur egun, unibertsitateko ikerketa-zentro gisa erabiltzen da, dagoeneko existitzen den azpiegitura batean. Jatorrizko egitura errespetatuz berritu da, azalera handitu gabe eta jabari publikoan okupazio berririk egin gabe.
Aztertutako txostenek bat egiten dute bi alderdi azpimarratzean: alde batetik, eraikinaren ondare-balioa, Euskal Kultura Ondarearen Inbentarioan sartzeko proposatua, eta, bestetik, kostaldean kokatuta egotearen beharra, itsas ingurunearekin lotutako jarduera zientifikoak garatzeko.
Administrazio-emakidari dagokionez, gaur egun izapidetze bidean dagoena, Eusko Jaurlaritza espedientean jasotako txosten guztiak baloratzen ari da. Horien artean, Estatuaren Administrazio Orokorrak emandako aurkako irizpidea dago, paisaia-inpaktuari lotutako arrazoiengatik. Hala ere, arau-esparruak aukera ematen du emakiden baldintzak edo iraupena egokitzeko, eta horrek ez du zertan lehendik dauden eraikinak kentzea ekarri behar.
Era berean, analisiak klima-aldaketarekin eta itsas mailaren igoerarekin lotutako arriskuen ebaluazioa ere jasotzen du, eta horretarako jarraipen-periodikoko eta egokitzapeneko neurriak aurreikusten dira instalazioen segurtasuna bermatzeko.
Testuinguru honetan, proposamen teknikoak izaera mugatuko emakida planteatzen du, kontrol, segurtasun eta berrikuspen neurri zehatzak betetzera baldintzatua. Helburua kostaldearen babesa eta jarduera zientifiko estrategiko baten jarraitutasuna bateragarri egitea da.
Horrela, Eusko Jaurlaritzak berretsi egiten du ondarearen babesean, kostaldearen kudeaketa arduratsuan eta ikerketaren sustapenean duen konpromisoa, Plentziako Itsas Estazioaren etorkizuna sendotzeko irtenbideak lehenetsiz.
