- Gobernu Kontseiluak hiriko hainbat esparrutan (hala nola Txomin Enean, Trenbide Zabaltzan, Loiolako Kuarteletan, Auditz Akularren eta Antzitan) BOEak eta belaunaldiarteko zuzkidura-apartamentuak eraikitzeko udal-titulartasuneko hamar lursail mobilizatzea ahalbidetuko duen dokumentua eman du ezagutzera
- Denis Itxaso pozik agertu da Donostiako etxebizitza-politikaren etorkizunerako “bereziki garrantzitsutzat” hartu duen akordioarekin. Nabarmendu duenez, “hamabost urtean lehen aldiz Udala prest agertu da hamar eremutan lurzorua lagatzeko eta Eusko Jaurlaritzak erdi-mailako klaseentzako eta langileentzako modalitate guztietako alokairuko etxebizitza babestuak sustatu ditzan ahalbidetzeko”
Etxebizitza eta Hiri Agenda Sailak eta Donostiako Udalak hirian 5.000 zuzkidura-apartamentu eta babes ofizialeko etxebizitza baino gehiagoren sustapena bultzatzeko izenpetutako Jarduketa Protokolo Orokorra ezagutarazi dute gaur. Gobernu Kontseiluak onartu duen akordioaren arabera, etorkizunean udal-titulartasuneko hamar lursail lagako zaizkio Eusko Jaurlaritzari, Gipuzkoako hiriburuko hainbat hirigintza-eremutan 5.095 etxebizitza babestu eta belaunaldiarteko bizitoki garatzeko, alokairu eskuragarriko parke publikoa handitu dadin eta udalerrian dagoen bizitegi-larrialdiari erantzun dakion. Eremu horien artean, Txomin Enea, Trenbide Zabaltza, Loiolako Kuartelak, Auditz Akular eta Antzita daude.
Gaur goizean egindako prentsaurrekoan, Denis Itxaso sailburua pozik agertu da Donostiako etxebizitza-politikaren etorkizunerako “bereziki garrantzitsutzat” hartu duen akordioarekin. Adierazi duenez, “hamabost urtean lehen aldiz Udala prest agertu da hamar eremu horietan lurzorua lagatzeko eta Eusko Jaurlaritzak erdi-mailako klaseentzako eta langileentzako modalitate guztietako alokairuko etxebizitza babestuak sustatu ditzan ahalbidetzeko”.
Ildo horretan, Itxasok azpimarratu duenez, protokoloak “instituzionalki formalizatzen du Udalak 2025eko otsailaren 2an publikoki iragarri zuen konpromisoa”. Egun hartan, Eneko Goia alkate zela, Eusko Jaurlaritzari etxebizitza babestuak garatzeko lagako zitzaizkion hirigintza-eremuak xehatu zituen Hirigintzako zinegotzi Nekane Arzallusek. “Orain konpromiso politiko eta publiko hura dokumentu ofizial batera eraman dugu, eta, horri esker, azkenean erakundeen arteko lankidetza-esparru argi bat izango dugu etxebizitzaren arloan», azaldu du sailburuak.
Akordioak hainbat jarduketa-eremu identifikatzen ditu, epe labur-ertaineko garapenen eta hirigintza-ibilbide ertain-luzeko jarduketen artean banatuak. Lehen multzoan, hiriko sei eremu zehatzetan 994 etxebizitza babestu eta zuzkidura-apartamentu sustatzeko aukera aurreikusten da. Haietatik, 854 babes publikoko etxebizitzak izango dira —BOEak eta etxebizitza tasatuak—, eta 140 zuzkidura-apartamentuak. Jarduketarik garrantzitsuenen artean, honako hauek nabarmentzen dira: Txomin Enea II, 315 etxebizitza babesturekin (182 BOE + 91 etxebizitza tasatu eta 42 bizitoki); Antzita, 387 etxebizitza babesturekin (294 BOE + 93 etxebizitza tasatu); Jolastokieta, 169 etxebizitza babesturekin (80 BOE + 89 etxebizitza tasatu); eta Eliseo Zelaiak, 98 zuzkidura-bizitokirekin. Halaber, garapenak egingo dira Apostolutzan (8 BOE + 8 etxebizitza tasatu) eta Rodilen (9 BOE).
Lehen aurreikuspen horri epe ertain eta luzeko jarduketen bigarren pakete bat gehitu behar zaio, protokoloaren potentzial osoa 5.095 etxebizitzara igoko duena. Etorkizuneko eremu horietan 4.101 unitate babestu berri garatzeko aukera kalkulatu da, hain zuzen ere babes publikoko 3.921 etxebizitza eta 180 zuzkidura-bizitoki. Edonola ere, eremu bakoitzean adierazitako guztizko kopurua eta tipologia gutxi gorabeherakoak dira, eta aldaketak izan ditzakete garatzeko dauden plangintza-tresnen bidez.
Aurreikusitako garapen nagusiak honako hauek dira: Auditz Akularrekoa, Altzan, aurreikusitako 2.354 etxebizitza babestu (1.726 BOE + 628 etxebizitza tasatu) eta 50 bizitoki izango dituena; Loiolako Kuarteletakoa, 1.750 etxebizitzarekin (340 BOE + 1.360 tasatu + 50 apartamentu); Easo-Amarako Trenbide Zabaltzakoa, 530 etxebizitzarekin (500 BOE + 30 bizitoki); eta Sarruetakoa, beste 268 unitaterekin (218 BOE + 50 bizitoki). Protokolo horrez gain, azpimarratu beharra dago Eusko Jaurlaritzak Morlansen 160-180 zuzkidura-apartamentu —plangintza-fasean (hirigintzako xehetasun-azterketa)— eta Loiolako Erriberan 83 (obrak urte honen amaieran hastea dago aurreikusita) eraikitzea erabaki duela.
“Asmo handiko” protokoloa eta “funtsezko urratsa” Donostiarentzat
Hedabideen aurrean egindako hitzaldian, sailburuak berretsi du protokoloa “asmo handikoa” dela, eta “funtsezko urratsa” izango dela Donostian alokairu eskuragarriko parke publikoa handitzeko bidean aurrera egiteko, baina gogorarazi du jarduketa bakoitza hirigintza-eremu bakoitzerako hitzarmen espezifikoen bidez zehaztu beharko dela gero. “Protokolo honek ez ditu ordezten geroago negoziatu eta onartu beharko diren hitzarmen zehatzak, baina oinarri partekatu batzuk eta orain arte ez zegoen plangintza bateratu bat ezartzea ahalbidetzen du”, azaldu du.
Akordioan jasotako lankidetza-eredua udal-partzelak Eusko Jaurlaritzari doan lagatzean oinarritzen da, bertan alokairu iraunkorrerako etxebizitza babestuak eta zuzkidura-bizitokiak eraikitzeko helburuarekin. Ondoren, Eusko Jaurlaritzak etxebizitza horien sustapena, eraikuntza eta kudeaketa hartuko ditu bere gain. Protokoloan, gainera, sustapenen bideragarritasun ekonomikoa erraztera bideratutako hainbat neurri daude aurreikusita. Haien artean, iraupen luzeko alokairu babestura bideratutako sustapenetan Eraikuntzen, Instalazioen eta Obren gaineko Zergaren (EIOZ) % 95eko hobaria ezartzea nabarmentzen da, baita udal-tasa jakin batzuen salbuespena ere.
Etorkizuneko esleipen-prozesuei dagokienez, dokumentuak ezartzen du esleipendunek etxebizitza babestua eskuratzeko baldintza orokorrak bete beharko dituztela, eta, gainera, Donostian gutxienez hiru urtez jarraian edo azken hamar urteetako bostetan erroldatuta egon direla egiaztatu beharko dutela.
Bestalde, sailburuak Txomin Enea II eremuaren egoera aipatu du agerraldian. Itxasok gogorarazi du eremuaren hirigintza-antolamendua onartuta dagoela jada, eta berretsi du Eusko Jaurlaritza etxebizitza babestua maximizatzearen alde dagoela, etxebizitza librearen aurretik. “Udalak etxebizitza librea susta dezake hori erabakitzen badu, baina Eusko Jaurlaritzaren jarrera argia da: lurzoru publikoak etxebizitza eskuragarriak sortzeko balio behar du nagusiki”, adierazi du. Ildo horretan, sailburuak defendatu du etxebizitza librerako partzelen salmentaren ondoriozko diru-sarrerak “eremua urbanizatzeko kostuak konpentsatzeko erabili beharko liratekeela oso-osorik, etxebizitza babestuaren garapena errazteko».
Protokoloak zortzi urteko indarraldia izango du hasieran, gehienez ere hamabi urtera arte luzatu ahal izango dena, eta Eusko Jaurlaritzako eta Donostiako Udaleko ordezkariek osatutako Jarraipen Batzorde Mistoa sortzea aurreikusten du, aurreikusitako jardueren garapena gainbegiratzeko. Sailburuak nabarmendu duenez, lankidetza-esparru berri horri esker, gainera, aurreikusitakoaren arabera Eusko Jaurlaritzak 2026an Euskadin egingo diren bizitegi-eragiketen zati bat finantzatzeko abian jarriko duen Etxebizitzako Gizarte Funtsarekin lotu ahal izango dira etorkizuneko sustapenak. “Asmo handia duen eta luzaroan itxaron izan den akordio garrantzitsu baten aurrean gaude, eta akordio horrek aukera emango digu Donostian etxebizitza eskuratzeko arazoei egiturazko erantzun bat ematen hasteko”, amaitu du Itxasok.
