- Laguntzek euskal arraza garbien kontserbazioa eta sustapena bultzatzeko funtsezko ekintzak finantzatuko dituzte
- Programak abeltzaintza-lehiaketak, liburu genealogikoak eta proba genetikoek, abereen errendimenduak edo gaitasun funtzionalak eragindako gastuak babestuko ditu
Gobernu Kontseiluak 2026ko laguntza-deialdia onartu du Euskadiko arraza garbien abeltzain-elkarteentzat. Deialdiak 600.000 euroko zuzkidura izango du, euskal abeltzaintza-sektorearen kontserbazioa, hobekuntza genetikoa eta modernizazioa sustatzeko.
Ekimenaren helburua da elkarte horiek egiten duten lana indartzea, besteak beste, liburu genealogikoen kudeaketan, arrazen hautaketa, hobekuntza eta sustapen-programetan eta errendimenduen kontrolean. Programak, gainera, Euskadiko landa-eremuetan eta mendialdeetan jarduera ekonomikoa mantentzen lagundu nahi du.
Laguntzek gastu jakin batzuen %100era arteko estaldura egin ahal izango dute, hala nola abeltzaintza-lehiaketetan parte hartzearekin lotutakoak, azterketa genetikoak, kontserbazio-programari lotutako jarduketak edo liburu genealogikoen eta ar eta eme ugaltzaileen katalogoen edizioa eta argitalpena.
Deialdiak, gainera, abereen errendimendu-probak eta ebaluazio genetikoa egiteko laguntzak jasotzen ditu, bai eta dagokion arrazen hobekuntza funtzionalarekin lotutako ekintzak ere. Jarduera horiei esker, abeltzaintza-ekoizpenean aplikatutako teknologia eta berrikuntza-tresna berriak txertatzen jarraitu ahal izango da.
Eusko Jaurlaritzako Elikadura, Landa Garapen, Nekazaritza eta Arrantza Sailak lehentasuna emango die bereziki euskal arraza autoktonoei eta desagertzeko arriskuan katalogatutako arrazei lotutako proiektuei, baita ustiategien lehiakortasuna, jasangarritasuna eta errentagarritasuna hobetzea helburu duten interes tekniko eta zientifikoko ekimenei ere.
Laguntza hauek Euskadin liburu genealogikoen kudeaketarako ofizialki aitortuta eta erregistratuta dauden arraza garbien abeltzain-elkarteek eskatu ahal izango dituzte.
Eskabideak aurkezteko epea hilabetekoa izango da, agindua Euskal Herriko Agintaritzaren Aldizkarian argitaratu eta hurrengo egunetik aurrera.
