- Etxebizitza eta Hiri Agenda Sailaren mendeko sozietate publikoaren konpromisoak lurraldeen arteko oreka erakusten du; hala, Gipuzkoan 301 etxebizitza, Araban 276 etxebizitza eta Bizkaian 224 etxebizitza aurreikusten ditu
- Denis Itxaso sailburuak iragarri duenez, “Visesak Donostiako Infernua eremuan 270 etxebizitza sustatzeko giza eta finantza baliabideak erreserbatu bazituen ere, horien ordez 276 etxebizitza eraikiko dituzte Gasteizko Zabalgana auzoan, bertako Udalak Eusko Jaurlaritzari doako lurzorua eskaini ondoren”
Eusko Jaurlaritzako Etxebizitza eta Hiri Agendako sailburu Denis Itxasok, gaur goizean, Eusko Legebiltzarraren Osoko Bilkuran iragarri du Visesaren Administrazio Kontseiluak 2027rako Programa Kontratua onartu duela. Programa horrek alokairuko 801 etxebizitza babestu berri sustatzea aurreikusten du, sozietate publikoak orain arte onartutako kopururik altuena. Eusko Jaurlaritzari lurzoru publikoa ez lagatzearen ondorioei buruz EH Bilduk egindako interpelazio bati erantzuteko agerraldian egin du iragarpena. Agerraldi horretan, Itxasok Visesaren Programa Kontratu berriaren «irismenean eta anbizioan» jarri nahi izan du arreta, Euskal Autonomia Erkidegoko etxebizitza babestuen sustapen publikoaren hazkundearen joera sendotzen baitu.
«Aste honetan 801 etxebizitza berri onartu ditugu Visesarekin. Guztiak Babes Ofizialeko Etxebizitzak. Guztiak alokairuan», nabarmendu du sailburuak, eta azpimarratu du programa berriak «legegintzaldi honetako aurreko programa-kontratuen jarraipena dakarrela, urtetik urtera etxebizitza gehiago eta inbertsio publiko handiagoa konprometituta. Ekintzekin, ez diagonostikoekin. Hori da gobernu honek egiten duena: eraiki», gaineratu du. Programaren lurralde-banaketaren arabera, Gipuzkoan 301 etxebizitza eraikiko dira, Araban 276 eta Bizkaian 224, hiru lurraldeetako hainbat udalerritan banatutako jarduketen bidez.
Zehazki, Programa Kontratuak bi sustapen ditu Basaurin, 80 eta 60 etxebizitzakoak, hurrenez hurren; beste bi Abadiñon, 54 eta 30 etxebizitzakoak; 152 etxebizitzako sustapen bat Irita esparruan, Zarautzen; 45 etxebizitza Altzate auzoan, Errenterian; 104 etxebizitza tasatu Amaroz auzoan, Tolosan; eta babes ofizialeko beste 276 etxebizitza Zabalgana auzoan, Gasteizen.
Azken jarduketarekin lotuta, sailburuak iragarri duenez, “Visesak Donostiako Infernua eremuan 270 etxebizitza sustatzeko giza eta finantza baliabideak erreserbatu bazituen ere, horien ordez 276 etxebizitza eraikiko dira Gasteizko Zabalgana auzoan, bertako Udalak Eusko Jaurlaritzari doako lurzorua eskaini ondoren”. Zentzu horretan, Itxasok berriro gogorarazi du «Donostiako alkateak lurzoru publiko hori Eusko Jaurlaritzari ez lagatzea erabaki duela. Horrelaxe. Bere erabakia da. Errespetatu egiten dugu, baina argi dago hori ez doala gobernu honen bide-orriaren edo politiken bidetik”.
Egoera horren aurrean, Sailak eta Hiri Agendak jarduera lekuz aldatzea erabaki dute, “lurzoru publikoa etxebizitza babestuaren sustapen publikoaren eskura jarri duen” udalerri batera, sailburuak zehaztu duenez. Izan ere, sailburuak berak gogorarazi duenez, “eraikitzeko lurzorua behar dugu. Udalek lurzorua lagatzen dutenean, eraiki egiten dugu. Egiten ez dutenean, etxebizitza horiek borondate politikoa duen beste udalerri batean eraikitzen dira. Ez gara damutzen. Beste aukera batzuk bilatzen ditugu. Aurkitzen ditugu”, adierazi du tribunatik.
Itxasok azpimarratu du programan aurreikusitako sustapen guztiak alokairu babestura bideratuko direla oso-osorik, eta azpimarratu du Sailaren helburua «erakundeen lankidetzaren bidez etxebizitza eskuragarrien parke publikoa zabaltzen jarraitzea» dela.
Urtetik urtera, etxebizitza gehiago
Bestalde, Tolosan aurreikusitako 104 etxebizitzen kasua ere nabarmendu du sailburuak, hasiera batean etxebizitza librerako kalifikatuta baitzeuden udalerriko hirigintza-plangintzan. «Salmenta librekoak izango ziren etxebizitza horiek tasatu eta alokairu bihurtu ditugu, Sailak lurzoru publikoak oso-osorik etxebizitza babestura bideratzeko defendatzen duen printzipioa aplikatuz», adierazi du, Visesaren jabetzako lurzoruan sustatutako jarduketa bat delako. Itxasok azpimarratu du, halaber, 2027ko Programa Kontratuak bigarren urtez jarraian sendotzen duela «erdiko klaseei berariaz zuzendutako etxebizitza babestuaren lerro berri hau: alokairuko etxebizitza tasatua. 2026ko programaren barruan Lorategi Hirian aurreikusitako 35 etxebizitzen ondoren, kontratu berriak mota horretako beste 104 etxebizitza gehitu ditu Tolosan.
Hori dela eta, hauxe gaineratu du: «mezua argia da: etxebizitzaren sustapen publikoan lurraldeen arteko oreka bermatzeaz gain, etxebizitza babestuko tipologiak ere dibertsifikatzen ari gara, errealitate sozial desberdinei erantzuteko, eta gaur egun emantzipatzeko edo merkatuan sartzeko zailtasun handiak dituzten biztanle-sektoreei etxebizitza eskuragarria eskuratzeko aukera zabaltzeko». Programa Kontratu berri honekin, Etxebizitza eta Hiri Agenda Sailak eta Visesak azken urteetan hasitako hazkunde-bidea sendotu dute, 2025erako (716 etxebizitza) eta 2026rako (788 sustapen aurreikusi dira) onartutako programen ondoren.
Gainera, sailburuak gogorarazi du joan den asteartean Gobernu Kontseiluak protokolo bat onartu zuela Donostiako Udalarekin, hirian etxebizitza babestuetarako lurzoru publikoaren mobilizazioa bermatzeko. «Hain zuzen ere, Donostiako Udalaren lurzoru publikoa sustatzaile pribatuei berriro besterendu ez dadin, protokolo historiko bat prestatu dugu: Donostiako Udalak konpromisoa hartu du hamar lursail publiko Eusko Jaurlaritzari lagatzeko, ekimen publikoak 5.095 etxebizitza babestu baino gehiago gara ditzan, tasatuak barne, epe ertain eta luzean», adierazi du.
Azaldu duenez, «protokolo honek etxebizitza guztiak alokairukoak izatea bermatzen du, 2015eko Etxebizitzaren Euskal Legeak agintzen duen bezala. Lurzoruak publikoa izaten jarraitzea bermatzen du. Halaber, Donostiako klase ertaineko langileek etxebizitza babestu eskuragarrirako benetako sarbidea izatea, etxebizitza tasatuaren modalitatea barne —BOE orokorraren atalasetik kanpo geratu baina merkatu librean etxebizitza erosi ezin dutenengana iristen dena— ere bermatzen du». Protokolo honetan esparru hauek sartuko dira: Txomin Enea, Antzita, Trenbide-eremua, Loiolako Kuartelak edo Auditz Akular, bestak beste.
