- Ekimen honetan parte hartzeko izena emateko epea zabalik dago gaurtik maiatzaren 14ra arte, 16 eta 17 urte bitarteko gazteentzat.
Memoriaren, Bizikidetzaren eta Giza Eskubideen Gogora Institutuak Erbesterako Ibilbidearen seigarren edizioan parte hartuko du, aurten ‘Besar el pan’ lelopean. Egingo dena.
Gaur bertan ireki da prestakuntza-bidaia honetan izena emateko epea. Bertan, Espainiako lurralde osoko 40 gaztek Pirinioez haraindiko erbestealdi errepublikarra eta zibila oroitzeko hainbat leku bisitatuko dituzte doan. Memoria historikoaren proiektu pedagogiko hau estatu osoko 16 eta 17 urteko gazteei zuzenduta dago. Parte hartu nahi duten gazteek lau aste izango dituzte hautagaitzak prestatu eta aurkezteko, gaurtik maiatzaren 14ra arte.
Gogora Institutuak dibulgazio-arloko ekimen honetan parte hartzen du, gure iraganaren ezagutza eta hausnarketa kritikoa sustatzen dituelako, espazio informal batean, bizipen-esperientziarekin lotuta, memoriaren transmisiorako eta publiko gazteenarentzat aproposa.
Edizio berria uztailaren 15etik 28ra izango da, ‘Besar el Pan’ izenburupean. Erbesterako Ibilbidea – Ruta al Exilio 2026 ekimenak gerraostean goseari egunero aurre egin zion gizarte baten sukaldeetara bidaiatuko du, baina gerra ostean eta gerraostean lurralde askotan eman ziren elikagaien ekoizpenari buruz ere hausnartuko du. Edizio honen izenburua diktadurapean bizirik iraun eta eguneroko jarduerarekin errazionamenduari aurre egin zioten pertsonei egindako omenaldia da, baina baita urte batzuk lehenago jantoki sozialak ireki, lurra kolektibizatu eta hornidura-batzordeak sortu zituztenei egindako omenaldia ere. Beste herrialde batekin eta beste etorkizun batekin amets egiten zuten pertsonengana eta kolektiboengana hurbiltzea da helburua.
Gogora Institutuak babestutako ekimen hau Espainiako Gobernuaren Gazteria- Institutuak (INJUVE) eta Espainiak Askatasunean 50 urte komisionatuak bultzatu eta finantzatu dute. Gainera, Bartzelonako Unibertsitateko Memoriaren Europako Behatokiak eta Nafarroako Memoriaren Institutuak ere finantzatu dute.
Izen-emateak
Ibilbidea uztailaren 15etik 28ra izango da eta 2008ko uztailaren 28tik 2010eko uztailaren 15era bitartean (biak barne) jaiotako pertsonek parte hartu ahal izango dute. Jasotako eskabide guztien artean, 40 parte-hartzaileren hautaketa egingo da, eta ekainaren lehen hamabostaldian iragarriko da.
Deialdiaren baldintzak ikusteko: https://rutaalexilio.com/#participar
Izena emateko: https://docs.google.com/forms/d/e/1FAIpQLScfPGzwYbOvdY-qNzccLAfjrDu5pv1oEtkk8XqJVgwnv8qZow/viewform
Proiektuaren arima
Partekatzea, ibiltzea, sentitzea eta sortzea dira Erbesterako Ibildearen funtsezko zutabeetako batzuk. Gazteen artean autonomia, hausnarketa kritikoa eta gaitasun etiko eta emozionalen garapena sustatzea bilatzen du proiektuak, bizipenean oinarritutako ikaskuntza-eredu batean oinarrituta. Memoria poliedrikoa da eta ñabarduraz beteta dago. Oroimenaren kontaketari eusteko eta eraikitzeko modu asko daude, betiere ahanzturaren, deserrotzearen eta nortasun-galeraren aurkako eguneroko praktika gisa ulertuta. Ildo horretan, ekimen honek gazteen egunerokotasunean memoria ezagutzeko, parte hartzeko eta integratzeko espazioak sortzea du helburu.
Ibilbidean zehar, irakasleek, artistek, ikertzaile espezializatuek eta tokiko hainbat eragilek emandako prestakuntza-tailerrak ematen dira. Aldi berean, parte-hartzaile bakoitzak sormen-proiektu propio bat landuko du, arte-diziplina ugariren barruan garatu dezakeena.
